HEBREUS 8

Iwelo tâdâseinwândo ume Deus enado kynynâ agueim Jesus

1 Kywâgâ agueim Jesus awyly mâuntudyzemo wato, Deus enado kynynâ adâkeze mâkâ. Târâ kaynâ mâkâ ekadybyem awyly, tynreim ejidydâ, Deus ton-honreim eahoru eynynâ. 2 Saguhoem kurâdo eynynâ Deus agâ aguewâni modo iwymâry kuru tâwanu anhedyly mykâinane âtâ tâjitubygue itâdyby sahomery oday Deus Âepanâguehodâ. Iwerâ olâ Jesus Deus enado kynynâ aguely, âji Deus anhetybydâ.

3 Kurâ domodo eynynâ aguewâni modo iwymâry kuru iduakely, Deus iomazehoem xuduypy modo, ânguydo imeom inakanhe adâjitobyry xygakehoem xyâypy warâ Deusram egamenriem. Âdy eyam nhegamely peba kulâ Deus Âepanâgueho odaji negawântaymba mykâinane. Arâ lâpylâ kynynâ Deus agâ agueim Jesus âdype awyly, Deusram tiengamehoem. Awylygue myakâwâm tâwâlâ âtuly, inakanhe aguitobyry xygakehoem. 4 Tarâ onro anaynlâ Jesus watay, Deus ety oday kynynâ aguenriem nitaymba tâise; ânguydo imeom nhunru negameba tâise warâ, Judá iwerypyry awylygue. Levi iweompyry modo lelâ mawânkâ Deus ety oday âsewanirim, Deus xurâem satyby emakerim, kâzewenry ara.

5 Iwerâ Deus enado Jesus anhekyly emyenro mawânkâ kurâ domodo eynynâ Deus agâ aguewâni modo iwymâry kuru anhekyly, âzekiba kehoemba olâ. Arâ lâpylâ âtâ Deus etyem itâdyby, târâ Deus eydâ ato donro ekudo lâpylâ awyly, eara kehoemba olâ. Warâ myakâwândy Deus, Moisésram aguely târâ iwy wâgâ, âtâ Deus xyrento saunâdyly saguly iraynâ: “Âdaunlo âtâ awyly kâenehon-hombyry ara kehoem iety itânehongâ” kely myakâwândy eyam. 6 Deus, Jesus âwanu anhekylyem aguehobyry koendonro kuru, Deus ety oday kurâ domodo eynynâ aguewâni modo iwymâry kuru anhetyby takaze kehoem. Iwelo tâdâseinwândobyry, kydamudo agâ saguhoem âseinwândobyry takaze koendonro kuru keim mâkâ. Takaze koendonro kuru, tâkeze urâ, mârâ saguhobyry einwânnipyry modoram “Koendonro xuduze urâ” kehobyry mawânrâ ise kienmakely.

7 Saguho tâzezewenry koendâ lelâ einwândyly-ro watay, iwelo tâdâseinwândo Deus anientaymba tâise. 8 Saguho tâzezewenry tynynonro modo neinwâmpyra awyly tiuntuduo myakâwândy Deus aguely:

“Sainse Israel donro modo agâ, Judá donro modo agâ warâ iwelo tâdâseinwândo agânheto.

9 Egitodâba idamudomo kâentyday eagâmo kâseinwândobyry ara inkâba ise,

xirâ iwelo tâdâseinwândo eagâmo agânhekyly,

Mârâ ume tâmayne kehoem akâwâm akaemo târâpa kâentylymo,

tâjiunwym tymery emary wâgâ sawâni ara.

Eagâmo kâseinwândobyry araba olâ akâwâm aidylymo.

‘Amyguehobyry einwânse xina’ keypyem,

kâunrutomobyry araba kulâ akâwâm aidylymo.

Yeinwâmpyra atomobyry wâgâ akâwâm ‘Tâwâlâ pylâ itaungâ’ uguely.

10 Israel domodo agâ tâdâseinwândo iwelo agânheto saintuo warâ ise agânhedyly:

Kâunrutomo koendâ nhutuhomoem aiese urâ,

yeinwântomoem aienehonze urâ-ro warâ;

mârâ tâzezewenry iodaymo,

nhangahumo oday warâ iwenibyem awyly-ro waunlo ara kehoem ise,

âdaunloenlâ nenanânehomba itomoem.

IDeusrymo ise urâ, ynynonro modo ise akaemo-ro warâ.

11 Ânguy ywâgâ nenomedâdondaymba ise;

idânârâ utudâmo lelâ awylygue,

‘Kywymâry Deus xutuwâdaungâ’ ânguy kewâpyra ise.

Pymâdo, kurâdo âdy modo warâ utuzemo.

Kurâdo âdy keba modo utuzemo lâpylâ warâ.

Ânguy utudânry lâpeba ise.

12 Idânârâ inakanhe aitomobyry xygakeze urâ.

Âdaunloenlâ kâenanâgueondaymba ise urâ izepa wato anhetomobyry”

kewândymy Deus, warâ itaumbyry iwenibyem awyly.

13 Iwelo tâdâseinwândo wâgâ Deus agueduo, saguho tâdâseinwândobyry ton-honremba ienipyryem tawylylâ Deus agueho. Mârâ saguhobyry xuzadylylâ ise-ro warâ.

<- HEBREUS 7 HEBREUS 9 ->