Jongöreŋ Kimbi 2
Jonöŋ Kimbiŋi aliga 2 ahök.
Jim-asa-asari
Buŋa Kimbi kiaŋgö toŋi yaŋön nanŋi qetŋi “Jitŋememe kun,” qerök. Yaŋön kimbi mi “Wölböt ambi aka yaŋgö nahönböraturupŋi,” yeŋgöra alök. Keu tölapŋi mi urumeleŋ könagesö kungö söpsöp keuya. Nahönbörat mi könagesö aiga wölböt ambi mi yeŋgö galömŋina. Buŋa Kimbigö keu töröpŋi kiaŋön jöpaköm aŋgubingöra uru kuŋgum neŋgimakza aka böhi takapulakaŋi yeŋön ambazip kusum eŋgigetka keuŋinan sehibapukö galöm meme keuya akza.
Buk kiaŋgö bahöŋi bohonŋi 4 mi kewö:
Keu mutukŋi 1-3
Urukalem mi yuai bohonŋi 4-6
Keu goŋgoŋan sehibapukö galöm meme keu 7-11
Kimbigö keu kötŋi bohonŋi 12-13

1 O ambi sorok!

Anutunöŋ möwölöhöm gihiiga urumeleŋ könagesöurupki galöm köl eŋgiba kinjan. Nöŋön iŋini keu ölŋaŋgö dop uru könömnan jöpaköm eŋgimakzal. Nanök qahöpmö, ambazip keu ölŋi möt kutuzei, körek yeŋön mönö mewöyök iŋini jöpaköm eŋgiba malje. Nöŋön jitŋememeya akzal aka göbuk keu eraum mötpitköra kaba kimbi ohozal. 2 Keu ölŋan urunine kinja aka nembuk teteköŋi qahö ahöm öŋgöma. Nöŋön Buŋa keu miaŋgöra aka jöpaköm eŋgizal.

3 Nini keu ölŋi wuataŋgöba urunöŋ jöpaköm aŋguba maljin ewö, Iwi Anutu aka Iwigö Nahönŋi Jisös Kraist yetkön mönö ak kömumba kalem möriam neŋgiyohotka luainöŋ malbin.

Urukalem aka keu ölŋi mi mohotŋe wuataŋgöme.

4 Iwinöŋ urukalemgö jöjöpaŋ keuŋi neŋgiyöhi, miaŋgö dowök göhö könagesöurup tosatŋan keu ölŋaŋgö dop ahakmemeŋini aka memba malje. Nöŋön silikŋini mewöŋi ekiga sösöŋgai ketaŋi ak niŋgimakza. Mewö.

5 *Jon 13.34; 15.12, 17O wölböt alani ambi ketaŋi, nalö kewöŋe jöjöpaŋ keu ohom gihizali, mi keu dölökŋi qahö. Keu könakönahiŋeyök könahiba mörini, nöŋön mönö keu mi kunbuk ohoba kewö qesim gihizal: Nini mönö uruninan jöpaköm aŋguba malbin. 6 Jöpaköm aŋguba malbingö keuŋi jizali, miaŋgö ölŋi kewö: Nini mönö Anutugö jöjöpaŋ keuŋi pakpak tem köla ahakmemenini ak memba malbin. Körek eŋön jöjöpaŋ keu könakönahiŋeyök möta malgeri, mi kewö: Iŋini mönö uruŋinan jöpaköm aŋguba malme.

7 Isimkakalek ambazipnöŋ Jisös Kraistköra kewö jim miwik-ŋaimakze: “Amötqeqe Toŋan gölme azi silebuk asuhumamgö osiyök.” Mewö jim miwikŋaiba tilipqilip aketka eŋololoŋ asuhumakza. Ambazip isimkakalek mewöŋi mi Kraistkö salupŋe kinda tuarenjoŋ ak waŋgimakze. Ambazip mewöŋi gwötpukŋan lök gölmeŋi gölmeŋi liliköba laŋ anda kaba malje. 8 Neŋön urugö nup meinga ölŋi uruŋine asuhuyöhi, miaŋön sohoba pömsöm qebapuköra mötzal. Miaŋgöra isimkakalek ambazipnöŋ eŋololoŋ ak eŋgibepuköra mönö galömŋini mem aŋguba malme. Mewö malgetka uruŋinaŋgö ölŋan qahö sohoiga Kembunöŋ töwaŋini körek eŋgim teköma.

9 Kraistnöŋ keu kusum neŋgiyöhi, kunŋan mi qahö qekötahözapmö, mi oŋgita keu toroqeiga loloŋqaloŋ jimakzawi, yaŋön Anutuŋi qahö. Denike yeŋön Kraistkö Buŋa keuŋe qekötahözei, yeŋön mönö Iwi aka Nahön yetpuk köhöiba malje. 10 Kunöŋ Buŋa keu jömukŋi mi qahö memba eŋgöreŋ kazawi, iŋini mönö yaŋgö jölöŋi kude jiba miriŋine kude örögetka öŋgöma. 11 Kunŋan yaŋgö jölöŋi jimawi, yaŋön mönö bölöŋamŋaŋgö lömbötŋi öröi qakŋe öŋgöiga öröröŋ bisimahot. Mewö.

Keu teteköŋi

12 Nöŋön eŋgöra keu sehisehiŋi ohomamgö sihimŋi mötzalmö, mi papia sinŋe iŋknöŋ ohomamgö qahö möta mosötzal. Eŋgöreŋ kusuk kaba mesohol köla keu eraum mötpingö mamböta jörömqöröm akzal. Aitoŋgöbini, nalö miaŋgöreŋ köisirik tata eraum möta sösöŋgainini körek ahum teköba urunini kokolak qeiga malbingö mötzal.

13 Anutunöŋ ambi alagi galöm nupköra möwölöhöyöhi, ambi sorok yaŋgö könagesöurupŋan yaizökzökŋini algetka göhöreŋ kaza.