1 E Pestus i bele o Sisaria i made na parava i tolu, muri i vano i lakea o Ierusalem. 2 *Apo 24:1E huriki a prister dagi, a gare ne huriki a Iuda ri valai vona ri padi virihi e Paulus na ngava. Ri nana e Pestus 3 *Apo 23:15ge longo mai ria ge turari lakea o Ierusalem e Paulus, a vuhuna ri varodo a ngava pali ta ri gi kapia e Paulus, ri gi rabalakia. 4 E Pestus i koli i ta maea, “E Paulus ni ru dili na bavi o Sisaria, pali iau ngane a tabukoi ni hamule lokovonga. 5 Ge valai turagu e huriki a matakari ne mua, mi gi lakea o Sisaria. Pali a bakovi iea ge tahoka a naro hale, bara ri padi virihia vonga.”

6 E Pestus i made turane ria na parava i polotolu o i ravulu, muri i hamule lakea o Sisaria. Na parava muri i made na gula ni vapelekado, lakea i taki ria, ri turari vilia vona e Paulus. 7 *Apo 24:5-6Na tahuna e Paulus i bele, e huriki a Iuda ri valai o Ierusalem ri pesi haluia, ri padi virihia na maka ngava dagi i uka vuhuna.

8 Pali e Paulus i taga vona i ta maea, “Iau i uka ma a ratea tara naro ge hale na vinara ne huriki a Iuda, o na roho na Vure, o ne Kaiser.”*E Kaiser a hariki o Rom. E huriki a hariki lobo o Rom ni gale ria a Kaiser.

9 Pali e Pestus i ngaru ge rata kamumu e huriki a Iuda, lakea i nanea e Paulus, “Ioe o ngaru ni lakea o Ierusalem, ga longoa vonga a maka ngava ni padi virihi ioe vona?”

10 E Paulus i koli i ta maea, “Ngane a pesi na matana mari ni pelekado ne Kaiser tara. Koea ia a tabeke bara ni pelekado iau vona. Iau i uka ma a rata a naro hale ne huriki a Iuda, ioe tara o lohoka vona. 11 Iau bara longotaro a vinara, a ratea tara naro i hale hateka, bara mate vona, i uka ma ga ha vona. Pali ra ngava ni padi virihi iau vona, bara a ngava taminga, i uka tara viri ge habi iau na limane ria. Iau a ngarua e Kaiser ge longoa a ngavagu.”

12 Muri e Pestus i ta lobo turane huriki a bolekori vona, i koli, i ta maea, “Ioe o ngaru e Kaiser ge longo a ngava vomu, ngane bara o lakea ne Kaiser.”

13 Muri na parava ranga, e Agripa a hariki, turana e kurabana e Bernaisi ru valai o Sisaria ru gu gosia e Pestus. 14 *Apo 24:27Ru made na parava ranga, lakea e Pestus i vakalongo e Agripa vona e Paulus, i ta maea, “I tahoka tara bakovi e Peliks i pe purua na bavi. 15 Na tahuna a lakea o Ierusalem, e huriki a prister dagi, a gare ne huriki a Iuda ri padi virihia na maka maregoa i kupo, lakea ri nana iau ri ngarua ge vurua ra bakovi iea.

16 “Lakea a koli, a ta maea, ‘Na tahuna a bakovi tara ni padi virihi na maregoa, a vilone huriki a Rom i ta maea, nahea ni gi vakamadihi tavula a viri. A viri i tahoka a maregoa bara i pesi taro na matana viri i padi virihia na maregoa, ge tagaria na maregoa ni padi virihi ia vona.’ 17 Na tahuna e huriki a Iuda nga ri valai koea na murina ni vapelekado, iau i uka ma dava. Na parava muri a made na gula na mari ni vapelekado, a talo rike a ngava ni tuli valai nau e Paulus. 18 E huriki a Iuda ri pesi rike, ri padi virihia na ngava. Pali a ngava ri padi virihia vona i uka ma i hale hateka ge manga a ngava a luhoi ta ri gi padi virihia vona. 19 A ngava ri padi virihia vona i dili na nita na lotu, a nita na bakovi tara i mate, a rana e Isu. E Paulus i takia ta i mahuri mule a bakovi iea. 20 Pali iau a ngaru ni matakanea a vuhuna a maregoa iea, pali a varoru. Lakea a nanea, ma ge ngaru ni lakea o Ierusalem ni gi longo vonga a ngava ni padi virihi ia vona. 21 Pali i marikoi ia, i ngaru ni matai e Kaiser ge longoa a ngava vona. Lakea a takia ni gi matakari taro ia na bavi, muri ga rudu lakea ne Kaiser.”

22 Muri e Agripa i takia e Pestus, “Iau tara a ngaru ni longoa a ngava vona.”

E Pestus i koli i ta maea, “Kuduvi bara o longoa a ngava vona.”

23 Na parava muri e Agripa, e Bernaisi ru bagetu kamumu, ru dili na roho na vaponga turana e huriki a matakari na nugumaheto, a bakovi dagi na tanga dagi. E Pestus i rudu a ngava, ni turari lakea vona e Paulus. 24 Lakea e Pestus i ta maea, “Hariki Agripa, turana e huriki ri made turane hita mona koea, mu masia a bakovi iea. E huriki a Iuda ra ri made koea, e huriki a Iuda ri made o Ierusalem, ri valai nau, ri padi virihia na ngava. Ri gale dagi, ri ngarua ge mate. 25 Pali iau i uka ma a matavisia vona tara maki ge hale ge ratea ge mate vona. Ngane bara rudua ge lakea ne Kaiser, a vuhuna i ta tora hateka ge pesi na matane Kaiser. 26 Pali iau a varoru vona a ra ngava ga here puru ga vakalongo e Kaiser vona. Lakea a vakapesia koea na matane mua, na matane Agripa a hariki. Si gi nana tabua, muri ga here puru a ngava i taki. 27 Iau a luhoi i uka ma i kamumu a vorakato ni gi rudu lakea ne Kaiser, pali i uka ma ni gi vakaru lokovonga turana nitana naro hale vona.”

<- A Apostolo 24A Apostolo 26 ->