2 Meleŋ waŋgiiga kewö jii mörök: “Mötnöŋ, ni azi namŋi aka wani nalönöŋ kömumami, mi qahö mötzal. 3 Miaŋgöra göŋön ölöp timbi liŋgipki aka kesarek gösögi memba jölömnöŋ anda sömbupkö böröjaŋ memba qeba nöŋgöreŋ kaman. 4 Kaba nene nahömŋambuk sihimnaŋgö dop ohoba mözözömgöba memba kaba niŋginöŋga nemam. Mi nemba kinda kötumötuet gihimam. Mi mutuk gihibi teköiga nöŋön miaŋgö andöŋe ölöp kömumam.”
5 Aisaknöŋ nahönŋi Isogöra keuŋi mewö jiiga Rebekanöŋ mi kezap ala mörök. Möriga Isonöŋ mosöta sömbup böröjaŋ memba qeba iwiŋi waŋgimamgöra jölömnöŋ anök. 6 Aniga Rebekanöŋ nahönŋi Jeikobköra keu kewö jii mörök: “Nahöni mötnöŋ, Iwigan datki Isogöra keu kewö jiiga mötzal: 7 ‘Gi mönö sömbup memba kaba niŋgiba nene nahömŋambuk ohoba mözözömgöba niŋginöŋga nemam. Nembagun Kembugö jemesoholŋe kötumötuet gihimam. Mi mutuk gihibi teköiga miaŋgö andöŋe ölöp kömumam.’ 8 Miaŋgöra nahöni, kezap ölöpŋanök ala mötnöŋ. Keu dölki jim kutum gihimami, gi mönö miaŋgö dop akŋan. 9 Mönö meme kambunöŋ anda miaŋgöreŋök meme (noniŋ) dömŋi kelökŋambuk yahöt memba kaba niŋginöŋga nöŋön miaŋön iwigahö sihimŋaŋgö dop numbu nene nahömŋambuk ohoba mözözömgömam. 10 Ohoba mözözömgöbiga memba anda iwigi waŋginöŋga nemba kötumötuet gihibawak. Miaŋgö andöŋe ölöp kömuma.”
11 Mewö jii möta namŋi Rebekagöra kewö jiyök: “Namni mötnöŋ, datni Isonöŋ sile jupŋambuk akzapmö, nöŋgö silenan solanŋi akza. 12 Iwinan ni nömisiriba mötpawak ewö, ni yaŋgö jemesoholŋe tilipqilip azi tandök asuhubiga möt niŋgibapuk. Mewö möt niŋgiiga kötumötuet qahöpmö, jimqesuak öröbi nani qakne öŋgöbapuk.”
13 Mewö jiiga namŋan kewö jii mörök: “Nahöni, jimqesuak gihibawahi, miaŋön mönö ölöp nöŋgö qakne öŋgöma. Göŋön mönö töndup keu jizali, mi möt tem köla anda yuai mi memba kanöŋ.”
14 Mewö jiiga anda meme (noniŋ) yahöt memba kaba namŋi waŋgiyök. Waŋgiiga nene nahömŋambuk iwiŋan sihimŋi möröhi, miaŋgö dop ohoba mözözömgöyök. 15 Ohoba nahönŋi mutukŋi Isogö opo malukuŋi ölöp kötökŋi opo köweŋe galöm kölöhi, mi memba nahönŋi könaŋgepŋi Jeikob waŋgiiga löŋgörök. 16 Löŋgöriga meme (noniŋ) sileŋi mi memba böröŋi köpeiba jölŋi solanŋi esuhuyök. 17 Esuhuba nene nahömŋambuk aka bered ohoyöhi, mi memba Jeikobkö böröŋe alök.
18 Aliga memba iwiŋaŋgöreŋ anda “Iwini!” jiyök. Jiiga kewö meleŋnök: “O nahöni, gi daŋön?”
19 Mewö meleŋniga iwiŋaŋgöra kewö jii mörök: “Ni nahöngi mutukŋi Iso. Jim kutum niŋginöŋi, ni mönö miaŋgö dop ak teközal. Ölöp wahöta tata sömbupni memba kazali, mi nemba kötuetköm niŋgiman.”
20 Mewö jii möta nahönŋi kewö qesim waŋgiyök: “Nahöni, mi mönö denöwö könöpuk miwikŋaizan?” Qesim waŋgiiga kewö meleŋnök: “Anutu, göhö Kembugan mönö bauköm niŋgiiga mi zilaŋ miwikŋaizal.”
21 Mewö meleŋniga Jeikobköra kewö jiyök: “Nahöni, gi ölŋa nahöni Iso akzan me qahö, mi mötmamgöra mönö ölöp kösutne ki kanöŋga gömisirimam.” 22 Mewö jiiga iwiŋi Aisakö kösutŋe aniga misirim möta kewö jiyök: “Imbi jölgan Jeikobkö imbia akzapmö, börögan Isogö böröŋi ewö.” 23 Böröŋi jupŋambuk datŋi Isogö börö tandök ewö ahöhaŋgöra Aisaknöŋ i qahö möt kutum waŋgiba kötuetköm waŋgimamgöra ahök. 24 Töndup kunbuk kewö qesim waŋgiyök: “Gi ölŋa nahöni Isoya me qahö?” Qesim waŋgiiga kewö meleŋnök: “Ni mönö Isoya.”
25 Mewö meleŋniga kewö jiyök: “Nahöni, ölöp sömbupki tosatŋi niŋginöŋga nemba kötumötuetni gihimam. “Mewö jiiga mi waŋgii neyök. Neiga wain o tosatŋi mohotŋe mokoba waŋgii neyök. 26 Nemba kinda nahönŋaŋgöra kewö jii mörök: “Gi ölöp kösutne kaba numbuni yöhötim neman.”
27 Mewö jii möta kösutŋe anda numbuŋi yöhötim neyök. Neiga opo malukuŋaŋgö wörönŋi möta kötuetköm waŋgiba kewö jiyök: “Aha nahöni, Kembunöŋ urukisigö jölömŋi kötuetköi ahözawi, nöŋgö nahönaŋgö sile qösösökŋi ölöpŋan mönö mi ewö aiga mötzal.*Hib 11.20 28 Anutunöŋ mönö suepkö umjijilŋi aka gölmegö töhötmöriamŋi tököm gihiiga yaka yöhagi, sehoŋ padigi aka wain o yuaigi mi önöŋi qahö asuhum sehime. 29 Kantriŋi kantriŋi yeŋön mönö welen qem gihiba malme. Könagesö kambuŋi kambuŋi yeŋön mönö simin köl gihiba malme. Göŋön mönö nani nahönurupni mi kembu ak eŋgiba malman. Namgahö nahönurupŋan mönö simin köl gihiba malme. Kunŋan qesuahöm gihimawi, qesuaknöŋ mönö yaŋgö qakŋe öŋgöma. Kunŋan kötuetköm gihimawi, kötumötuetnöŋ mönö yaŋgö qakŋe öŋgöma. “Mewö.*Jen 12.3
32 Mewö jiiga iwiŋi Aisaknöŋ kewö qesim waŋgiyök: “Gi daŋön?” Qesim waŋgiiga kewö meleŋda jiyök: “Ni nahöngi mutukŋi Iso.” 33 Mewö jiyöhaŋgöra Aisaknöŋ töwöratiba sile jönömŋi gwötpuk unduiga kewö jiyök: “Gi qahö kanöŋga miaŋgöreŋ böröjaŋ azi kunöŋ sömbup memba kaba niŋgiyöhi, mi mönö daŋön? Yaŋön mi niŋgiiga nemba kötumötuetni lök waŋgim teközal. Mi waŋgim teközalaŋgöra miaŋön mönö ölŋa yaŋgö qakŋe ahöm öŋgöma.”
34 Isonöŋ iwiŋaŋgö keu jitŋi mi möta urukömbuk aka amburereŋ memba silata sahöta iwiŋaŋgöra kewö ulerök: “Iwini, nia mönö mewöyök kötuetköm niŋginöŋ.”
35 Mewö ulerökmö, iwiŋan meleŋda jiyök: “Mungan mönö tilipqilip qakŋe kaba göhö kötumötuetki taköba memba anja.”
36 Mewö jiiga Isonöŋ kewö jiyök: “Munan mönö indimŋi yahöt tilipköm niŋgiiga maljal: Yaŋön mutuk asuhuyalaŋgö qetbuŋaŋi mi mutuk noaŋgit teköyök aka merak nöŋgö kötumötuetni mi mewöyök taköba noaŋgita meza. Miaŋgöra qetŋi Jeikob (tilipqilip azi) qerakzini, mi mönö dopŋe akza. Kötumötuet kun mönö nöŋgöra ahöm gihiza me qahö?”*Jen 25.29-34
37 Mewö jiiga iwiŋan Isogöra kewö meleŋnök: “Mötnöŋ, nöŋön mungi göhö azi kembugi malmapköra kuŋgum waŋgizal. Tinitosolomurupŋi pakpak yeŋön i welen qem waŋgiba malmegöra jim kutum eŋgizal. Yaka yöha, sehoŋ padi aka wain o yuai mi lök jim teközalawa Anutunöŋ mi waŋgiba malma. O nahöni, wanat kötumötuetna kun toroqeba ahöm niŋgizawa mia gihibileŋak? Mi mönö osizal.”
38 Mewö meleŋniga iwiŋaŋgöra kewö jiyök: “O iwini, kötumötuet mohok-kun miyök mönö ahöm gihiza me denöwö? O iwini, mönö nia kun kötuetköm niŋginöŋ. “Mewö jiba könahiba silata sahörök.*Hib 12.17
39 Sahöriga iwiŋan kewö meleŋda jiyök:
41 Iwiŋan Jeikob kötumötuetŋi waŋgiyöhi, Isonöŋ miaŋgöra aka könahiba munŋi uruönön möt waŋgiba malök. Nanŋi uruŋan mewö möta alaŋi kungöra kewö jiyök: “Iwiniraŋgö kömupŋaŋgö nalöŋan töriza. Yaŋön kömuiga sahöt jiŋgeŋ nalöŋe miaŋgöreŋ ölöp muni Jeikob qebi kömuma.”
42 Isogö mötmötŋe mewö ahuiga kunöŋ miaŋgö buzupŋi möta Rebekagöreŋ anda jii möta nahönŋi könaŋgepŋi Jeikobköra keu ali anda waŋgita kaiga kewö jiyök: “Mötnöŋ, datki Isonöŋ mönö likepŋi meleŋni qake öŋgöiga guhui kömumangö mötmöriza. 43 Mewögöra nahöni, nöŋön keu jimami, mi mönö tem kölman. Mönö dölki wahöta ölöŋ köla Haran mire neni Labangöreŋ anman. 44 Anda yambuk nalö tosatŋi toroqeba malnöŋga datkahö urupikŋan amörima. 45 Uruönönŋi amöriba eriga yuai ak waŋginöŋi, mi ölum qeigun nöŋön miaŋgö andöŋe göhöra keu albi kaiga goaŋgita kame. Yaŋön guhui kömunöŋga kunŋan i qei kömumbapuk. Mönö wanigöra nalö mohok miaŋgöreŋök öröröŋ qahöwahotka etkömosötpileŋbuk. “Mewö.