1 “A taki muholi mua, a bakovi i uka ma i dili na logo na nure na sipsip, pali i page rike na nure na hini ranga, i dili, ra bakovi iea a panaho, a mari­kau. 2 Pali a tahona sipsip i dili kamumu na logo. 3 A tagari i tala purua a logo, lakea a tahona sipsip i dili, i gale a rana maka sipsip, ri longo mai ia. I gale ria na rane ria takutaku, muri i me tala ria. 4 Na tahuna i me tala lobo a maka sipsip vona, i muga ria. A maka sipsip ri muri maia, a vuhuna ri longo­kilalea a lohona. 5 A maka sipsip i uka ma ri gi muri mai a viri i uka ma ri burongi kilalea. I muholi ngi bara ri ha na tahuna i gale ria, a vuhuna i uka ma ri longokilalea a lohona.” 6 E Isu i ta vaka­kika ne ria, pali ria i uka ma ri longo­kilala a ngava i taki ne ria.

7 Lakea e Isu i taki tabu ria, i ta maea, “A taki muholi mua, iau a logo na nure na sipsip. 8 [a]E huriki ri valai muga nau, ria a panaho, a marikau. Pali e huriki a sipsip i uka ma ri longo mai ria. 9 Iau a logo. E huriki ri dili valai nau bara ri mahuri. Bara ri dili pori na ningaru ne ria. Bara ri matavisi a maki ni kani. 10 A bakovi ni panaho i valai kunana ni panaho, ni ratapile, ni rabalaki a maka sipsip. Pali iau a valai ga habi a nimahuri. Ra nimahuri iea, i uka harena.

11 [b]“Iau a matakari kamumu na sipsip. A matakari kamumu bara i mate ni mata­kari a maka sipsip vona. 12 [c]A viri i leho ni gi kona i uka ma ia a tahona sipsip. Na tahuna i masia a kaugara i valai, bara i pe mule a maka sipsip, i ha ia. Muri a kaugara bara i valai, i lili viliha a kabuna sipsip. 13 Ra bakovi ni kona i ha, a vuhuna ia a bakovi i leho kunana ge bole a moni. I uka ma i luhoi a maka sipsip.

14 “Iau a matakari kamumu na sipsip, a maka sipsip nau ri lohoka nau. Iau tara a lohoka ne ria. 15 [d]I manga a hini a lohoka ne Tata, e Tata tara i lohoka nau. Iau ga mate ni korimule a maka sipsip nau. 16 [e]Iau a tahoka tabu ranga sipsip i uka ma ri dili ma na nure. Ria ranga ga bole dili ria na nure, ri gi longokilalea a lohogu, ge taku kunana a kabuna sipsip. A matakari ne ria tara ge taku kunana. 17 [f]E Tata i ngaru iau, a vuhuna ga mate na murine huriki a sipsip. Muri ga mahuri mule tabu. 18 I uka tara viri ge vakamate iau. Iau kunana ga mate na ningaru nau. Iau a tahoka a nitora ni mate. Iau a tahoka a nitora ni pesi rike mule na matenga. E Tata i taki iau ga rata mavonga.”

19 Pali na ngava iea kunana e huriki a Iuda ri vagege lae tabu. 20 E huriki ala kupo ri ta maea, “I manga. I dili vona a hanitu. I navai si gi longo maia?”

21 Pali i ranga e huriki ri ta maea, “A nitana i uka ma i manga a nitana bakovi i dili vona a hanitu. Pali a hanitu, i kara ge vakamatapara a kepa?”

22 Na tahuna na malangia, ni rata a Habu na Nigamai[g] o Ierusalem. 23 E Isu i lokovonga i laho pololilo na roho na Vure na tabeke ni gale a talele ne Solomon. 24 Lakea e huriki a Iuda ri vapopo haluia, ri nanea, “Ra mia, mi dava paru hosi. Garika go vakalongo mia ne vomu, ge ioe e rei muholi? Pali ioe ge ioe e Kristo, o ta kavakava ne mia ngane.”

25 E Isu i koli, i ta maea, “A taki mua pali. Pali i uka ma mu longo mai a ngavagu. A maka nivakasiri a rata na rane Tata ri vakasiri iau e rei. 26 Pali i uka ma mu luhoi tora iau, a vuhuna i uka ma mua a sipsip nau. 27 A sipsip nau ri longo­kilala a lohogu. Iau a lohoka ne ria, ri muri nau. 28 [h]A habi ne ria a nima­huri vakaroro, i uka ma ri gi mate. I uka tara viri ge kini paru ria na limagu. 29 E Tata, ra i habi ria nau, i dagi hateka ne huriki lobo. I uka tara viri ge bole tala ria na limane Tata. 30 Maria e Tata miri palupulupu.”

31 Muri e huriki a Iuda ri bole rike tabu a maka kedo, ta ri gi padimatea. 32 Pali e Isu i taki ria, “A vakasiri mua vona pali a nivakasiri dagi i kupo ri valai ne Tata. Pali e rei a maka nivakasiri mu gu padi­mate iau vona?”

33 [i]E huriki a Iuda ri koli, ri ta maea, “I uka ma mi gi padi ioe na kedo vona a maka nivakasiri ngi. Mi gi padi ioe a vuhuna o ta hale hateka na Vure. O taki ioe ta ioe a Vure. Pali ioe a bakovi tavula kunana.”

34 [j]E Isu i koli, i ta maea, “A ngava ni here na vinara ne mua, a Vure i ta maea, ‘Mua e huriki a vure.’ 35 Si lohoka vona, a ngava i taki a hinere, i uka ma i mapulo lae, i tabuli vakaroro. Re huriki a bakovi a Vure i habi a ngava vona ne ria, i taki ria, ta ria e huriki a vure. 36 Pali iau, e Tata i vulaki iau, i rudu iau a valai koea na malala. Pali i navai mu taki iau, ta a ta hale hateka na Vure na tahuna a taki iau, iau a Tuna Vure? 37 Bara iau i uka ma a rata a leho ne Tata, naha ni longo mai iau. 38 [k]Pali bara iau a rata a leho ne Tata, pali mu koi ni luhoi iau, a ngaru mu gu luhoi a maka niva­kasiri a rata. Muri bara mu matakilalea e Tata i made turagu, iau a made turane Tata.” 39 I mavonga ri toni tabu ni lakavua, pali i uka ma ri lakavu visia.

40 [l]Muri e Isu i hamule, i tulu poloa a naru e Iordan, i made na tabeke e Ioanes i vahilolo e huriki vona muga. 41 E huriki ri ala kupo ri valai vona ri ta maea, “E Ioanes i uka ma i rata ranga a nivakasiri, pali a ngava i taki virihi a bakovi iea vona i muholi.” 42 Na tahuna e Isu i made na tanga iea, i kupo e huriki ri luhoi torea.

<- E Ioanes 9E Ioanes 11 ->