1 Göŋön mewö qahö maljanaŋgöra mönö mötnaripkö keu kembaŋi kembaŋi mi Buŋa Kimbigö dop kewö kusum eŋgimakŋan: 2 Azi namŋi yeŋön mönö kilik-kalukŋini qahö malgetka göda qem eŋgibinaŋgö dop akŋe. Nanŋini ahakmemeŋini törörök galöm köl aŋgugetka mötnaripŋinaŋgö kawölŋinan qahöwahi ölŋi urukalem asuhumakŋa. Ölŋi asuhui ambazip törörök jöpaköm eŋgiba malme aka kapaŋ köla böŋ qeba kinme. Mewö malmegöra kusum eŋgimakŋan.

3 Ambi namŋi yeŋön mewöyök Anutugöreŋ ambi sarakŋi yeŋgö dop ahakmemeŋini aka memba malme. Andöqeqe keu yöhösaŋ kude ahakŋe. Wain o gwötpuk nemegö mötöp simbaŋe kude aŋgota qaköme. Urumeleŋ ahakmemegö silikŋi ölöpŋi kondela tosatŋi kusum eŋgimakŋe.

4 Mewö aka mala ambi nembö bapŋine maljei, yeŋgöra ölöp goro eŋgiba malgetka yeŋön mewöyök apmoröurupŋini urukönömŋinan jöpaköm eŋgiba malme. 5 Jöpaköm eŋgiba nanŋini ahakmemeŋini törörök galöm köl aŋguba sarakŋi aka mirigö nupŋini nem qerak aka nöŋgöp törön qakŋe memba apmoröurupŋini köyan köl eŋgiba apurupŋinaŋgö keu bapŋe anda kötöngöm eŋgimakŋe. Mewö kusum eŋgigetka aka memba malgetka tosatŋan Anutugö Buŋa keu mi mepaiköba ilitnöŋ albingö osime. Mewö.

6 Azi gwabö yeŋgö uruŋini mewöyök kewö kuŋgum eŋgimakŋan: Yeŋön mönö ölöpŋaŋgö oyankasak mala nanŋini ahakmemeŋini törörök galöm köl aŋgumakŋe. 7 Uruŋini mewö kuŋgum eŋgiba nangak ahakmeme pakpak miaŋgöreŋ silik ölöpŋi kondel eŋgiba malman. Mönö geŋmoŋ qahö böŋ qeba kinda taŋörakŋi qahö kusum eŋgimakŋan. 8 Keu mötsihimŋambuk jiba malnöŋga ambazipnöŋ mepaiköba memba et al gihibingö osime. Mewö jiba malnöŋga tuarenjoŋurupninan keu bölöŋi jim neŋgibingö keu jaruba ölŋi qahö miwikŋaiba gamuŋini mötme. Mewö kusum eŋgimakŋan.

9 Welenqeqeurup mi kewö kusum eŋgimakŋan: Yeŋön ketaŋamŋini yeŋgö keuŋini pakpak tem köla keu bapŋe anda malme. Sösöŋgai ak eŋgibingö kapaŋ köla kinme. Keu jimei, mi nesilam qakŋan kude meleŋ eŋgimakŋe. 10 Ketaŋamŋinaŋgö mireyök yuai mohot-hök yahöt-hök mi ölöŋ kude memakŋemö, ketaŋamŋinan eŋgeka möt narim eŋgimakŋapköra mönö kapaŋ köla kinme. Nupŋini pakpak mönö geŋmoŋi qahö pöndaŋ memba malme. Mewö mala Anutu Amötqeqe Toninaŋgö Buŋa keu kusum eŋgimakzei, mi kötön kölgetka ölŋi ahui nahömŋambuk ahakŋa. Mewö.

11 Malmal sarakŋaŋgö nam köipitŋi kewö: Anutunöŋ ambazip körek amöt qem neŋgimapköra aka kalem möriamŋi indeli gölme dop asuhuyök. 12 Kalem möriam miaŋön mönö kopa aŋgöjörak malmalgöra “Qahö,” jibingö köna kondela gölmegö sihim kömbönaŋi bölöŋi qömbököbingöra köl kusuba mindiŋgöm neŋgimakza. Ahakmemenini törörök galöm köl aŋguba keu pakpak diŋdiŋanök kewöta malbingöra köl gulim neŋgimakza. Mewö miaŋön Anutugö malmal köhöikŋi mi nalö kewöŋe köl guliba gölmenöŋ malbin.

13 Mewö malinga Jisös Kraistnöŋ kunbuk kamawi, nini nalö miaŋgöreŋ Anutu qetbuŋaŋambuk aka Amötqeqe Tonini yetkö asakmararaŋiri asuhuiga ekin. Nini oyaeŋkoyaeŋ nalöŋi mi kam kuŋgumapköra jörömqöröm al mamböt aka maljin.

14 [a]Jisös Kraistnöŋ mönö neŋgöra aka nanŋi malmalŋi köleŋda mosörök. Nini ahakmeme bölöŋi könaŋi könaŋi miaŋgöreŋök meköm neŋgiba sohopnini memamgö möta köl könjörat ak neŋgiba nanŋi buŋaŋi sarakŋi akingöra aka malmalŋi köleŋda mosörök. Mi mosöta qewöloŋnini saŋgoŋniga nanŋi könagesöŋi aka ölöp nup ölöpŋi ölöpŋi membingö urukönöp aka jöjörömakin.

15 Miaŋgö keuŋi mönö kusum eŋgiba ambazip uruŋini naŋgöba köna siŋgimei, mi kukösum pakpakö qakŋe tembula jim eŋgimakŋan. Mewö aknöŋga kunŋan jijiwilit ak gihibapuköra galöm mem aŋguba malman. Mewö.

<- Taitus 1Taitus 3 ->