Indelindel 5

Lamanöŋ Anutugö böröŋeyök kimbi köpep meyök.

1 [a]Miaŋgö andöŋe kimbi köpep kun ekiga jakömbuak dumnöŋ tatzawaŋgö böröŋi ölŋe ahöyök. Kimbi miaŋgö sinŋi mi likeplikep lökŋanök kulemöhök ohoba köpeiba sapönöŋ ala muŋgem supap (sil)[b] 7:nöŋ köla mekötahögetka ahöyök. 2 Mewöyök Suep garata ösum-mumuŋambuk kun ekiga köhöikŋanök qeta buzup keu kewö qesiba jiyök, “Daŋön sarak sorokŋi aka ölöp kimbi köpep kiaŋgö muŋgem supapŋi (sil) munjurata kötulmawaŋgö dop akza?”

3 Mewö jiyökmö, Suepnöŋ, gölmenöŋ aka kömupkö uŋem miri miaŋgöreŋ körekmakörek eŋgegetka kunŋan kun mi mutula kulemŋi ekŋawaŋgö dop qahö ahök. 4 Kunŋan kun sarak sorokŋi aka kimbi mi mutula kulemŋi ekŋawaŋgö dop qahö miwikŋaigeri, miaŋgöra nöŋön gwötpuk sahöt bölial. 5 [c]Sahöt bölibiga Anutugö jitŋememe yeŋgöreŋök kunŋan nöŋgöra keu kewö jiyök, “Mönö kude sahötnöŋ. Mötnöŋ, Juda kambunöhök Deiwidkö gwölönarökŋi kun ahuba laion sömbup ewö aka Bölöŋaŋgö Toŋi luhut ala malja. Yaŋön mönö ölöp köhöiba kimbi köpep kiaŋgö muŋgem supapŋi (sil) 7 mi munjurata kötulma.”

6 [d]Mewö jiiga Lama moröŋi ekiga jakömbuak dum bibiŋe bem jembon 4 mieŋgö sutŋine kiniga Anutugö jitŋememe yeŋön liliköm waŋgiget. Lama moröŋi miaŋön mönö qeget kömuyöhaŋgö tandökŋa kinök. Ilikŋi 7 aka jekötŋi 7. Anutunöŋ uŋaurupŋi bohonŋi 7 melaim eŋgiiga gölmegö ambazip pakpak yeŋgöreŋ anda maljei, jekötŋi 7 mi mönö yeŋgö söpsöpŋina akze. 7 Lama moröŋi mi ekiga kaba kimbi köpep supapŋambuk mi jakömbuak dumnöŋ tatzawaŋgö böröŋi ölŋeyök meyök. 8 [e]Mi meiga bem jembon 4 aka Anutugö jitŋememe 24 mieŋön mönö miaŋgöreŋök Lama moröŋaŋgö wösöŋe sipköba eta simin kölget. Yeŋön mohot mohot kulele aka goul qambi memba kinget. Ambazip sarakŋan köulukögetka Anutugöreŋ öŋgömakzawi, miaŋön mönö jiniŋ ohohogö dop aiga wörönŋi umköhöwakŋambuknöŋ öŋgöba pukpukömakza. Wörön mewöŋan mönö goul qambiŋini kokolak qeiga kinget. 9 [f]Simin köla liŋet dölökŋi kewö köla jiget,

“Göŋön qainŋi kun akzan. Gi guhugetka kömumba sepki mokoba miaŋön ambazip bohonŋi memba eŋgömenöŋ.

Ambazip mi bem isikŋinaŋgö dop, keu jöl jijiŋinaŋgö dop, kambuŋinaŋgö dop aka kantriŋinaŋgö dop. Göŋön mönö mieŋgöreŋök tosatŋi eŋgömenöŋga Anutugö buŋaya akze.

Miaŋgöra göŋön mönö sarak sorokŋi aka kimbi köpep supapŋambuk memba muŋgem supapŋi (sil) mutulmanaŋgö dop akzan.

10 [g]Yeŋön Anutugö buŋaya aketka kusum eŋgiba kuŋgum eŋginöŋga bemtohoŋgahö kiŋ kembu kambu aka jike nup galömurupŋi akze. Yeŋön Anutuninaŋgö nupŋi memba mala gölme dop ambazip galöm köl eŋgiba mal öŋgöme.”

11 [h]Liŋet mewö köla jigetka möta toroqeba uba Suep garata jaŋgöŋini tausenŋi tausenŋi aka milyönŋi milyönŋi mi eŋgeka liŋet kourukŋini möral. Yeŋön jakömbuak dum kösutŋe kinda bem jembon 4 aka Anutugö jitŋememe 24 mi liliköm eŋgiba liŋet kölget. 12 Liŋet köhöikŋanök qeta kewö kölget,

“O Lama moröŋi qeget kömuyöhi, yaŋön mönö sarak sorokŋi aiga Anutunöŋ ösum-mumu aka töhötmöriam waŋgiiga dopŋe akza.

Mötkutukutu öŋgöŋgöŋi aka kukösum pakpak buŋa qeiga dopŋe akza. Sarak sorokŋi aiga ölöp qetbuŋa pakpak waŋgiinga asakmararaŋ buŋa qeiga möpöseim waŋgizin.”

13 Mewö köla möpöseigetka liŋet kambu kun kewö möral: Anutunöŋ malmalbuk miwikŋaim eŋgiyöhi, mieŋön mönö körekmakörek liŋet kölgetka möral. Suepnöŋ maljei, gölmenöŋ maljei, kömupkö uŋem mire aka köwet qakŋe maljei, mieŋön mönö körek numbuŋini mindiriba liŋet kewö kölget,

“Jakömbuak dumŋe tatzawi aka Lama moröŋi neŋön iŋiri möpöseim etkizin.

Kötuet Toŋi etkö qetbuŋaŋiri jim qarimakzin. Nalö dop asakmararaŋ etkiinga kukösum Toŋi mi teteköŋi qahö mal öŋgömahot.”

14 Mewö kölgetka bem jembon 4 mieŋön “Keu mi ölŋa,” jiget. Jigetka Anutugö jitŋememe yeŋön eta dapköba simin köla Anutu waikŋi memba möpöseim waŋgiget. Mewö.

<- Indelindel 4 Indelindel 6 ->