1 E Iakop tara i vano mai a hini ge lakea vona, lakea e huriki a agelo na Vure ri bele vona. 2 E Iakop i matai ria, i ta maea, “Ra hini nga a mada na Vure.” Lakea i vunua a tanga iea e Mahanaim.

3 E Iakop i rudu muga e huriki a vinuru ri gi vakalongoa e tukana e Esau i made o Seir, na robo e Idom. 4 I taki e huriki a vinuru vona ri gi vakalongoa a matakari ne ria, e Esau, ri gi ta maea, ‘A vora vomu e Iakop ta ge vakalongo ioe vona a hini i made turane Leban, pali ngane i ngaru ni hamule valai vomu. 5 I tahoka a maka kabu na bulmakau, a donki, a sipsip, a meme, a vora bakovi, a vora ngatavine. I rudu valai a ngava vomu, ioe a matakari vona, ta go rata a naro kamumu vona.’ ”

6 Ri hamule valai ne Iakop, ri ta maea, “Mi lakea ne tukamu e Esau, mi vakalongoa pali. Ngane ge muri valai turana e huriki a tara vona ri ala 400, ri gi tagui ioe.”

7 E Iakop i mangenge, i loho lege lae, i vakalipida na tete i rua a tara vona. A maka kabuna sipsip, a meme, a bulmakau, a kamel ngi ranga i vakalipida na tete i rua. 8 E Iakop i luhoi maea, “E Esau bara i valai, i vaubi turana a tete tara, a tete i uka ma i vaubi bara i ha.”

9 Muri e Iakop i vasileki, i ta maea, “O Vure ne sisi e Abraham, ne tata e Isak. BAKOVI DAGI ioe a viri o taki iau ga hamule lakea na viri nau, na robo nau, go vakamade kamumu iau. 10 Iau a vora vomu, i uka ma i kamumu a vilogu, pali ioe o dodo iau, o rata a naro kamumu nau. Hosi a pagepolo na naru dagi e Iordan turana a kodo nau kunana, pali ngane a tahoka a tara i rua. 11 A vasileki vomu, o kori iau na limane turagu e Esau, a vuhuna a mangenge vona, ma ge valai, ge vaubi turagu turane huriki a ngatavine e tune ria. 12 *Vuh 22:17Pali ioe o ta maea, ‘Muholi iau ga vakamade kamumu ioe, ga rata e huriki a hamomu ri gi bele kupo manga a hire na dari, bara ni keri ni gi.’ ”

13 I mahita vonga vona a rodo iea, pali i pelekado a maka maki i bole a maka mahala ge habi ne turana e Esau. 14 Lakea i ru palupu a kinana meme i 200, a meme a toga i ravulu rua, a kinana sipsip i 200, a sipsip a toga i ravulu rua, 15 a kinana a kamel i ravulu tolu turana tuna, a kinana bulmakau i ravulu va, a bulmakau a toga i ravulu, a donki a kinana i ravulu rua, a donki a toga i ravulu. 16 I taki e huriki a vora vona ri matakari a maka kabuna sipsip a bulmakau takutaku, i ta maea, “Mu laho muga. Naha ni vakalaho palupu a maka kabuna sipsip a bulmakau.”

17 Lakea e Iakop i takia a vora i laho muga, “E tukagu e Esau, ge tagui ioe, ge nana ranga, ‘Ioe o leho ne rei? I vai a tanga go lakea vona? A sipsip a bulmakau ne rei ra ri laho na ngalamu?’ 18 Pali o takia, o ta maea, ‘A maka sipsip a bulmakau nga, ne vona a vora vomu, e Iakop. A maka sipsip a bulmakau nga ge habi vomu, ioe a bakovi dagi vona. Ia ge muri valai.’ ”

19 E Iakop i taki tabu a ruana, a toluna vora, e huriki a vora lobo ri matakaria a kabuna sipsip a bulmakau, i ta maea, “Na tahuna mu taguia e Esau, mu takia a ngava ge palupulupu kunana. 20 Mu ta tora vona a ngava, ‘A vora vomu e Iakop i muri valai.’ ” A vuhuna e Iakop i luhoi maea, “Na naro iea kunana bara luke mulea e Esau na maka mahala a vakaru muga, lakea na tahuna miri vakorokoro, bara i rata kamumu iau.” 21 Lakea e Iakop i vakaru muga a maka mahala vona, i mahita vonga na mada ia.

22 Na rodo iea, e Iakop i bole e girihina rua, a vora ngatavine vona ala rua, turana e tuna mai ala ravulu a polona i taku, ri pagepoloa a naru e Iabok. 23 I rudu muga ria turana a maka maki lobo vona. 24 *Hos 12:3-4Pali ia kikeri i made mule. I bele tahoa tara bakovi ru valoi mavonga na rodo, i palala taho rua a hini. 25 Na tahuna ru valoi, a bakovi i keri ni vakaborua e Iakop, lakea i ubi a labune Iakop, i maparu a tagana. 26 Muri i ta maea a bakovi, “O taparaki iau ga vano. I palala pali a hini.”

E Iakop i koli mule, i ta maea, “O gamai taro iau, muri o vano ke.”

27 Lakea a bakovi i nanea, “E rei a ramu?”

I koli mule, i ta maea, “A ragu e Iakop.”

28 *Vuh 35:10Muri a bakovi i ta maea, “A ramu ngane i uka ma ge Iakop tabu. A ramu ngane ni gi gale ge Israel, a vuhuna o valoi turana Vure, o valoi turana e huriki a bakovi, o rangi ria pali.”

29 *Het 13:17-18Lakea e Iakop i takia, “O taki iau vona a ramu!”

A bakovi i koli, i ta maea, “I navai o nana vona a ragu?”

Muri i gamaia e Iakop. 30 Lakea, e Iakop i galea ra mada iea e Peniel,*‘Peniel’ na nita Hibru i manga ‘a matana Vure.’ muri i ta maea, “A masia pali a matana Vure, pali i uka ma a mate.”

31 Na tahuna i pea e Penuel a haro i hera pali, i kodo a vuhuna i maparu a tagana. 32 Na tahuna iea, i valai mona, e huriki a kabu ne Israel i uka ma ri kani kilala a pona sipsip a bulmakau. Ri ramaia a vilo iea, a vuhuna a Vure i ubia a labune Iakop, i maparu a tagana.

<- A Vuhuna 31A Vuhuna 33 ->