2 A ngaru ni kavurike mua, a vuhuna mu longototo iau, a ngava lobo a taki mua vona, ra ngava a vara mua vona hosi. 3 [b]Pali a ngava tara a ngaru mu gu lohoka vona. E Kristo i muga ne huriki a bakovi. E huriki a bakovi ri muga ne huriki e girihine ria. A Vure i muga ne Kristo. 4 A bakovi ge vasileki, o ge rata a nita propet, i uka ma ge kavitagua a gina. Bara i kavitagua a gina, bara i vakamaruhu a viri i muga vona, re Kristo. 5 Pali a ngatavine ge vasileki, o ge rata a nita propet, ge kavitagua a gina. Bara i uka ma ge kavitagua a gina, bara i vakamaruhua a viri i muga vona, re girihina. I manga kunana ge ali vuroki a vuna, bara i maruhu e girihina. 6 A ngatavine ge koi ni kavitagua a gina, pali, ge ali vuroki a vuna! Pali bara i rata mavonga, bara i maruhu. I mavonga, i kamumu ge kavitagua a gina na tahuna i vasileki. 7 [c]A bakovi i uka ma ge kavitagua a gina na tahuna i vasileki, a vuhuna a bakovi i manga a hanuna Vure, a bagetuanga na Vure. Pali a ngatavine a bagetua ne girihina, 8 [d]a vuhuna a Vure i uka ma i ratarikea a bakovi na karona ngatavine. A Vure i ratarikea a ngatavine na karona bakovi. 9 A Vure i uka ma i luhoia a ngatavine, i ratarikea a bakovi ge tuhoria. I luhoia a bakovi, lakea i ratarikea a ngatavine ge tuhoria. 10 I mavonga, a ngatavine ge kavitagua a gina na tahuna i vasileki, ge manga a kilakila, ge vakasiri manga a bakovi i muga vona, a vuhuna e huriki a agelo ri matanono hita. 11 Pali hita e huriki a tara ne Bakovi Dagi, a ngatavine i uka ma i made kikeri. A bakovi i tuhoria. A bakovi tara, i uka ma i made kikeri. A ngatavine i tuhoria. 12 Muga, a Vure i ratarike a ngatavine na karona bakovi. Pali ngane e huriki a bakovi, i poda ria a ngatavine. Pali a maki lobo i valai na Vure. 13 Mu luhoi kadoa a ninana iea: a ngatavine ge vasileki na Vure, i kamumu i uka ma ge kavitagua a gina? 14 I kavakava hateka, a maki ni maruhu vona a bakovi i ola a vuna. 15 Pali a ngatavine, i ola a vuna, i mata kamumu hateka, a vuhuna a vuna ni habi na ngatavine, ge kavitagua a gina. 16 Pali e rei a viri i ngaru ni gege vona a ngava nga, mi uka tabu tara naro mi gi tovo. A tara na Vure na tanga lobo ri ramai a ngava nga.

17 Pali ngane a tahoka ranga ngava, i uka ma ga kavurike mua vona. Na tahuna mu vapopo, i uka ma mu rata kamumu. Mu rata hale. 18 [e]Na tahuna mua e huriki a tara ne Kristo mu vapopo, a longo ta mu vapida lae. A luhoi ge muholi popote a ngava iea. 19 I uka ma i kamumu. Pali i muholi bara i tahoka e huriki ri vapida lae, ge vakasiri e rei ne mua i luhoi muholia e Kristo. 20 Na tahuna mu vapopo, mu kani, i uka ma i manga mu kani a kania ne Bakovi Dagi, 21 a vuhuna mua takutaku mu kani kunana. E huriki ranga i uka ma ri bole kupo, ri vitolo. E huriki ranga ri ninu hateka, ri manga. 22 Mu manga! Mu uka ruma mu gu kani vona, mu gu ninu vona? I mata manga mu biu a tara na Vure, mu vakamaruhu e huriki ri bala a maki. Ga taki navai mua? Ga kavurike mua? I uka liu!

23 E Bakovi Dagi i tovo iau, ngane ga tovo mua. Na rodo, ta ni gi habi na limane huriki a pile e Isu a Bakovi Dagi, i bole rike a bret, 24 i kavurikea a Vure vona, i kevea, i ta maea, “Ra bret iea a bobogu, a habia ge korimule mua. Mu rata mavonga vakaroro, mu luhoi mule iau.” 25 [f]Ri kani lobo, i bole rikea a kikei na vain, i kavurikea a Vure vona, i ta maea, “A kikei iea i vakasiri a ngava dagi karaba, a vakatorea na daragu. Na tahuna mu ninua, mu luhoi mule iau.”

26 Na tahuna mu kania a bret, mu ninu a vain, mu vakalongo e huriki vona a matenga ne Bakovi Dagi, ge vano, ge harena na tahuna ge hamule valai. 27 [g]I mavonga, e rei a viri i kani a bret, i ninu a kikei na vain ne Bakovi Dagi na naro i uka ma i togoa e Bakovi Dagi vona, i manga i luhoi a maki tavula a kakaina, a darane Bakovi Dagi, i tahoka a ngava. 28 I mavonga, i kamumu mu gu luhoi kado mule a narone mua taro. Muri mu kani a bret, mu ninu na kikei. 29 E rei a viri i uka ma i luhoi kado mule a narona, pali i kani, i ninu, a Vure bara i vakamadihia. 30 Na naro iea kunana, i kupo ne mua mu giloa, mu uka a nitora, pali e huriki ranga ri mate pali. 31 Hita bara si pelekado mule hita, a Vure i uka ma ge vakamadihi hita. 32 [h]Pali na tahuna e Bakovi Dagi i vakamadihi hita, i tovo hita, i uka ma si gi velu turane huriki na malala.

33 Mua e huriki a turagu, na tahuna mu vapopo mu gu kani, mu vadava. 34 A viri i vitolo, ge kani taro na ruma, lakea na tahuna mu vapopo ni kani palupu, a Vure i uka ma ge vakamadihi mua. A ngava ranga ga habi ne mua muri ma na tahuna a bele iene.

<- 1 Korin 101 Korin 12 ->