1 E BAKOVI DAGI i taki tabua e Moses, “Na tahuna ni tuli tara viri ge vakalongo a mari ni pelekado a ngava na maki i masia na bakovi tara i ratea, o na maki i longoa na bakovi tara i takia, pali ra bakovi iea i uka ma i taki talea a maki i masia o i longoa, ra bakovi iea i rata a naro hale, bara ni vakamadihi.

2 “Na tahuna a bakovi i padoia tara maki i mate i manga a kanirau, a sipsip, a bulmakau, a maki i karaka viliha, ra bakovi iea i muto. Na tahuna a bakovi iea i lohoka vona a maki i ratea, i tahoka a ngava.

3 [a]“Na tahuna a bakovi tara i padoia a maki muto na bakovi tara, pali i uka ma i lohoka vona ra bakovi iea i muto. Na tahuna i lohoka vona a naro i ratea, i tahoka a ngava na naro hale vona.

4 “Na tahuna a bakovi tara i kaba tavula ni ratana a maki hale o ni ratana a maki kamumu, i uka ma i lohoka vona a naro hale i ratea. Na tahuna i lohoka vona, i tahoka a ngava.

5 “Na tahuna a bakovi i lohoka vona i ratea tara naro hale maea, ge taki tala a naro hale vona ne BAKOVI DAGI. 6 Ne vona ni koli a naro hale vona, a bakovi ge habia tara tuna sipsip o a meme ge a kinana, ge a nihabi na naro hale. A prister ge kavitagua a bakovi iea na naro hale vona.

7 “Pali ia ge uka a moni ni kona a sipsip, ge bole a balu ge rua ge bole valai ne BAKOVI DAGI, ge vakalobo a maregoa vona. A balu tara ge a nihabi ni puga vuroki a naro hale, a balu tara ge a nihabi ni gutu-vuro. 8 Ge bole lakea na prister ra balu nga, lakea a prister ge habi mugea tara, ne vona ni puga vuroki a naro hale. A prister ge horia a lohona balu, pali nahea ge rakudu talea a mapana. 9 A prister ge voro tamali a darana popote na gagana dede. A darana ranga ge bole paru, ge guru polotano na dede. Ra balu iea a nihabi na naro hale. 10 Muri ge habia a balu tara ge a nihabi gutu-vuro, ge ramaia a naro na vinara na nihabi. I mavonga kunana a prister ge habia a balu ne vona ni kavitagu a bakovi iea, lakea a naro hale vona bara ni puga vuroki.

11 “Pali na tahuna a bakovi ge uka a moni ni kona a balu ge rua, ge bole vilia a kilo na plaoa ge taku, ne vona a naro hale i ratea. Nahea ge ru a namona oliv o ge ru a havu mangisipa vona, a vuhuna ra plaoa iea a nihabi na naro hale. 12 Ge bole lakea na prister, ge ragamu tala ranga, a nihabi iea ge ratea e BAKOVI DAGI ge luhoia. Lakea a prister ge gutu na dede a plaoa popote nga, turana a nihabi na maki ni kani ni gutu na kanono ne vona e BAKOVI DAGI. Ra plaoa iea a nihabi na naro hale. 13 I mavonga a prister ge rata a nihabi ne vona ni kavitagu a bakovi iea, lakea a naro hale vona ni gi puga vuroki. A plaoa i tababana, ge bole a prister, i manga a nihabi na vit.”

14 E BAKOVI DAGI i takia e Moses i ta maea, 15 “Na tahuna a bakovi tara i longokaburungi ni habi a maki ni taba ne BAKOVI DAGI, i manga a hini i taki ge habi, i rata a naro hale. Ra bakovi iea ge bole vilia a sipsip a toga, ge habia ne BAKOVI DAGI ge vakaloboa a naro hale vona. A prister ge takia vona a mapana sipsip ge konea vona ge ramaia a mapana maki ni kona na mailo na Vure. Muri a bakovi iea ge bole vilia na prister tara sipsip a toga, a mapana ge maea. 16 Ra maki ni taba i uka ma i habi muga ne BAKOVI DAGI, ngane ge habi ge ru langa tabu ranga ( ).[b] Muri a prister ge habia a sipsip iea ge a nihabi na rarenga, ge kavitagua a bakovi iea, lakea a naro hale vona bara ni puga vuroki.

17 “A bakovi tara bara i putu puru ruru a vinara ne BAKOVI DAGI, pali i uka ma i lohoka vona, ra bakovi iea i rata a naro hale, bara i tahoka a ngava. 18 Lakea ge bole lakea na prister a tuna sipsip a toga ge gavutuvutu. A prister ge takia i riva a mapana, ge a nihabi na rarenga. Lakea a prister ge kavitagua a bakovi iea na hini i rata ruru a naro hale, lakea a naro hale vona bara ni puga vuroki. 19 Iea a nihabi na rarenga, a vuhuna i rata a naro hale na matane BAKOVI DAGI.”

<- E Levi 4E Levi 6 ->