Indelindel 15

Suep garata 7 aka lömböt kanjamŋinambuk 7.

1 Miaŋgö andöŋe suep uruŋe uba aŋgöletot ketaŋi kun asuhuiga eka kewö welipköyal: Suep garata 7 mi lömböt kanjamŋinambuk (plague) 7 memba kinget. Ambazip siŋgisöndokŋinaŋgöra Anutugö irimŋi seholiiga jim teköba likepŋi meleŋni lömböt kanjamŋinambuk qakŋine öŋgöi mötketka uruŋan amöriiga keuŋinan kömuma. Miaŋgöra qetŋini lömböt kanjamŋinambuk qöndökŋi 7 qetket.

2 Mi eka yuai gilikbilikŋambuk köwet ewö ekiga könöp bölamŋambuk loloŋqaloŋ ahöyök. Miaŋgö qöhöröŋe Anutugö ambazip kingetka eŋgehal. Yeŋön luhut ala jemnembagö keuŋi qahö tem köla imutŋaŋgö waikŋi qahö memba qetŋaŋgö jaŋgöŋi sileŋine qahö aŋgön köla malget. Anutunöŋ i mohot mohot kulele eŋgiiga memba kinget. 3 [a]Miaŋgöreŋ kinda Anutugö nup meme azi Mosesgö liŋetŋi aka Lama moröŋaŋgö saureŋ liŋetŋi mi kewö kölget,

“O Kembu Anutu kukösum pakpakö Toŋi, göŋön aŋgöletot ketaŋi ketaŋi welipŋinambuk ahakzan.

Göŋön kantriŋi kantriŋi mi kiŋ kembu ak eŋginöŋga ahakmemegahö könaŋi mi diŋdiŋi aka öl töhönŋi akza. Miaŋgöra Anutu qainŋi kun aka maljan.

4 O Kembu, göhöreŋ ahakmemegi diŋdiŋi mi mönö aukŋe asuhuiga mötzin.

Miaŋgöra kantri pakpak yeŋön kaba göhö waiki memba möpöseim gihimakze.

Göŋön nangok töröŋi akzan. Miaŋgöra aka daŋön mönö göhöra keŋgötŋi qahö mötpawak? Körek neŋön göhö qetbuŋagi mem sehiba möpöseimakzin.”

5 [b]Miaŋgö andöŋe uba yuai kewö ehal: Suepkö möpömöpösei jikegö (tempöl) naŋguŋan taliga miaŋgö uruŋe Anutu dangunuŋaŋgö opo seri jikeŋan kini ehal. 6 Möpömöpösei jike miaŋgöreŋök Suep garata 7 lömböt kanjamŋinambuk 7 memba kingeri, yeŋön mönö eta aukŋe kaget. Malukuŋini tuat lalamŋi bilikbilikŋinambuk löŋgötketka opo jöhan maŋgihilakŋi goulŋambuk mi örigit ewö töptöpŋe embahöm aŋguba kinget.

7 Yeŋön kagetka bem jembon 4 mieŋgöreŋök kunŋan goul qambi 7 eŋgiiga Anutugö irimsesewölŋan qambi mi numbuŋe kotket. Anutu irimŋi seholizawi, yaŋön mala kota malja aka teteköŋi qahö mal öŋgöma. 8 [c]Qambi mi eŋgiiga Anutunöŋ asakmararaŋi aka kukösumŋi kondeliga miaŋgöra köwak pukpuköba möpömöpösei jike (tempöl) kokolak qeiga kunŋan kun Suep jike mi öŋgö-öŋgögö dop qahö ahök. Suep garata 7 yeŋön mutuk qambiŋini mokogetka lömböt kanjamŋinambuk 7 asuhuba ölŋinambuk akŋei, miaŋgö andöŋe ölöp kunbuk öŋgöme. Mewö.

<- Indelindel 14 Indelindel 16 ->