1 Mua e huriki a Kolosi, turana e huriki a Laodisia, turana e huriki ranga i uka ma ri matai iau ma, a ngaru mu gu lohoka nau, a leho hateka ni tuhori mua. 2 A leho hateka ni tuhori mua mu gu pesi tora palupu, mu gu vangaru. A leho hateka ni tuhori a niluhoi ne mua, mu gu lohoka vona a nita kapiloho na Vure. E Kristo kunana ia a vuhuna a nita kapiloho iea. 3 *1Ko 1:24,30A lohokanga lobo, a niluhoi kamumu lobo i tabuli ne Kristo.

4 *Rom 16:18A here lakea ne mua a ngava iea, a vuhuna a marikoi tara viri ge tami mua na ngava taminga i nangi kamumu. 5 *1Ko 5:3Iau i uka ma made turane mua, pali a niluhoi nau i tabuli turane mua vakaroro. A vivi vona a hini mu pesi taku mu luhoi torea e Kristo.

6 Lakea, i manga a hini mu bolea hosi e Isu Kristo ge ia a Bakovi Dagi ne mua, ngane a ngaru mu gu laho turana vakaroro. 7 *Epe 3:17Mu laho turana maea: Mu madoko turane Kristo, mu koru rike na rabuna, mu pesi tora na niluhoi ne mua i manga kunana a ngava ni tovo muga mua vona, mu kavurike vakaroroa a Vure.

8 Mu matadoko ne huriki, ma ri gi tami mua, ri gi kolotata mua na ngava tavula na niluhoi na malala. A niluhoi iea i uka ma i valai ne Kristo, i valai ne huriki a gare hosi, ne huriki a hanitu. 9 *Ion 1:14,16Nahea ri gi tami mua, a vuhuna a naro lobo na Vure i tabuli pololilo na kakaine Kristo. 10 *Epe 1:21-22Mu madoko pali turane Kristo, ra viri i rangi lobo a maka hanitu, a nitora koea na malala. 11 *Rom 2:29Mu madoko turane Kristo, i puga vuroki a naro hale ne mua, i manga a rabu ni pala a kulina viri. 12 *Rom 6:4Na tahuna ni vahilolo mua, i manga a Vure i tanu mua turane Kristo. Lakea mu pesi rike turane Kristo, a vuhuna mu luhoi tora a nitora na Vure, ra nitora na Vure i vakamahuri mulea e Kristo na matenga. 13 *Epe 2:1,4-5Hosi mu marava basi na Vure, i manga mu mate pali, a vuhuna mu rata vakaroro a naro hale. Pali a Vure i vakamahuri mua, mu gu made na nimahuri karaba turane Kristo. A Vure i puga vuroki lobo a naro hale ne hita. 14 *Epe 2:14-16; 1Pe 2:24A maka naro hale lobo si rata ni here puru, muri ma bara ni pelekado hita, si vurua ne ria, a vuhuna si longotaro a vinara. Pali a Vure i ravunu vuroki pali a ngava na maka naro hale ne hita ta ni gi pelekado hita vona. I ravunu vuroki lobo a maka ngava nga, i paditata na kai tavalavala turane Kristo na tahuna i mate. 15 Muri i vakalobo a nitora ne huriki a hanitu, a taua ri matakari koea na malala. I vakasiri kavakava e Kristo i ratapile ria pali na tahuna i mate na kai tavalavala. I rangi ria, i rata ria ri manga a maki tavula na matane huriki.

16 *Rom 14:1-13Lakea, nahea tara viri ge pelekado mua na maki mu kani, na maki mu ninu, na habu na lotu, na habu na keva karaba o na Parava Nimalo. 17 *Hib 8:5Naha ni longo mai ria, a vuhuna a maka naro nga, a hanuna maki ta ge bele muri ma. Pali a ngava muholi, si longo ne Kristo. 18 Naha ni vakahale mua mu gu longo mai a viri i tamilalu ni vakakiroko ia, ge taki mua mu gu kavurike e huriki a agelo. A bakovi maea i luhoi hateka a maki i vurena vona. I uka ma i luhoi a Vure. I bibi rike mule tavula ia na maka niluhoi viliha. 19 *Epe 2:21; 4:16A bakovi maea i uka ma i pesi tata turane Kristo. E Kristo i muga, i matakari e huriki a murimuri vona ri laho palupu. I manga kunana a gina bakovi, i habi a maki ni kani vona a maka tabeke lobo na kakaina, lakea ri leho, ri koru palupu na nitora na Vure.

20 *Gal 4:3,9; 1Tim 4:3Mu mate pali turane Kristo, lakea e huriki a hanitu i uka ma ri gi matakari tabu mua. Pali i navai mu tabana ni muri mai a vinara na malala, a vilo hosi na malala i ta maea, 21 “Naha ni nugua a maki iea! Naha ni kania a maki iea! Naha ni padoia a maki iea!” 22 *Mat 15:9Ra maka vinara nga, i uka ma ri gi tabuli vakaroro, bara ri lobo, a vuhuna a ngava na malala kunana. 23 Muholi, a maka vinara na malala nga ri mata manga a niluhoi kamumu. E huriki ri ramai a maka vinara nga ri tatami ni kavurike a Vure. Ri tatami ni vakakiroko ria, ri ngaru ni vakalobo a ningaru na naro hale na hatene ria, lakea ri ubi mule ria. Pali a maka naro nga, ri keri ni vaka­lobo a ningaru na rabu hale pololilo na hatene ria.

<- Kolosi 1Kolosi 3 ->