1 [a]Na tahuna iea e huriki a murimuri ri bele kupo. Na parava lobo bara ri habi a maki ni kani ne huriki a havuri. Pali e huriki a Iuda ri lohoka na nita Grik ri deke mai e huriki a Iuda ri lohoka na nita Hibru, a vuhuna e huriki a havuri ne ria i uka ma ni kori. 2 Lakea e huriki a apostolo ala ravulu a polona i rua, ri gale palupu e huriki a murimuri lobo, ri ta maea, “I uka ma i kamumu mi gi pe a leho ni vara na nitana Vure, mi gi veru a maki ni kani. 3 I mavonga, mua e huriki a turagu, mu vulaki a bakovi ala polorua, mi gi habi a leho iea ne ria. E huriki a bakovi nga ri gi tahoka a lohokanga, a Hanuna Vure ge laho tora turane ria, ri gi naro kamumu, e huriki lobo ri gi togo ria. 4 Pali mia, mi gi habi a hatene mia ni vasileki, ni tovo ne huriki na nita na Vure.”

5 A ngava iea i nangi kamumu ne huriki. Lakea ri vulakia e Stepan, a bakovi i luhoi tora hateka a Vure, a Hanuna Vure i laho tora turana. Ri vulaki e Stepan, turana e Pilip, e Prokorus, e Nikanor, e Timon, e Paramenas, e Nikolas a bakovi o Antiok i dili na lotu ne huriki a Iuda. 6 Ri vakapesi ria na ngalane huriki a apostolo, lakea e huriki a apostolo ri vasileki, ri ru langa a limane ria ne ria.

7 [b]A nitana Vure ni vakarere na tanga lobo. E huriki a murimuri ri bele kupo hateka o Ierusalem. E huriki a prister ala kupo ranga, ri longototo a nitana Vure, ri luhoi tora.

8 A Vure i rata kamumua e Stepan, i habi a nitora vona. I rata na matane huriki a maka nivakasiri dagi, a maki niturutu vona. 9 Pali e huriki a Iuda ranga ri pesi rike, ri vahehe turane Stepan. Re huriki na roho na vaponga, i muga ria a vorakato, pali ngane ri matukapaga. Ri valai o Sirene o Aleksandria, o Silisia o Asia. 10 [c]Ri vahehe turane Stepan, pali ri keri ni gegea, a vuhuna a Hanu Kiripiripi i habi a lohokanga dagi ne Stepan.

11 Muri ri kona kapiloho ranga bakovi, ri taki ria ri gi ta maea, “Mi longoa e Stepan i biu e Moses, a Vure.”

12 Lakea ri piu rike e huriki a bakovi, e huriki a gare, e huriki a mari na vinara, ri lakavua e Stepan, ri turaria lakea ne huriki a Sanderin. 13 Muri e huriki a bakovi ranga ri tami virihia na ngava, ri ta maea, “A bakovi iea, i uka ma i ulu na ni ta hale na roho na Vure, na vinara ne Moses. 14 Mi longoa i takia e Isu o Nasaret ta ge pukea a roho na Vure, ge pulo a maka vinara ne Moses i habi ne hita.”

15 E huriki lobo ri made na Vaponga, ri matanono tamoroa a matane Stepan. Ri masia a matana i manga a matana agelo.

<- A Apostolo 5A Apostolo 7 ->