1 E BAKOVI DAGI i takia e Moses, 2 “O taki e Aron turane huriki e tuna bakovi, ri gi togo a nihabi ni taba e huriki a Israel ri habi nau, ma ri gi vakahalea a ragu. Iau e BAKOVI DAGI, a takia a ngava iea.

3 “Na tahuna a bakovi tara na kabu na prister i muto, nahea ge valai tabukoi na maka nihabi ni taba ne huriki a Israel ri habi nau. A viri ge valai tabukoi, bara lili talea, i uka ma ge leho manga a prister tabu na matagu. Ra vinara iea mu ramai vakaroroa. Iau e BAKOVI DAGI, a takia a ngava iea.

4-5 “Na tahuna a bakovi tara na hamone Aron ge tuvu vona a patala, o ge pori a kume na ngarava vona, nahea ge kani a maki ni kani ni taba, ge matapado taro, muri ge kani. A prister i padoi a podana viri mate, o i padoi a kuvena i maguru tala mule vona, o i padoi a maki ri muto ri karaka viliha, o i padoi a bakovi i muto, i muto na matagu, 6 bara i muto mavonga i harena na malunga liu. Muri ge hilolo kamumu taro na naru, ge kani a nihabi ni habi nau. Ia i uka ma i hilolo, nahea ge kani. 7 Muri na haro i rolo, bara i matapado, ge kani a nihabi ni taba, a vuhuna a maki ni kani ri habi nau, ne vone ria e huriki a prister. 8 Nahea ge kani a bobona sipsip, a bulmakau i mate tavula o i rabalakia a kanirau hateka. Na tahuna i kani a bobona, bara i muto na matagu. Iau e BAKOVI DAGI, a takia a ngava iea.

9 “E huriki a prister ri gi ramai lobo a maka vinara a habi ne ria. Ria i uka ma ri ramai a vinara, bara ri tahoka a ngava, a rabalaki ria. Iau e BAKOVI DAGI, a gamai ria ge ria a prister nau, a takia a ngava iea.

10 “E huriki a bakovi tavula nahea ri gi kani a maka nihabi ni taba. E huriki a mosi, a vora na prister, ngi ranga nahea ri gi kani. 11 Pali a vorakato i konea a prister ge vona, o ni poda na tabeke vona, i kara ge kani a maki ni kani i bole a prister. 12 Bara prister i tahoka e tuna a ngatavine, i parangi a bakovi tavula, i uka ma ia a prister, ra ngatavine iea nahea ge kani a maki ni kani ni gamai. 13 Pali ra ngatavine iea ge mate e girihina o ni pile, i uka e tuna, i hamule lakea ne tamana i made turana, ra ngatavine iea i kara ni kani a maki ni kani na prister. Pali e huriki a bakovi tavula, i uka ma ri gi kania.

14 “A bakovi tavula i kani ruru a maki ni kani ni gamai, ge koli lakea na prister a maki i kani, ge ru langa tabu ranga. 15 E huriki a prister ri gi matadoko, nahea tara bakovi tavula ge kani a maki ni kani ni taba, ma ri gi rata hale a nihabi ne huriki a Israel ri habi ne BAKOVI DAGI. 16 Bara ri mata taroa tara bakovi tavula i kani a maki ni kani ni taba, ra bakovi iea i tahoka a ngava, ge koli a maki ni kani na prister, a vuhuna iau kunana e BAKOVI DAGI a rata ria ri malamala.”

17 E BAKOVI DAGI i takia e Moses, 18 “O taki e Aron, e huriki e tuna, turane huriki a Israel. Na tahuna a bakovi tara ne mua, a mosi tara i made turane mua, i habi a nihabi gutu-vuro ne vona ni vakaloboa tara nita muholi i takia ne BAKOVI DAGI, o na ningaru vona kunana, 19 ge bolea tara bulmakau, a sipsip, o a meme, ge a toga ge gavutuvutu, lakea bara ngarua a nihabi vona. 20 [a]Pali na tahuna i habi nau a maki nabatabuna, bara pile, i uka ma ga ngaru. 21 A bakovi i ngaru ni habi ne BAKOVI DAGI a nihabi na nivalemu ne vona ni vakalobo a nita muholi vona, o ge habi na ni ngaru vona kunana, ge bolea tara sipsip o a bulmakau, ge gavutuvutu. Ia bara i rata mavonga, bara ngarua a nihabi vona. 22 Naha ni habia ne BAKOVI DAGI a sipsip, a bulmakau i kepa, i maputu a vahana, i tekiteki, i tahoka a ngarava. Naha ni habi na dede a kanirau maea, ge a nihabi ni gutu na kanono lakea ne BAKOVI DAGI. 23 Na tahuna mu habi a nihabi na ningaru ne mua kunana, mu bole a sipsip, a bulmakau i laho puru rike, i uka maki. Pali naha ni habi nau a sipsip, a bulmakau maea ge vona a nihabi na nita muholi. I uka ma ga ngarua. 24 Naha ni habi ne BAKOVI DAGI a kanirau ni ratapile a dolena, ni pala a dolena, ni kini momo a dolena, ni rape a dolena. Naha ni ratea a naro iea na tahuna mu made na malala ne mua. 25 Naha ni habi ne BAKOVI DAGI a nihabi na kinani mu bole na mosi. Ra sipsip, a bulmakau maea, i uka ma i kamumu na matagu, i uka ma ga ngaru.”

26 E BAKOVI DAGI i takia e Moses i ta maea, 27 “Na tahuna a tuna bulmakau, a tuna sipsip, a tuna meme ni poda, ge laho turane kinana na parava ge polorua taro. Muri bara mu ngaru, mu bole lakea na dede mu habia, ge a nihabi ni gutu na kanono lakea ne BAKOVI DAGI. Iau bara ngarua. 28 Pali naha ni rabalaki a bulmakau turana e tuna, a sipsip turana e tuna, a meme turana e tuna na parava i taku kunana. 29 Na tahuna mu rata a nihabi mu gu kavurike e BAKOVI DAGI vona, mu ramai a vinara na nihabi bara ngaru a nihabi ne mua. 30 A maka nihabi ni gi kani lobo na parava iea kunana. Naha ni gi ru ranga ni gi kani na hatelanga kuduvi. Iau e BAKOVI DAGI, a takia a ngava iea.

31 “Iau e BAKOVI DAGI a ngaru mua, mu gu longototo mu gu ramai a maka vinara nau. 32 Naha ni vakahalea a ragu. Mua o huriki a kabu ne Israel, a ngaru mua lobo mu gu matakilaka nau a kiripiripi. Iau e BAKOVI DAGI a rata mua mu kiripiripi. 33 A tuli tala mua o Egipto a taparaki valai mua koea, ge iau a Vure ne mua. Iau e BAKOVI DAGI, a takia a ngava iea.”

<- E Levi 21E Levi 23 ->