1 Anutunöŋ ak kömum neŋgiyöhaŋgö dop nup ki qaknine ali memakzini, miaŋgöra mönö böŋ kininga uruninan qahö etma. Qahö! 2 Neŋön nup memegö köna tölapŋi gamuŋinambuk mi körek andö qein. Tilipqilip qahö aka Anutugö keuŋi qahö möwöramgömakzinmö, keu ölŋi mi aukŋeyök alakzin. Mewö Anutugö jemesoholŋe ambazip uruölöwak möt neŋgimegöra kininga jim ölöwak keuninan asuhui körekŋan keunöŋ törörök jim neŋgibingö osimakze.

3 Mewö ahakzinmö, iŋini tosatŋan kewö jimakze, “Polnöŋ Ölöwak Buŋaŋi mi esuŋambuk jimakza.” Mewö jibileŋak ewö, esu miaŋön könöp sianöŋ gemei, mönö yeŋgö uruŋine ahöba miaŋgöra gwözöŋniga qakömakze.

4 Kraistnöŋ Anutugö imutŋi akza. Kraistkö aködamunŋi mi nanŋi Ölöwak Buŋaŋan indela asakŋi ewö asarimakzapmö, yeŋgö jeŋinan ömuŋ köli jipjap ahakza. Nalö kewöŋe bölöŋaŋgö Kembuŋi gölme dop galöm köl eŋgimakzawi, yaŋön urumeleŋgö kopa ambazip yeŋgö mötmöt jeŋini mem gömöliiga laŋ malje. Miaŋgöra Ölöwak Buŋagö asakŋi ek asaribingö osimakze.

5 Nani qetbuŋanan qarimapkö Buŋa keuŋi qahö jim asarimakzalmö, eŋön Kembu Jisös Kraistkö könaŋi möta jitŋi tem kölmegöra uru kuŋgum eŋgimakzal. Neŋön Kembugö jitŋi wuataŋgöba iŋini welen qem eŋgimakzin. 6 *Jen 1.3Könaŋi kewögöra welen qem eŋgimakzin: Anutunöŋ mutuk kewö jim kutuyök, “Asaknan mönö söŋaup qeiga asarima.” Mewö jiyöhaŋön mönö Buŋaŋaŋgö asakŋi ali urunini qeiga asariyök. Kraistnöŋ ahakmemeŋi aka meiga Anutugö asakmararaŋan jemesoholŋe asarii ekeri, Anutunöŋ nini miaŋgö könaŋi möt kutubingöra kapaŋ kölakza. Asakŋaŋgö könaŋi jim sehibingöra aka asakŋi mi neŋgiyök.

7 Asakŋan urunini qei asariinga mötkutukutu miaŋgö bohonŋi mi milyön kina oŋgita öŋgöŋgöŋi akzapmö, silenini mi kouraŋen ewö amqeba julakza. Anutu asakŋan mönö sile mewöŋaŋgö uruŋe ahöza. Ambazipnöŋ miaŋgö könaŋi ekŋegöra Anutunöŋ areŋi al neŋgiyök. Dopkeu miaŋgö könaŋi kewö: Kukösum önöŋi qahö al neŋgimakzawi, mi neŋgöreŋök öne asuhumakzawaŋgö dop qahöpmö, Anutunöŋ mönö miaŋgö Toŋi akza.

8 Eu emu likep likep miaŋgöreŋök lömböt könaŋi könaŋi qaknine öŋgöba qölölömbörim neŋgigetka wahöjaliŋ mörakzin. Mi mörakzinmö, töndup mieŋön qahö qözöjahöm neŋgigetka erakzin. Nalö tosatŋe juŋ ewö waŋgömŋe qaköba köna qahö miwikŋaimakzinmö, töndup tötböröm qahö ahakzin.

9 Ambazipnöŋ sesewerowero ak neŋgimakzemö, Anutunöŋ andö qahö neŋgumakza. Ambazipnöŋ mulumgöm neŋgimakzemö, töndup qahö ayuhumakzin. 10 Jisös qem kömugeri, miaŋgö dop nini mewöŋanök buŋaŋi jim sehimakzinaŋgöra aka neŋguget kömumbinbukö möta anda kaba maljin. Jisösbuk mal köhöininga inahöm neŋgimakzawi, ambazipnöŋ miaŋgö könaŋi möt kutumegöra aka mewö malbingö urumohot akzin.

11 Gölmenöŋ jebuk mala Jisösgö nupŋi memakzinaŋgöra aka nalö dop kömumbingö dop akzin. Sileninan kömumawaŋgö dop akzapmö, Jisösnöŋ urunine mal köhöiba silenini mem gulimakzawi, ambazipnöŋ miaŋgö ölŋi ek asarimegöra aka kinjin. 12 Nini nalö dop sihimbölö möta kömumbingö dop ahakzinmö, nöŋön eŋgö sutŋine nup memba malali, eŋön miaŋgöra aka guliba malmal köhöikŋe aŋgota mal öŋgöme.

13 *Sum 116.10Sumbara (Sam) kunöŋ keu kewö ohoget ahöza, “Anutu möt nariba kömupnöhök meköm niŋgimapkö köuluköba malal.” Neŋön keu miaŋgö dop kömupnöhök meköm neŋgimapkö möt narizin. Mötnaripkö Uŋa Töröŋi miyök buŋa qem aŋguzinaŋgöra neŋön mönö mewöyök keunini jiba köulukömakzin. 14 Anutunöŋ Kembu Jisös mem gulii kömupnöhök wahöröhi, yaŋön mönö nini mewöyök mem gulim neŋgii wahöta Jisösbuk öŋgöinga jemesoholŋe al neŋgii embuk mohotŋe mal öŋgöbin. Mi mötzinaŋgöra aka keunini jiba köulukömakzin.

15 Keunini jiba köuluköinga Anutugö kalem möriamŋan toroqeba ambazip sehisehiŋi dop köl eŋgima. Mewö aiga yeŋön amqeba Anutu keleŋmaleleŋ möpöseigetka qetbuŋaŋan sehimakza. Eŋön mewöyök Anutu möpöseim sehimegöra mötzal. Miaŋgöra lömböt könaŋi könaŋi bisiba aum-möriba maljin.

16 Nini mem gulim neŋgimapkö möta mönö böŋ qeba kininga uruninan qahö etma. Ölŋa silenini ewö waziba soholimakzinmö, mi töndup urunini ewö nalö dop kölöŋaimakzin. 17 Mi kewögöra: Gölmenöŋ kahasililiŋ nalö töröptökŋi möta malbinmö, miaŋgö andöŋe asakmararaŋ önöŋi qahö miwikŋaiba teteköŋi qahö oyaeŋkoyaeŋ malbin. Asakmararaŋ aka kahasililiŋ yahöt mi kewöt etkiinga asakmararaŋ miaŋön mönö öŋgöŋgöŋi aiga gölmegö kahasililiŋ könaŋi könaŋi mi möringa awamŋi aka eretŋi akza.

18 Ambazip aka öröyuai jenöŋ ehekŋi mi nalöŋini teköi ayapkömemö, Suep mirigö öröyuaiŋi nalö kewöŋe qahö ehakzini, mieŋön mönö nalö teteköŋi qahö ahöm öŋgöme. Miaŋgöra neŋön jeninan ehekŋi mia qahöpmö, qahö ehekŋi mönö mieŋgöreŋ göröken uba eŋgehakzin. Mewö.

<- 2 Korint 32 Korint 5 ->