1 Mua e huriki a turagu, hosi a made turane mua, mu ramai e Kristo. Pali na tahuna a tovo mua, i uka ma a tovo mua manga mu kinigao na Hanu Kiripiripi. A tovo mua manga e huriki ri ramai a niluhoi na malala, e huriki a koma kiroko na narone Kristo. 2 [a]A tovo mua, i manga a vakaruru mua, i uka ma a habi a maki tora ne mua, a vuhuna i uka ma mu paki ma. Ngane ranga, i uka ma mu paki, 3 [b]a vuhuna mu tabana ni muri mai a naro na malala. Mu hate madihi, mu vagege. I vakasiri manga mu ngaru kunana a naro na malala. 4 [c]Na tahuna a viri i taki ta i muri ne Paulus, o a viri tara i taki ta i muri ne Apolos, mu ramai kunana a naro na malala.

5 [d]E Apolos, ia e rei muholi? Pali iau, e Paulus, iau e rei muholi? Maria a vora kunana, e Bakovi Dagi i rudu maria miri gi vakalongo ne mua a Velenga Kamumu, lakea mu luhoi tora ia. 6 I manga iau a varo, e Apolos i kisi, pali a Vure kunana i ratea a hania i gaga, i koru rike. 7 A viri i varo, a viri i kisi a hania, rua varago a bakovi tavula. Pali a Vure kunana a viri muholi, i rata a maka maki ri gaga, ri koru rike. 8 [e]A viri i varo, a viri i kisi a hania, ru palupulupu kunana. Rua varago bara ru bole a mapane rua, i muri mai a leho ne rua. 9 Maria varago a vora na Vure, miri leho palupu. Mua a hania na Vure.

Mu manga a roho na Vure. 10 A Vure i rata kamumu, i rata iau a bele manga a mari ni hae a ruma. A ru puru a vuhu kedo, ni gi vakapesi a ruma vona. Pali a viri tara i valai, i hae rike vona a ruma. Hita takutaku si gi luhoi kamumu, si gi hae kamumua a roho. 11 [f]I uka tara vuhu kedo tabu si gi ru purua. A vuhu kedo i taku kunana, ni ru puru pali, re Isu Kristo. 12 Pali e huriki ri hae langa a ruma na vuhu kedo iea, ri gi hae na gol ranga, o na silva ranga, o na kedo mata kamumu ranga, o na kai ranga, o na gavana rabia ranga, o na rehi ranga. 13 [g]Muri a leho ne huriki lobo bara i bele kavakava na nilobona parava. Bara i bele kavakava na tahuna a kanono i tonia, ni gi matai a leho ne hita takutaku ni rata kamumu, o i uka. 14 A leho na viri i rata langea na vuhu kedo iea i uka ma ge nono, bara i bole a mapana vona. 15 Pali a leho na viri ge nono, a leho vona bara i velu. I muholi, a bakovi bara ni korimule, pali bara i manga a viri ni korimule na ruma vona i nono.

16 [h]Ra mua, i uka ma mu lohoka vona? Mua a roho na Vure. A Hanu Kiripiripi i made na kurukurune mua. 17 A Vure bara i ratapile e huriki ri ratapile a roho vona, a vuhuna a roho na Vure ne vona kunana. Pali mua a roho vona.

18 Naha ni tami mule mua. E rei a viri i luhoi ta i tahoka a lohokanga na malala i dagi hateka, iau a ngarua ge taparakia, ge mata mangamanga na matane huriki na malala. Muri bara i tahoka a lohokanga muholi. 19 [i]A lohokanga na malala, a niluhoi tavula na matana Vure, a vuhuna ni here maea, “E huriki ri luhoi ta ri lohoka hateka, a Vure bara i rata ria, a lohokanga ne ria bara i ratapile ria.”

20 [j]A ngava tara ni here, i maea, “E huriki ranga ri luhoi ta ri lohoka hateka, pali a Bakovi Dagi i lohoka vona, a niluhoi ne ria a maki tavula kunana.”

21 I mavonga, naha ni bibi rike e huriki a bakovi. A maki lobo ni habi ne mua, ne vona ni kori mua. 22 Ra iau, e Paulus, e Apolos, e Sipas, a malala, a nimahuri, a matenga, a hini mona, a hini muri ma, a maki lobo ne mua. 23 Pali mua ne vona e Kristo, e Kristo ne vona a Vure.

<- 1 Korin 21 Korin 4 ->