Hibru 6

1 I mavonga, a ngaru mu gu lobo ni bole a nitovo manga a koma kiroko. A ngaru mu gu koru rike, mu gu paki. Mu gu lobo ni bole vakaroro a nitovo na vuhuna ngava ne Kristo, ra nitovo manga e huriki ri gi pulo a vilone ria, ri gi pe a naro hale ne ria, ri gi luhoi torea a Vure. 2 Nahea mu gu hamule tabu mai a nitovo na nivahilolo, a naro ni ru langa a limana viri, a nitovo na nipesi rike mule na matenga, a nitovo ne huriki ri gi pesi na matana Vure ge pelekado ria, ri gi vurua vakaroro. 3 A Vure ge ngaru, bara tovo mua ngane na nitovo na viri i dagi, i paki pali. 4-6 *Hib 10:26-27; 1Ion 5:16A viri i luhoi tora mugea e Kristo, pali i ngalahere vona, i uka ma ge pulo tabu a vilona. A viri a Vure i vakapalalea pali, i masia a maki kamumu a Vure i vakaparu ia vona i namika hateka, i bole a Hanuna Vure turane hita, i namika pali a nitana Vure, i hataki pali a nitora na Harikianga na Vure, ra ge valai muri ma, pali muri i ngalahere na Vure, i manga i padi tata tabua a Tuna Vure na kai tavalavala, i rata e huriki ri biua a Tuna Vure.

7 A vala i boru, i vakamea a malala. A malala i vakabele kamumu a maki ni kani na viri i varo vonga, a Vure bara i vakabagetua a malala iea. 8 *Vuh 3:17-18; Mat 13:7,22Pali a malala ge vakabele kunana a mota padipadi, a kukuni madaro, ra malala iea i hale. I uka ma ge tabaka, a Vure bara i rudurahea a malala iea. Muri ma ge gutu parinea na kanono.

9 Mua o huriki a turagu, mete ta tora hateka, pali mete lohoka vona a maka maki i kamumu hateka ri gi bele ne mua, a kanena hini a Vure i korimule pali mua. 10 *Hib 10:32-34Mu leho tora vakaroro ni kori e huriki a tara na Vure. Mu vakasiri manga mu ngarua a Vure. I uka ma ge mata kepa vona a Vure, a vuhuna a narona i kiripiripi kunana. 11 A ngaru mua lobo mu gu leho tora mavonga, mu gu lohoka vona i muholi a maki mu pasimata vona, ge vano, ge harena na tahuna mu bolea. 12 Naha ni malai. Mu muri mai a narone huriki ri luhoi tora, ri hatenono, ri bole a maki i ta muholi muga vona a Vure ge habi ne huriki e tuna.

A Vure i Uka Ma i Tatami Kilala

13 *Hosi a Vure i rata a ngava dagi turane Abraham. Pali a Vure, ge kaba navai? I uka tara viri ge dagi hateka na Vure, ge kurahi a rana. Lakea i kaba mule na rana, 14 i ta maea, “I muholi hateka, ga gamai ioe, ga rata e huriki a hamomu ri gi bele kupo hateka.” 15 Lakea e Abraham i dava, i hatenono. Muri i bele a maki a Vure i ta muholi vona ge bele. 16 Na tahuna a bakovi i ngaru ni kaba, bara i kurahi a rana viri tara i tahoka a rana. A bakovi i kaba i vakatora a nitana, i vakavulai e huriki ri ngaru ni hehe a nitana. 17 I mavonga, na tahuna a Vure i ta muholi hosi ge rata kamumu hita e huriki a hamone Abraham, i ngaru ni vakasiri kamumu hita, i uka ma ge puloa a ngavana, lakea i kaba ge vakatorea a nitana. 18 *A Vure i ta muholi, i kaba. A Vure tara, i keri ni tatami. I mavonga, hita e huriki si ha lakea na Vure ge matakari hita, si gi pesi tora, si gi pasimata ni bole a maki i ta muholi vona si gi bolea. 19 *Ra maki a Vure i taki hita si gi pasimata vona, i rata hita si pesi tata, i manga a vago ni hori a aga vona, i ratea a aga i pasi na tabeke i taku kunana. I tuli hita si bele na matana Vure, i manga a prister dagi hosi ri dili na Tabeke Nitaba Hateka, na bitona lavalava dagi ni topi rike na roho na Vure. 20 E Isu i bele manga a prister dagi i manga e Melkisadek hosi. Ngane i muga ne hita pali, i bele na matana Vure.

<- Hibru 5 Hibru 7 ->