1 E Iakop i made na malala e Kenan, hosi e tamana i made vona. 2 Iea ngane a nitane Iakop:

E Iosep a riau i tahoka a pida i ravulu a polona i polorua (17). I tuhori e huriki e tukana ni matakari a kabuna sipsip. E huriki e tukana nga, e tune Bila rua e Silpa, e girihine Iakop varago. E tukana mai bara ri rata a naro hale, e Iosep bara i vano i taki tala ne tamana.

3 E Israel i ngaru hatekea e Iosep ne huriki e tuna bakovi lobo, a vuhuna i podea e kinana na tahuna e Iakop i gare. Lakea e Iakop i ratea a varakia mageregere i habia vona. 4 Na tahuna e huriki e tukana ri masia e tamane ria i ngaru hatekea e Iosep, ri tepua, i uka ma ri rata kamumua.

5 Na parava tara e Iosep i vurena, i tuvereia ne tukana mai a vurena. Na tahuna e huriki e tukana ri longoa, i madihi hateka a hatene ria. 6 E Iosep i taki ria, “Mu longoa a vuregu, ga tuvereia. 7 Na tahuna si rotu a galesi na vit na hania, a galesi nau i pesi tamoro. Pali a galesi ne mua ri pesi haluia, ri lolu puru maia.”

8 Na tahuna e tukana mai ri longoa, ri nanea, “Ioe o luhoi ge ioe a matakari ne mia? Ioe o ngaru mia mi gi longototo a ngavamu?”

Lakea ri tepu hatekea vona a nuverei na vurena.

9 Muri i vurena tabu, i tuverei poloa ne tukana mai a vurena, i ta maea, “Mu longo valai, iau a vurena tabu, a vurena vona a haro, a keva, a hada i ravulu a polona i taku ri lolu puru ma iau.”

10 I tuvereia ne tamana, e huriki e tukana ra vurena, lakea e tamana i tahatea, i ta maea, “O vurena navai ke? Ioe o ngaru e kinamu, iau, e tukamu mai, mi gi lolu puru na ngalamu?” 11 [a]I madihi a hatene ria e huriki e tukana, pali e tamana i luhoi kado kunanea a vurene Iosep.

12 Na parava tara, e huriki e tukane Iosep ri vano ri matakari a kabuna sipsip tabukoi o Sekem. 13 Lakea e Israel i takia e Iosep, “Ioe o lohoka vona a hini i matakari a sipsip vona e huriki e tukamu tabukoi o Sekem? O vano, o lokovonga mai ria.” E Iosep i koli mule i ta maea, “A lohoka vona.”

14 Lakea i takia, “O vano o gosi e huriki e tukamu, o vakarakoli a maka kabu na sipsip, muri o hamule, o vakalongo iau.”

E Israel, turana e huriki a kabu vona, ri made na maloku ne Hebron, i rudu talea vonga e Iosep. Na tahuna e Iosep i bele o Sekem, 15 a bakovi tara i matavisia i laho viliha vonga i nanea, “A ra o matakanea?”

16 I ta maea ia, “Iau a matakana e huriki e tukagu. O vakalongo iau vona a hini ri matakari a kabuna sipsip vona.”

17 Lakea a bakovi i ta maea, “Ri mariu pali koea. A longo ria ri taki ni lakea o Dotan.”

Lakea e Iosep i muri mai ria, i luve taho ria tabukoi o Dotan.

18 E huriki e tukana mai ri masia i laho valai, ri varodo a ngava ri gi rabalakia. 19 Ri varodo a ngava, ri ta maea, “Mata lakea. I valai ngane a koma na nivurena. 20 Mu valai, si gi rabalakia, si gi voro purua na lovo a podana. Muri bara si taki ta a livoa hateka i rabalakia. Muri si gi masia a ra maki ge bele vona a vurena.”

21 Na tahuna e Reuben i longoa, i ngaru ni koria e Iosep, lakea i ta maea, “Nahea si gi rabalakia, 22 si gi vakatua a darana. Si gi voro puru kunanea koea na lovo na tabeke i ngeki.” E Reuben i ta mavonga, a vuhuna i ngaru ge koria e Iosep, ge tuli hamulea ne tamana. 23 Na tahuna e Iosep i luve taho ria, ri lakavua, ri kali talea a varakia rengerenge vona. 24 Ri bolea, ri voro purua na lovo i uka naru. 25 Na tahuna ri made puru, ri gi kani, ri matai e huriki a Ismael ri valai o Giliat, ri gi puru o Egipto. Ri vakarike na maka kamel ne ria a mahala kamumu: a maki ni kani manginoro, a marasin ni bole na kai, a nibiri mangisipa.

26 Lakea e Iuda i taki e huriki e turana, “A ra maki kamumu vona si gi rabalaki kapilohoa e tarine hita? 27 Mu valai, si gi habia ne huriki a Ismael, ri gi konea. Nahea si gi rabalakia, a vuhuna ia e tarine hita muholi.” Lakea ri longototoa.

28 [b]E huriki a Midian,[c] a tara na ni vangoli a mahala, ri valai, ri laho polo. Ri matai e huriki e turana ri lalu rikea na lovo, ri habia ne huriki a Ismael, ri konea e Iosep na kedo silva i ravulu rua, muri ri bole lakea o Egipto.

29 Na tahuna e Reuben i hamule lakea na lovo, i uka ma i masia e Iosep, lakea i rapea a varakia vona. 30 I hamule lakea ne huriki e tarina i ta maea, “E Iosep, i uka ma ia na lovo! Ga navai iau?”

31 Lakea, ri rabalakia tara meme, ri bole a darana, ri ravu na varakia e Iosep. 32 Muri ri bole lakea ne tamane ria a varakia rengerenge, ri ta maea, “A varakia iea mi matavisia. O matai kamumua, ma ge ne tumu e Iosep.”

33 E Iakop i matakilalea a varakia, lakea i ta maea, “Muholi hateka! A varakia ne tugu e Iosep. A livoa hateka tara i rabalakia, i kararapea e Iosep.”

34 Muri, i rapea a varakia vona, i rodo a varakia nikalo, i taringia na parava i kupo e tuna. 35 E huriki e tuna bakovi, e tuna ngatavine ri valai, ri gi lukea, pali i koi ne ria ri gi lukea, i taki ria, “Naha ni luke mule iau. Ga tangi tangi, ga mate, ga muri mai e tugu.” Lakea e Iakop i tangi mavonga.

36 Na tahuna e huriki a Midian ri bele o Egipto ri habia ne Potipar e Iosep, i konea. E Potipar a bolekori ne Parao, a ubu na tagari vona.

<- A Vuhuna 36A Vuhuna 38 ->