1 [a]E Moses i ta tabu i ta maea, “Na tahuna mu masia tara bulmakau o a sipsip ne turane mua tara i puka a nure, i pagitala i laho viliha, naha ni matataroa ge laho viliha mavonga. Mu bolea ge hamule na tahona. 2 A tanga na tahona sipsip a bulmakau ge basi, o i uka ma mu lohoka vona a tahona, mu bole lakea na tanga ne mua a sipsip a bulmakau. Muri na tahuna a tahona i matakanea ge valai, mu habia vona. 3 Na tahuna mu matavisia a donki, a kala, a maki tara ni pe, a naro mu ramaia ge maea kunana.

4 “Na tahuna mu masia a donki o a bulmakau ne turane mua i boru puru na dala, naha ni matataroa ge tabuli mavonga, mu tuhoria e turane mua mu tuli pesia a donki vona.

5 “E huriki a ngatavine nahea ri gi rodo a padirodo na bakovi. E huriki a bakovi nahea ri gi rodo a nirodo na ngatavine. E BAKOVI DAGI a Vure ne mua i marikoi ni matai a naro i muma maea.

6 “Na tahuna mu masia tara nuna kadirovo i tabuli na kai o na malala, a kinana i pasike langa na tuna i tutu poda o i uka ma i tutupoda ma, naha ni lakavu a kinana turana a tuna. 7 Mua mu ngaru, mu bole a maka tuna. Pali a kinana naha ni lakavua, ge vano. Mu rata mavonga bara mu made tabaka vona a malala iea, e BAKOVI DAGI bara i habi a maki i kupo ne mua.

8 “Na tahuna mu rata a ruma karaba mu tura halui a gagana na mapana ruma na mota, ma ge boru puru na malala tara bakovi ge mate, bara ioe a vuhuna ke.

9 [b] “Naha ni varo na hania na vain a vutuna maki ranga. Mua bara mu varo a vutuna maki ranga vonga, naha ni pasi a kanena vain, naha ni bole a maka maki ni varo vonga, a vuhuna ri muto.

10 “Naha ni kolotata palupu na aen a bulmakau turana a donki ru gu due a malala na hania.

11 “Naha ni rodo a nirodo ni rata na vuna sipsip turana a hotu-silka.

12 [c] “Mu bole a maki ge panga, mu rahi dili na nimodo i va na nirodo ne mua.

13 “Na tahuna a bakovi i parangi vona tara ngatavine, i mahita turana, muri i pilea, 14 i ta hale maia, i vakahale a rana i ta maea, ‘Na tahuna a parangi vona a ngatavine a hatakia i mahita turana a bakovi tara pali.’ 15 A bakovi i rata maea a ngava, e tamana e kinana a ngatavine ru gu bolea a maki ge vakasiri ria, ra ngatavine iea i uka ma i mahita turana tara bakovi. Ru gu bole lakea na dilidala na tanga, ru gu vakasiria ne huriki a matakari. 16 E tamana ngatavine ge taki e huriki a matakari ge ta maea, ‘A habia na bakovi iea e tugu i parangi vona. Pali ngane i pilea. 17 A bakovi iea i tatami i ta maea, “A mahita turana a ngatavine iea, a hatakia i mahita turana a bakovi tara hosi.” Pali mu masia a kala iea ge vakasiri hita, e tune maria i uka ma i mahita turana muga tara bakovi.’ Muri ge ru purua na malala na ngalane huriki a gare a kala. 18 E huriki a gare ri gi bole a lebo, ri gi lagua e girihina ngatavine iea. 19 Muri ge konea a ngava i rata tavulea na moni silva i ravulu mule ma murina balaka taku (100). A moni ni gi habi ne tamana ngatavine, a vuhuna i vakamaruhua a sirula ne Israel. Ra ngatavine iea ge made liu, ge girihina ge harena na tahuna i mate.

20 “Pali bara ngava iea ge muholi i uka maki ni gi vakasiri a ngatavine i made malamala, 21 e huriki a matakari ri gi bole lakea na mataruma ne tamana a ngatavine, lakea e huriki a bakovi na tanga vona ri gi padia na kedo ge mate. A vuhuna i rata a naro na maruhua na kurukurune hita, i mahita turana a bakovi, i manga a ngoi na tahuna i tababana na ruma ne tamana. Ra naro ni rata virihi vona ge vakasiri e huriki, nahea ni gi ramaia ra naro iea.

22 “Na tahuna mu masia a bakovi i mahita turane girihina bakovi tara, mu rabalaki varago ra bakovi a ngatavine nga. A naro mu ratea bara i vakaloboa a naro hale iea o Israel.

23 “Na tahuna mu masia tara bakovi i mahita turana a ngatavine ni habikari pali na bakovi tara, 24 mu bole tala rua, mu padi rua na kedo ru gu mate. Ra ngatavine i made na tanga e huriki ri kara ni longoa a nihaloho vona, pali i uka ma i gale ni gi kori. I mavonga ge mate. A bakovi tara ge mate, a vuhuna i mahita turana a ngatavine ni habikari. I mavonga kunana bara mu vakaloboa a naro hale iea na kurukurune mua.

25 “Na tahuna a ngatavine tara ni habikari pali, i uka ma i made tabukoi na tanga, lakea tara bakovi i masia i lakavua, a bakovi kunana ni gi rabalaki. 26 Ra naro iea i manga kunana a bakovi i ubi e turana i rabalakia. Naha ni ratea na ngatavine tara maki, a vuhuna i uka ma i ratea tara naro hale ge mate vona. 27 Ra bakovi iea i tangotatea polovavo na tanga a ngatavine iea. A ngatavine i gale e huriki ri gi koria, pali i uka viri i longoa a nitangi vona ge koria.

28 [d] “Na tahuna mu masia tara bakovi i lakavu a ngatavine i uka ma ni habikari ma, 29 a bakovi iea ge habi ne tamana ngatavine a moni silva ge ravulu lima (50), muri ge parangi vona a ngatavine. A vuhuna ra bakovi iea i turari tuharea a ngatavine, i mahita turana. A bakovi iea ge parangi liu vona a ngatavine iea, nahea ge pilea.

30 [e] “A bakovi nahea ge mahita turana e girihine tamana, ma ge vakamaruhua e tamana.”

<- A Vinara Na Vure 21A Vinara Na Vure 23 ->