Link to home pageLanguagesLink to all Bible versions on this site

1 Na tahuna e Iona i made pololilo na kavutuna manu, i vasileki ne BAKOVI DAGI, a Vure vona, 2 i ta maea,

Na naro hale nau, a popote ga mate,
lakea a gale ioe, e BAKOVI DAGI,
o koli mulea a ninana nau.
O longoa a nitangi nau
pololilo liu na lovo ne huriki ri mate.
3 O voro puru iau na utu,
pololilo na dari.
A dari i kavitagu iau,
a bokona dari i rere tagu iau.
4 Muri a ta maea, Ioe o ngalahere nau,
pali muri ma bara matai tabu
a roho ni taba vomu.
5 A dari i kavitagu iau a popote ga mate.
A utu i tabuli halui iau,
a kadola i rako halui a gigu.
6 Polotano na vuhuna lolo,
a pasiri puru,
a puru polotano liu na utu,
a luhoi ta ga made vakaroro na bavi.
Pali ioe o korimule iau na lovo,
ioe e BAKOVI DAGI, a Vure nau.
7 Na tahuna i vurea a matagu,
a longo visi tabu ioe, e BAKOVI DAGI.
A nivasileki nau i bele vomu
na roho ni taba vomu.
8 E huriki ri togo a maka vure tavula ne ria,
ri ngalahere na naro kamumu vomu o ngaru ni vakasiri ria vona.
9 Pali iau ga habi a nihabi vomu,
bara kavurike ioe na linge.
Ra maki a ta muholi vomu vona,
bara rata kamumua.
A nikorimule nau i valai ne BAKOVI DAGI!

10 Muri e BAKOVI DAGI i vakukua a manu, i lua talea na bike e Iona.

<- E Iona 1E Iona 3 ->