1 Israelnöŋ sukinap yuaiŋi pakpak kölolohoba memba wahöta köna anök. Anda Berseba mire aŋgota kinda miaŋgöreŋ iwiŋi Aisakö Anutuŋaŋgöra umjöwöwöl ohoyök. 2 Mi ohoba suŋgem ahöiga jeŋi meleŋniga imut eka miaŋgöreŋ Anutunöŋ Israelgöra keu jiba qetŋi “Jeikob, Jeikob!” qeriga “Ni ki,” jiba meleŋnök.

3 Meleŋniga kewö jiyök: “Ni Anutu, göhö iwigahö bemŋi. Gi Ijipt gemamgö keŋgötki kude mötman. Nöŋön miaŋgöreŋ kötuetköm gihibiga könagesö kambu ketaŋi akŋe. 4 Nöŋön mönö göbuk Ijipt gemam aka mewöyök gwölönarökurupki miaŋgöreŋök eŋguaŋgitpiga kunbuk liliŋgöba kame. Göŋön kömunöŋga Josef nanŋi böröŋan mönö göhö je jupki kusui etma.”

5 Miaŋgö andöŋe Jeikobnöŋ Berseba miri mosötpin jiiga Israelgö nahönurupŋan iwiŋini aka anöm-moröurupŋini mi közözohom eŋgigetka hosgö karenöŋ öŋgöget. Farao kiŋnöŋ hosgö kare miaŋön eŋgömemba kamegöra jiba ali memba anget. 6 Sukinapŋini aka miri sömbupŋini pakpak Keinan gölmenöŋ mala buŋa qeba memba malgeri, mi tok mohotŋe memba anget. Jeikob aka gwölönarökurupŋi pakpak mieŋön mewö Ijipt anget.[a] 7 Gwölönarökurupŋi pakpak, isimoröurupŋi azi aka ambi mi körek eŋguaŋgita Ijipt anget.

8 Israel qetŋi alaŋi Jeikob aka yaŋgö gwölönarökurupŋi Ijipt angeri, yeŋgö qetŋini kewö: Jeikobkö nahönŋi mutukŋi Ruben. 9 Rubengö nahönurupŋi qetŋini Hanok, Palu, Hezron aka Karmi. 10 Simeongö nahönurupŋi qetŋini Jemuel, Jamin, Ohad, Jakin, Zohar aka Saul. Saulgö namŋi mi Keinan ambi kun. 11 Liwaigö nahönurupŋi qetŋini Gerson, Kohat aka Merari.

12 Judagö nahönurupŋi qetŋini Er, Onan, Sela, Perez aka Zera. (Er aka Onan yetkön lök Keinan gölmenöŋ kömuyohot.) Perezkö nahönyahötŋi mi Hezron aka Hamul. 13 Isakargö nahönurupŋi qetŋini Tola, Puwa, Jasub aka Simron. 14 Zebulungö nahönurupŋi qetŋini Sered, Elon aka Jalel. 15 Jeikobkö nahönurupŋi anömŋi Leanöŋ Mesopotemia (Padan Aram) gölmenöŋ eŋgömeyöhi, yeŋgö qetŋini mewö. Böratŋiri Daina mi mewöyök meyök. Jeikob aka Lea yetkö isimoröurupŋiri mi mewö oyoŋda mindirigetka 33 ahök.

16 Gadkö nahönurupŋi qetŋini Zefon, Hagi, Suni, Ezbon, Eri, Arodi aka Areli. 17 Asergö nahönurupŋi qetŋini Imna, Iswa, Iswi aka Beria. Nenŋinaŋgö qetŋi Sera. Beriagö nahönyahötŋi qetŋiri Heber aka Malkiel. 18 Labanöŋ ambi qetŋi Zilpa böratŋi Leagö welen ambia malmapköra waŋgiyöhi, yaŋön Jeikobkö nahönurupŋi mewö eŋgömeyök. Jeikob aka Zilpa yetkö isimoröurupŋiri mi mewö oyoŋda mindirigetka 16 ahök.

19 Jeikobkö anömŋi Reizölgö nahönyahötŋi mi Josef aka Benjamin. 20 Josefkö nahönyahötŋi Ijipt kantrinöŋ asuhuyohori, mi qetŋiri Manase aka Efraim. Namŋiri qetŋi Asenat mi Heliopolis (On) taongö jike nup galöm qetŋi Potifera yaŋgö böratŋa.[b] 21 Benjamingö nahönurupŋi qetŋini Bela, Beker, Asbel, Gera, Naman, Ehi, Ros, Mupim, Hupim aka Ard. 22 Jeikobkö nahönyahötŋi Reizölnöŋ etkömeyöhi, yetkö qetŋiri mewö. Jeikob aka Reizöl yetkö isimoröurupŋiri mewö oyoŋda mindirigetka körekmakörek 14 ahök.

23 Dangö nahönŋi qetŋi Husim. 24 Naftaligö nahönurupŋi qetŋini Jaziel, Guni, Jezer aka Silem. 25 Labanöŋ ambi qetŋi Bilha böratŋi Reizölgö welen ambia malmapköra waŋgiyöhi, yaŋön Jeikobkö nahönurupŋi mewö eŋgömeyök. Jeikob aka Bilha yetkö isimoröurupŋiri mi mewö oyoŋda mindirigetka körekmakörek 7 ahök.

26 Jeikobkö isimoröurupŋi diŋdiŋi töhön yambuk Ijipt angeri, mieŋgö jaŋgöŋini oyoŋda mindirigetka körekŋanök könagesö 66 aket. Nahönurupŋi yeŋgö anömŋini mi jaŋgö miaŋgöreŋ qahö toroqeget. 27 Josefkö nahönyahötŋi Ijipt kantrinöŋ asuhuyohori, mi yahöt. Jeikobkö könagesöurupŋi Ijipt angeri, mieŋgö jaŋgöŋini mi mewö oyoŋda mindirigetka 70 ahök. Mewö.[c]

28 Könanöŋ anda mala Jeikobnöŋ Juda mutuk melaiba kewö jiyök: “Gi mönö Josefköreŋ anda Gosen gölmenöŋ anangö könaŋaŋgöra qesim waŋgiman. “Mewö jii möta anda kaiga Gosen prowinsnöŋ aŋgotket. 29 Josefnöŋ aŋgotkeraŋgö buzupŋi möta jiiga hos karenöŋ jöhöba mözözömgögetka qakŋe öŋgöba iwiŋi Israelbuk aitoŋgöbitkö Gosen gölmenöŋ anök. Anda eka yaŋgö jeŋe aŋgota böröŋi imbiŋe gili geiga aŋgum waŋgiba nalö köröpŋi titipepeŋi memba urusahöt qeyök. 30 Israelnöŋ Josef kewö jii mörök: “Göŋön toroqeba jebuk maljani, mi nanak gekzala nalö kewöŋe ölöp jöjöröba kömumam.”

31 Mewö jiiga Josefnöŋ darumunurupŋi aka iwiŋaŋgö könagesöŋi kewö jii mötket: “Nöŋön mönö Farao kiŋgöreŋ öŋgöba keu kewö jibi mötma: ‘Darumunurupni aka iwinaŋgö könagesöŋi Keinan gölmenöŋ malgeri, yeŋön lök nöŋgöreŋ kaze. 32 Darumunurupni mieŋön lama bulmakau galömŋini aka mi galöm köl eŋgiba maljeaŋgöra kabingö aka lama kambuŋini, bulmakau kambuŋini aka sukinap öröyuaiŋini pakpak mi eŋguaŋgita kaze.’ 33 Miaŋgöra Farao kiŋnöŋ eŋgoholi jemesoholŋe aŋgotketka kewö qesim eŋgima: ‘Iŋini wani nuwa memakze?’

34 “Mewö qesim eŋgiiga iŋini kewö meleŋ waŋgime: ‘Welenqeqeurupki neŋön mönö abu asaurupnini mutuk memba malgeraŋgö dop moröröpnineyök lama bulmakau galöm kölköl nupŋi memba mala maljin.’ Mewö meleŋ waŋgigetka yaŋön ölöp Gosen prowinsnöŋ tatat dumdumŋini möhamgömegöra oŋ jiiga malme. Ijipt ambazip yeŋön lama bulmakau galöm kölköl ambazip pakpak yeŋgöra mötketka imbiloŋloŋinambuk ahakze. “Josefnöŋ keuŋi mewö jii mötket.

<- Jenesis 45Jenesis 47 ->