1 Ngane a bakovi tara na kabu ne Levi i parangi vona a ngatavine, ia tara a kabu ne Levi. 2 [a]Muri a ngatavine i singou i podea a koma bakovi. E kinana i masia i mata kamumu hateka, lakea i ruhuloloa na keva i tolu. 3 Na tahuna a koma i kulabo, e kinana i keri ni ruhuloloa. Muri e kinana i vaia na pagana gili a kulopi, i pipi karia na kasita, i vakamahitea vona a koma, i ruhuloloa na ganu na dahana naru e Nail. 4 E kurabana koma i pesi basi popote, i matanonoa a a ra maki ge bele vona.
5 I uka ma i tabaka, i masia e tune Parao ngatavine i valai turane huriki a vora ngatavine vona, ge hilolo. Na tahuna i hilolo, e huriki a vora ngatavine vona ri laho viliha na dahana naru, ri davea. Lakea e tune Parao i masia a kulopi i papasi na naru pololilo na ganu, i rudua a vora vona ge bole vilia. 6 Na tahuna i avea a kulopi, i masia a koma bakovi i mahita pololilo na kulopi, i tatangi. Lakea i dodoa i ta maea, “Ra koma iea a tuna Hibru.”
7 Muri e kurabana i valai i takia e tune Parao, “Ioe o ngaru, ga vano ga takia tara ngatavine na Hibru ge matakaria vomu a koma.”
8 Lakea e tune Parao i ta maea, “I kamumu. O vano o takia tara ngatavine ge valai.” Lakea e kurabana i vano i takia e kinana muholi, i valai.
9 Na tahuna e kinana i valai, lakea e tune Parao i takia, “O bokea a koma, o matakaria ge ne nau, muri ga kona ioe.” Lakea e kinana i bokea, i vakarurua, i matakaria. 10 [b]Na tahuna a koma i koru rike, e kinana i boko lakea ne tune Parao i paua ge tuna. Muri i ta maea, “Ra koma iea i papasi na naru, a matavisia. Ngane a vunua a rana e Moses.”[c]
11 [d] [~5~]Na tahuna e Moses i koru rike pali, i vano i matai e huriki a viri vona ni vakavora hateka. I masia tara Egipto i ubi halea tara Hibru. 12 I mata lae, i uka ma i masia tara viri ge pesi tabukoi, lakea i rabalakia a bakovi o Egipto, i tanua na hire.
13 Na parava muri e Moses i hamule tabu i matai a Hibru ala rua ru vaubi. Lakea i takia a viri i vakatubu a vabinga, “I navai o ubia e turamu?” 14 A bakovi i koli, i ta maea, “E rei i ru ioe ge ioe a matakari, go pelekado a narone mia? I navai, o luhoi ni rabalaki iau, ge manga a hini o rabalakia a bakovi o Egipto ravi?” Na tahuna e Moses i longoa a ngava iea i mangenge, i luhoi maea, “E huriki ri lohoka vona pali a naro a ratea.”
15 [~6~]Na tahuna e Parao i longoa a naro i ratea e Moses, i madihi a hatena, i ngaru ni rabalakia. Muri e Moses i ha lakea na robo ne huriki a Midian. Na tahuna i bele vonga i made na dahana lomu. 16 Na robo iea i tahoka tara prister. I tahoka e tuna ngatavine ala polorua. E Moses i made na dahana lomu i matai e huriki a ngatavine nga ri valai ri gi kiru a maka buroi[~7~] ne ria, ri gi vakaninu a kabuna sipsip, a meme ne tamane ria. 17 Pali i ranga matakari na sipsip ri valai, ri tono tala e huriki a ngatavine nga. Lakea e Moses i hateka ne huriki a ngatavine, i lili e huriki a bakovi, i vakaninu a maka sipsip, a meme ne ria. 18 Na tahuna ri hamule, e tamane ria e Ietro[~8~] i nana, “I navai mu hamule malaviriri?”
19 Ri koli ri ta maea, “A bakovi o Egipto tara i tuhori mia, lakea e huriki a tahona sipsip i uka ma ri valili ne mia. Muri i vakaninu a sipsip a meme ne mia.” 20 Lakea e tamane ria i nana, “Ra bakovi iea i made vai? I navai mu pe ia vonga? Mu vano mu takia ge valai ge kani turane hita.” Muri ri vano ri takia e Moses, i valai.
21 E Ietro i ngarua e Moses ge made turana. Lakea i habia ne Moses e tuna, e Sipora, i parangi vona. 22 Muri e Sipora i singou i podea a koma bakovi. Lakea e Moses i taki mule ia i ta maea, “Iau a mosi a made vona a tanga iea. Ngane ga vunua a koma iea e Gersom.”[~9~]
23 Na pida nga, e Moses i made o Midian, a hariki o Egipto i mate. E huriki a Egipto ri vakavora hateka e huriki a Israel, lakea ri dedo, ri tangi, ri nanea a Vure ge tuhori ria. 24 [~10~]A Vure i longoa a nitangi ne ria, i luhoi a ngava dagi i takia ne Abraham ne Isak ne Iakop. 25 Lakea a Vure i matai e huriki a Israel ri made hale hateka, i luhoi hateka ria.
<- A Nimariu 1A Nimariu 3 ->