1 Mua e huriki a turagu, ngane ga vakalobo a ngava. Mu vasileki ne mateu, mete ge vakalongo a nitane Bakovi Dagi, ge bele malaviriri na tanga lobo, lakea e huriki ri longoa ri gi togoa ge manga a hini mu rata pali. 2 Mu vasileki na Vure ge kori mateu na limane huriki a bakovi hale, a vuhuna mu lohoka vona i uka ma e huriki lobo ri luhoi torea a Vure. 3 Pali e Bakovi Dagi i ramai vakaroro a nitana. Bara i vakatora mua, i tagari mua na bakovi hale, re Satan. 4 *2Ko 7:16; Gal 5:10Mete lohoka vona, mu ramai lobo a ngava mete habi ne mua. Mete lohoka vona tabu, e Bakovi Dagi ge tuhori mua ni ramai lobo a ngava nga. 5 Mete ngarua e Bakovi Dagi ge habi a niluhoi ne mua, mu gu lohoka kamumu vona a Vure i ngaru hateka mua. Mete ngarua ge vakasiri mua ni hatenono na maregoa i manga e Kristo i hatenono.

6 *Rom 16:17Mua e huriki a turagu, mete vakuku mua na rane Isu Kristo a Bakovi Dagi ne hita: Mu malele ha vona e huriki a turane hita ranga ri laho tavula, i uka ma ri muri mai a vinara mete vara mua vona. 7 *Pili 3:17Mu lohoka vona mete ngaru mu gu ramai a naro mete rata. Na tahuna mete made turane mua, i uka ma mete made tavula. 8 *1Tes 2:9I uka ma mete kani tavula a maki ni kani ne mua. A maki ni kani lobo mete kona. Mete leho hateka na haro a rodo, nahea mete ge habi a nimava ne mua. 9 *1Ko 9:4; 1Tes 1:6Na tahuna mete ngaru a maki, bara mete nana mua. Pali mete koi ni rata mavonga, a vuhuna mete ngaru ni vakasiri mua na naro kamumu mu gu ramaia. 10 Mu lohoka vona na tahuna mete tabana ni made turane mua, mete taki tora mua, mete ta maea, “A bakovi i marikoi ni leho, nahea ge kani.”

11 *1Tim 5:13Pali ngane mete longo ranga e huriki iene, ta ri rakoli tavula kunana, i uka ma ri leho. Ri rahi dili ria ni rata viliha kunana a maki na viri tara. 12 *1Tes 4:11Mu vakuku ria na rane Isu Kristo a Bakovi Dagi, mu vakuku e huriki nga ri gi made tata, ri gi leho, ri gi matakari mule ria na maki ni kani. 13 *Gal 6:9Mua e huriki a turagu, naha ni tuha malulu ni rata a naro kamumu.

14 E rei a bakovi i uka ma i ramai a ngava mete here puru na raukea iea, mu vakalongo e huriki vona, ri gi malele ha vona, ge maruhu. 15 *1Tes 5:14Pali naha ni lohopile ia. Mu varea manga mu vara e huriki a turane mua.

16 E Bakovi Dagi ia a vuhuna a nivalemu. Ge habi a nivalemu ne mua na parava vakaroro, ge habi a nivalemu ne mua na maki lobo, ge made turane mua.

17 Iau e Paulus a herea na limagu a nilobona raukea iea. A raukea lobo a here, a here puru vona a maka nita maea, ge a nivakasiri nau. A hinere nau i maea.

18 E Isu Kristo a Bakovi Dagi ne hita ge rata kamumu mua lobo.

<- 2 Tesalonika 2