4
Hita a Viri ala Taku ne Kristo
1 [a]I mavonga, iau a nana mua, ra iau ni ru dili na bavi a vuhuna a rata a leho ne Bakovi Dagi. A nana tora mua mu gu laho na naro i karea a naro a Vure i gale mua mu gu laho vona.
2 [b]Mu vakakiroko mua. Mu made madoru turana e huriki. Mu hatenono ne huriki, mu vangaru.
3 [c]Mu toni a bulune mua ni pesi taku na Hanu Kiripiripi. Mu made na nivalemu, bara mu manga a viri ala taku kunana.
4 Hita e huriki a tara na Vure, si manga a kakaina viri i taku kunana. A Hanuna Vure i taku kunana, i manga kunana a Vure i gale mua mu gu pasimata vona a maki ge bele muri ma.
5 A Bakovi Dagi i taku kunana. A naro ni luhoi tora i taku kunana. A hilova i taku kunana.
6 [d]A Vure i taku kunana, re Tamane hita lobo. I matakari e huriki a viri vona, i rata a leho ne huriki vona, i made turane ria.
7 [e]Pali e Kristo i habi ne hita takutaku a leho si gi rata, i ramai a ningaru vona. 8 [f]I mavonga ni here maea,
“Na tahuna i sike meli,
i turari e huriki i lakavu ria.
I habi na tara vona a maka mahala.”
9 [g]Na tahuna a Hinere i ta maea, “I sike meli,” i navai a pelegona? A pelegona i maea: I uka ma i sike kunana. I puru tabu na bobona malala.
10 A viri i puru valai, ia kunana a viri i sike meli liu, polomeli na hunu, ge made na tabeke lobo.
11 [h]Ia kunana a viri i rata e huriki ranga, ge ria a apostolo, e huriki ranga ge ria a propet, e huriki ranga ri gi vakalongo a Velenga Kamumu, e huriki ranga ri gi matakari e huriki a tara na Vure, e huriki ranga ri gi tovo.
12 I rata mavonga, ri gi kisi e huriki a tara na Vure ni rata a leho, a kakaine Kristo ge bele tora.
13 [i]Ge mavonga ge vano ge harena na tahuna hita lobo si pesi taku na niluhoi tora, si pesi taku na lohokanga na Tuna Vure, si gi moro manga a bakovi dagi, si gi bele manga liu e Kristo.
14 Muri i uka ma si gi vilikoma tabu. A maka nitovo karaba legelege i uka ma ri gi kule lae hita manga a aga, i kule laea a vilu, a bokona dari. Na tahuna e huriki ri ngaru ni tami hita na nita taminga ne ria, i nangi manga a ngava muholi, i uka ma si gi longo mai.
15 [j]Pali si gi ta muholi ne huriki, a vuhuna si ngaru ria. Na tahuna si rata mavonga, bara si bele manga e Kristo na naro lobo, ra viri i muga ne hita lobo.
16 E Kristo i muga ne hita, i nugu tata lobo e huriki a tara vona, i manga kunana a ruana viri i nugu tata a maka tabekena lobo. A tabeke takutaku i rata a leho vona kunana, i ratea a kakaina viri i koru, i tora. I manga kunana e huriki lobo ri gi ngaru a turane ria, ri gi pesi taku, bara a kakaine ria i taku ne Kristo.
A Nimahuri Karaba
17 [k]Na rane Bakovi Dagi, ngane ga taki mua, naha ni laho tabu manga e huriki a bakovi na uvo. A niluhoi ne ria i varoru.
18 I uvo a gine ria. Ri marava basi na nimahuri i valai na Vure, a vuhuna i uka ma ri lohoka. Ri putu ngingi.
19 Ri uka a nimaruhu. Ri habi lakea ria na naro na molenga, ri ngaru hateka ni rata a maka naro katoki.
20 A naro nga i uka ma ri ramai a nitovo ne Kristo!
21 A vuhuna mu longo pali a nuverei ne Isu, ni tovo mua vona a nita muholi i valai vona,
22 [l]ngane mu vuroki a vilo hale hosi ne mua, a nilaho hosi ne mua, ra i mavuru na maka ningaru na taminga.
23 [m]A Hanuna Vure ge habi a niluhoi karaba ne mua,
24 [n]lakea mu bole a vilo karaba, ra vilo manga a vilona Vure, a vilo kiripiripi, i malamala muholi.
25 [o]Mu ha taro pali a taminga. I mavonga, mua takutaku mu ta muholi ne huriki a turane mua, a vuhuna si manga a kakaina viri ala taku kunana. 26 [p]Na tahuna i madihi a hatene mua, naha ni rata a naro hale. A rongova ne mua ge lobo muga na haro ge rolo. 27 Naha ni kado a dala na hanitu. 28 A panaho, nahea ge panaho tabu. Ge leho tora na limana, ge tahoka a maki ni habi ne huriki a matasia ranga. 29 [q]Nahea a ngava hale ge pagitala na ngavane mua. A ngava mu gu taki kunana, a ngava kamumu ni tuhori, ni vakabagetu e huriki ri talangaki. 30 [r]Naha ni ratea a Hanu Kiripiripi na Vure ge dodo, a vuhuna ia a kilakila ni ru ne mua, i vakasiri manga muri ma a Vure ge konamule mua. 31 [s]Mu lobo liu ni vagima, ni hate madihi, ni ngava dagi lae, ni padi kidu. Ge lobo liu a rongova ne mua, mu lobo ni rata a naro hale lobo. 32 [t]Mu valemu kamumu, mu vadodo, mu valongo kaburungi a naro hale, i manga kunana a Vure i puga vuroki a naro hale ne mua na leho e Kristo i ratea.
<- Epesus 3Epesus 5 ->
