1 *Kol 2.16Kungö mötnaripŋan lölöwöröŋi aiga i mönö köyan köla köl öröm waŋgiba malme. Yambuk eraum möta kösawöraŋ keugöra jitnakölik kude ahakŋe. 2 Tosatŋan mötnaripŋinaŋgö dop nene pakpak ölöp nemakzemö, tosatŋi yeŋgö mötnaripŋinan lölöwöröŋi aiga nene piakŋanök nemakze. Uruŋinan tölöhobapuköra uruyahöt aka sömbup tandö lopioŋgö naluk alalŋi mi sisitŋi memba yöha töhönök inanŋik ohom nemakze. 3 Nene pakpak nemakzeaŋön mönö alaurupŋini yöhayök nemakzei, mi jijiwilit kude ak eŋgimakŋe. Anutunöŋ alaurupŋini nene pakpak nemakzei, mi mewöyök “Dop kölje,” jiba köyan köl eŋgimakza. Miaŋgöra yöhayök nemakzei, eŋön mönö alaurupŋini yeŋgö keuŋini kude jim teköme.

4 Göŋön mönö niŋia aka kungö welenqeqeŋi jim teköm waŋgibanak? Yaŋön mönö nanŋi toŋaŋgö jeŋe keuŋaŋgö likepŋi jiiga kewöta jim teköiga dop köliga kinma me lömböt qakŋe öŋgöiga etma. Kembunöŋ mönö köhöiba böŋ qeba kinmapköra naŋgöm waŋgimakŋa. Miaŋgöra mönö ölöp böŋ qeba kinma.

5 Tosatŋan silim pakpaköra mötmörigetka tandökŋini öröröŋ ahözemö, tosatŋan silimŋi silimŋi kewöta silim kungö mötket öŋgöiga qainŋi kun aiga silim tosatŋan miaŋgö nemböŋe akze. Iŋini mohot mohot mönö nanŋini mötmötŋini qekötahöba miaŋgöreŋ uruyahöt körek yaköriba awösamkakak kinda malme. 6 Tosatŋan silimŋi silimŋi kewöta öŋgöba eta alakzei, yeŋön mi mönö Kembu qetbuŋa waŋgimapköra aka ahakze. Tosatŋan sömbup nemakzei, yeŋön mönö Anutu möpöseiba Kembunöŋ mewö qetbuŋaŋambuk akŋapköra nemakze. Tosatŋan sömbupkö siŋgi malakzei, yeŋön mönö Kembunöŋ qetbuŋaŋambuk akŋapköra aka mi ahakze aka mewö mala Anutu möpöseimakze. 7 Neŋgöreŋök kunŋan kun mönö nanŋaŋgörök qahö malja aka nanŋaŋgörök qahö kömuma.

8 Miaŋgö könaŋi kewö: Jebuk malbin ewö, mönö malmalnini Kembugöra köleŋda malbin. Kömumbin ewö, mönö Kembugöra kömumbin. Miaŋgöra malbin me kömumbin ewö, mönö Kembugö buŋaya akzin. 9 Kraistnöŋ mönö kömugeri aka jebuk maljini, körek neŋgö Kembunini aka malmapköra kömumba guliyök. 10 *2 Kor 5.10Anutunöŋ mönö körek neŋguaŋgita nanŋi keu jakeŋe al neŋgiiga kinbin. Miaŋgöra tosatŋi eŋön mönö niŋia aka urumeleŋ alaurupŋini jim teköm eŋgimakze? Mewöyök alaurupni tosatŋi eŋön mönö wuanöŋgöra urumeleŋ alaurupŋini tosatŋi mi jijiwilit ak eŋgimakze? Jujul silikŋini miaŋön mönö qahö dop kölja. 11 *Ais 45.23Miaŋgö keuŋi mi Buŋa Kimbinöŋ kewö ohoget ahöza,

13 Miaŋgöra mönö kude toroqeba jim bölim aŋguba keuŋini jim teköme. Urumeleŋ alaurup yeŋgö könanöŋ tötaŋgöba et eŋgubapukö yuai kun mönö kude alakŋe. Miaŋgö keuŋi mönö kapaŋ köla jiba jöhöme. 14 Nene yuai kunöŋ nanŋanök aŋgöjörakŋambuk qahö akzapmö, ambazipnöŋ yuaigö mötketka aŋgöjörakŋambuk akzawi, yeŋgöröhök mi aŋgöjörakŋambuk akza. Nöŋön Kembu Jisösbuk kinda keu mi möta miaŋgöra uruyahöt kun qahö akzal. 15 Anutunöŋ nene pakpak amöt qem teköi sarakŋi akzemö, töndup alaurup tosatŋan dönqizizinŋini aka sömbup qahö nemakze. Kraistnöŋ yeŋgöra aka kömuiga tosatŋi eŋön mönö wuanöŋgöra sömbup nemba mewö miaŋön yeŋgö uruŋini mem bölimakze? Mewö nanŋini imbi-imbi aketka urumeleŋ alaurupŋinan miaŋgöra wösöbirik ahakzei, mewö mönö urukalemgö könaŋi mi qahö toroqeba wuataŋgömakze.

16 Mötmöt ölöpŋi ahöm eŋgizapmö, miaŋgö qakŋe ahak-memeŋinan laŋ aketka tosatŋan miaŋgöra sirongen keu jiba jim eŋgimakze. Mewö asuhubapuköra galöm mem aŋguba malme. 17 Wani neneya nembini aka wani oya nembini, miaŋön Anutu bemtohoŋaŋgö aiwesökŋi qahö akza. Yuai miaŋön mönö eretŋi akza. Yaŋgö bemtohoŋ uruŋe malmalgö ölŋi mi kewö: Uŋa Töröŋan inahöm neŋgiiga ahakmeme diŋdiŋi wuataŋgöinga luai qem neŋgiiga söŋgaiba maljin. Miaŋön mönö aiwesök muŋgemŋi akza. 18 Denike yeŋön mewö aka Kraistkö welenŋi qemakzei, yeŋön mönö Anutugö jeŋe dop kölgetka ambazipnöŋ keuŋini mötketka dop köl eŋgimakza.

19 Miaŋgöra nini luai qem aŋguinga urumohot sehimapköra kapaŋ kölbin. Mewö miaŋön mönö urunini möhamgöba mem köhöim aŋgubin. 20 Anutunöŋ nene pakpak amöt qem teköi sarakŋi akze, mi mötzinmö, kunöŋ sömbup me nene kun neiga alaŋaŋgö uruŋan miaŋgöra böliiga urukönöpŋi ahuiga siŋgisön-dokpuk akzawi, miaŋön mönö qahö dop kölja. Kunŋan tosatŋi yeŋgöra qahö mötmöriba nanŋaŋgörök möta laŋ nezawi, yaŋön mönö mewöyök siŋgisöndokpuk akŋa. Miaŋgöra Anutunöŋ yeŋgö uruŋine nupŋi meyöhi, tosatŋi eŋön mönö nupŋi ölöpŋi mi nenegöra aka kude mem bölime.

21 Miaŋgöra urumeleŋ alaurupŋini yeŋgöra aka sömbupkö siŋgi mala wain o mi kude nemba malme. Mewö miaŋön mönö mohotŋe ölöwakŋe. Mewöyök uruŋinan yuaigöra aka böliiga siŋgisöndokpuk aka löwöribawak, eŋön mi kude akŋe. Mewö mönö mohotŋe ölöwakŋe. 22 Kösawöraŋ keugö mötnaripŋi mewö me mewö ahöm gihizawi, mi mönö Anutugö jemesoholŋe aŋgön köla malman. Kunŋan keu kungöra “Dop kölja,” jiba miaŋgöreŋ qekötahöba möt köhöiba miaŋgöra nanŋi qahö jim teköm aŋguzawi, yaŋön mönö simbawoŋ akza.

23 I me wai mötnarip qakŋe qahö kinda ahakzini, mi pakpak mönö siŋgisöndok akza. Miaŋgöra kunŋan nene kungöra uruyahöt aka töndup mi neza ewö, yaŋön mönö mewö siŋgisöndok akŋa. Mötnarip qakŋe qahö kinda nezawaŋgöra Anutunöŋ mönö yaŋgö keuŋi jim teköi qaköba lömböt miwikŋaima. Mewö.

<- Rom 13Rom 15 ->