3 Ioluano Vou nei napano ajian ban kiniou nua beamu, naina naruei nemijevio, neberialio ban kamiu. Kiano iliano na tortoru nalo aberii Kristo, napano naio mila be verare ga ka Tirikariano Moruo berialio nua ruei ka mia naio rilaio, bogo napano naio maka rimei vo. Ban jibe nei, ber Kristo, naio m̃aro bior kito kar kiado kariano nalo, 4 Mat 12:40; Im̃auo 2:24-32karina amidu naio joa buluvae, mia iorou ka kiano bogoti tolu nene naio jumolu meul bereio, 5 Luk 24:34, Mat 28:16,17; Mak 16:14; Luk 24:36; Jon 20:19a iorou ka naina naio miyotuba beamu kean Kevas mirano, karina, miyotuba bereio kean nalo duelimo ba juo [12] miralo. 6 Kar iorou ka naina, bogo tai naio miyotuba bereio kean taara tai na namoneano nalo miralo, jovulu toromomou jimo [500], napano miroano ka nalo ameul kia bokar banei, mia tealo am̃arm̃aro ruei. 7 Bisi na, naio miyotuba bereio kean Yemesi mirano, karina miyotuba kean atevi nalo miralo, 8 Im̃auo 9:3-6a iorou ka nina ban bereio ea vio mave. Kiniou maka noto ka bogo na, mia siva toru napano kario, Tubo miyotuba vaarakurano bereio, napano naina maariano laka, miyotuba kean miraku. 9 Im̃auo 8:3Maka nememedu ka naio rila tibe na van kiniou, bior napano ea atevi nalo nonovio, kiniou nojo yetano kanio, a maka navare ka sio na leleio, bior napano nua, kiniou naruei nojo nomijil nalo na taara na Atua kiano namoneano nalo. 10 Mia Atua be tiniememi toru ban kiniou, bitirilar kiniou ea vio nei napano nojoaio vonganei, a naio be tiniememi ka kiniou jibe na bior titai, bior napano nela kiano im̃auano telabo na tortoru. Ee, p̃eli nemijikia never ka nemila im̃auano nalo jovulu nalo dolu nonovio, mia maka kiniou napano nomim̃au, mia Atua kiano tiniememiano nei naruei napano joa kiniou, naio naruei mila im̃auano jel ea kiaku meuliano. 11 Mia maka noto nosidomii laka never nomim̃au jum̃abe, p̃eli atevi dolu nalo amim̃au jum̃abe, mia vite na toru na jibe na, ka kumemi numioliolu ka Ioluano Vou ban kamiu, a kamiu kumoneaio.
12 Naruei bogo napano numioliolu ka ban kamiu jibe na, nuberialio meravo vatitig nuber Kristo, naio m̃aro, mia karina meul bereio. A bior napano numila jibe na, nomiilo toru ka nomijog ka kamiu tealo aju aberver bogo napano ram̃arm̃aro, ativin kito, a mia ram̃aro bo garuei, maka rojikia romeul bereio bogo tai. 13 Jidomiano na maka rimemedu, bior napano ver atu aver ka maka toro tai rijikia tumolu bereio, nioti nene berinavo Kristo bunu maka tumolu bereio. Mia maka leleio, Atua bitirilar naio meul bereio ruei. 14 Ver naio vitirilar re Kristo, rila na numitu numioliolu ka Kristo ban kamiu ka kurano, a kamiu bunu, kumonea naio ka kurano ga. 15 A ver tibe na, rila na bogo napano numioliolu ban kamiu nuber Atua bitirilar Kristo meul bereio, p̃eli numila sibi toru ea Atua siano, p̃eli numitu nuberloglog kamiu ka vite tai napano maka ve riano. 16 Ver be riano ka toro napano m̃aro maka riijikia rimeul bereio, nioti nene ber ka Kristo bunu maka rijikia rimeul bereio. 17 A ver Kristo rim̃aro to kia ga tibe na vo, nioti nene ber kenemiu viekouoiano be kurano, a berenio ka kenemiu kariano nalo aju keano ea kamiu. 18 A bunu, ver Kristo rimeul re bereio den nam̃ariano tibe nei, nioti nene ka kiado bilbilu nalo napano amonea mia am̃arm̃aro ruei, aban ea vio kouo ruei, bior napano maka toro tai napano rijikia rilarurlo. 19 A verver kiado moneano ea Kristo mijikia rijai kito ea yetemeriba nei ga, mia maka rijikia rijai kito ka bogo napano rom̃arm̃aro eaio. Ver Kristo maka rijikia rilarur kito ea bogo napano rom̃arm̃aro ea yetemeriba nei, mia rivova lie van kito, mia tiniedo riia kar kito mia tiniedo riia kar kito.
20 Mia makanio, maka tibe na leleio. Nemijikia never rimemedu ka be riano, Atua mila Kristo meul bereio den nam̃ariano, a bitirilar naio jibe m̃ariesi moti na namoneano nalo nonovio, napano ver ava kovio bogo tai mia Atua mijikia rilalo bunu ameul bereio den nam̃ariano. 21 Nua ea tikariano, toro moti nei Atam buru nam̃ariano binimei ea yetemeriba, mia vonganei, toro dolu nei Kristo mila meuliano bereio den nam̃ariano binimei. 22 Jakii venia napano Atam milaio, tomu nonovio na yetemeriba monoka am̃arm̃aro, mia jakii venia napano Kristo milaio, tomu nonovio na yetemeriba amijikia aleal meuliano. 23 Mia vite nonovio be kialo bogo memedu, bior napano Kristo be moti ka jumolu den nam̃ariano, mia kito namoneano nalo, mia rotu vo rivano-o vokar bogo na naio rimei bereio, naruei mia kito bunu rotumolu den nam̃ariano. 24-25 A kario ka ninei, mia naio rivar bulag niununo va bija sim̃aro nalo na yetemeriba, a mia naio ve takurano rive parinio tubo ka vite nonovio rivano-o tovulu moroano va dolu nalo, atu yetano ka jaano. Kario mia naio sian nono navenatuboiano na vite nonovio rivan bere Atua karam̃ano. 26 A ea uolu nalo napano Kristo mia tuvululo ea bogo na, nina napano naio tuvulu maariano, nina vite nei na nam̃ariano, bija kiano moroano va nalo. 27 Kristo monoka tuvulu nam̃ariano nei, bior napano iliano na beamu mave ber jibe na ruei, ber mia Atua ridu vite nonovio atu yetano ka naio. Naruei iliano nei maka river ka Atua ridu naio bereio to yetano ka Kristo, mia berii vite dolu nalo, napano mia Kristo tuvulu nonovlo. 28 Mia bogo napano Atua ridu vite nonovio atutano ka Kristo tibe na, mia Kristo, tibe Atua kenerinio, ridu naio takurano bereio totano ka Atua, ana mia rila ka Atua naio ve takurano ve Atua ka vite nonovio.
29 Navan ea bere iliano nei napano beriio ber ver kito ram̃arm̃aro, mia iorou rotumolu bereio. Ana tealo napano amonea jibe nei, aju ajidomii laka kialo bilbilu nalo napano maka lele avaruei ealo ana am̃arm̃aro. Nalo aju aber p̃eli nalo nei maka ajikia ajev meuliano, mila na nalo abaruei bereio ea kialo bilbilu nalo na sialo, napano am̃arm̃aro ruei. Aju amila jibe na bior napano ga amonea jikili ka kito ram̃arm̃aro, mia rotumolu bereio.
30 Mia be verare bunu ka kumemi. Ver kuvisidomii vonio ka venia numitu nubiviuo bogokouo nalo bogo nonovio, numitu nubar jogvaiano jibe na bior ga romonea jikili ka toro na m̃aro, mia mijikia rimeul bereio den nam̃ariano. 31 Ee bilbilu nalo, kumemi numitu numim̃au jibe na, nemijikia never memedu never kiniou nomijog jibe ka nojo nojuvan kiaku meuliano bior kamiu bogoti nonovio ga. Mia naina bo ga na, bior napano najaaro mia najaaro ka meuliano na kubokario bija kiado Tubo Yesu Kristo. 32 Mia bogo napano nojoa komeli na Eveso, veribinio nalo na vio nei ajibe ka kuli deden nalo, aju amiaboluo ka kiniou banbano-o, ana bior vaio nojo nojoko vio kalo? Nojo nomila jibe na, maka nejev vite na bo tai leleio na meuliano na yetemeriba nei, mia nojo nomila bior napano nojo nojidomii meuliano nei napano rimei iorou.
33 Mia kamiu monoka kuvitakii re jidomiano vovu nalo tibe na, ver makanio, mia iliano dolu nei rimei rive riano ea kamiu, napano ber jibe nei, ber “Jau koiel vija bilbilu va nalo, mia kialo vovaiano rila niegeniege kiamo bajago novo.” 34 Kamiu monoka kuve masou, a monoka kuvituvan kenemiu kariano nalo. Neber jibe nei, p̃eli kuberiam̃a nemila niegeniege siemiu, mia monoka never ga, bior napano kamiu tealo maka ajikia vatitig Atua kiano m̃arabo na memedu nalo leleio.
35 Mia ea tivelinio na meuliano bereio den nam̃ariano nei, mia tealo abika jibe nei, aber “Mia ala tomu nam̃ariano nalo atumolu bereio tum̃abe?” P̃eli mia avika tibe nei aver “Nalo napano am̃arm̃aro kirisiou ruei, mia atumolu bereio vija mokotenalo nalo na jum̃abe bereio?” 36 Mia vikadeniano nalo na jibe nei, abe toro kiano vikadeniano napano maka jikia vite. Ver rosidomii kurukuti likiliki nalo napano roju romebijaio, mia rojev verdop̃eiano nene. Bogo napano jau komebija kurukuti na vite tai ban ea borotano, komijikia ruei ka mia kurukuti nene monoka riminunu, monoka rim̃aro, mia iorou, mia toti vou mijikia moluo eaio. 37 Vite napano komebijaio, naio be kurukuti tai ga napano mia toa borotano, mia vite napano mia rimoluo rive terivou bereio, naio be todolu tai. 38 Jibe napano kojo komebija kurukuti kinkin nalo, naruei Atua mila abe kialo toti vou kinkin nalo, 39 a beverare bunu ka tenalo napano ameul, napano mokotenalo nalo abe ve dolu kalo. Sunbue dolu tai joa toro mokotenano, a temeul nalo na tano, na tei, p̃eli na vio yauo, nalo abe kialo sunbue kinkin nalo. 40 Ana temeul nalo nei, mokotenalo kinkin nalo abe dolu laka ka mokotenano vite kinkin napano aju tiniabene, 41 jibe m̃erenio, a siberio, a m̃arvitano nalo. Ea nalo tolu nei, tai mirano dolu ka tai, a be verare bunu ka tivelinio na m̃arvitano nalo, napano tai, mirano dolu ka tai.
42 Mia vite nalo nei nonovio, romial ka Atua mila abeve dolu laka, a tena jibe kijokijo tai na mokotenado vou, napano kito napano ram̃arm̃aro, napano romijikia rodu bogo ka rotumolu romeul bereio. Mokotenado rivan ea bulukup̃ili na borotano, tibe kurukuti tai napano amebijaio, napano monoka riminunu, mia iorou, mokotenado vou napano riyotuba, mia maka rijikia rimei rivova bogo tai. 43 Mokotenado napano ban ea borotano, romialio bova, a buru kokorovio, ana mokotenado vou napano riyotuba iorou, mia roialio kirinovo, jikili vatitigio. 44 Vite napano van ea borotano, naio be terati na kito ea tivelinio na mokotenado ga, mia vite napano riyotuba iorou, naio be terati na kito ea tivelinio na niunudo. 45 A bunu, romijikia rosidomii toro moti nei napano Atua jiio, napano be Atam, bija Atam na maariano napano midu joa yetemeriba, napano be Kristo. Iliano tai berenio ber Atam, Atua jii naio binimei bija mokotenano tai napano meul, ana Kristo, Atua miila naio binimei bija niununo tai napano be burupati na meuliano.
46 Jakii nina, romial ka vite na tivelinio na mokotenano, binimei beamu, mia vite na tivelinio na niununo, binimei maariano. 47 Toro na beamu nei Atam, Atua mijilar naio ea borotano na yetemeriba nei, mia toro juo nene nei Kristo, Atua miilalar naio ea vio mave binimei. 48 Naruei kito tomu dolu nalo, kito napano robe na yetemeriba nei, romidu toro moti na yetemeriba nei kiano bajago, mia kito napano robe na vio mave, romidu nana binimei ea vio mave kiano bajago. 49 A kito napano romonea, beamu romidu toro na yetemeriba nei mirano, mia vonganei, romidu toro na vio mave mirano. 50 Bilbilu nalo, tenalo napano maluvo ea yetemeriba ga, jibe ka mokotenado, maka rijikia riva joomo ea Atua kiano navenatuboiano mave, a tenei napano mia rivakovio, maka jikia riva rivokar vio napano mia to tobo to.
51 1Tesa 4:15-17Ana mia tum̃abe ka namoneano nalo napano ameul kia ea bogo napano Kristo rimei bereio? Vite na, tomu miroano maka ajikiaio, ana mia kiniou neberii memedu ban kamiu. Ee, be riano ka kito namoneano tealo mia ram̃arm̃aro re ea yetemeriba nei, mia ea bogo na, vaarakurano ga, tibe vio bijiio, niabedo viligio. 52 Jibe ka napano rojetavoko mirado bogo bulati kirisop̃eli ga, mia rotabujo ka vaarakurano ga simeduo rivio, a mia namoneano nalo napano am̃arm̃aro ruei mia atarabujo ameul bereio vija mokotenalo vou, a kito bunu napano romeul kia ea bogo na, mokotenado bunu rive terivou. 53 Mokotenado moruo monoka riviligio tibe na, bior napano tena borotano monoka rimei rive tena vio mave, a tena m̃ariano monoka rimei rive tena mia rimeul tulaka. 54 Mia bogo napano kito rojev mokotenado vou tibe na, mia rila iliano tai na Vivitauiano Moruo rimei rive riano laka, napano berinavo
56 Mia kito roil tibe na bior ka tubo-iano napano jo, naio jian moroano ban bajago na kariano joomo ea kiado meuliano, napano mila na robinimei jibe tomu na lakokorov tuboiano, a bajago na kiado kariano nei jian moroano ban m̃ariano na jibe m̃arbutoto napano mijikia tulu kito ram̃arm̃aro. 57 Mia siva toru ka Atua, bior napano naio mila kiado Tubo Yesu Kristo napano mije loa moroano na tuboiano a moroano na kariano a moroano na m̃ariano, mila robokar meuliano nei napano maka rijikia ribisi bogo tai.
58 Bilbilu novo nalo, bior napano Atua mila kirinovo ban kito jibe nei, kamiu kuvitu sikili, kuvikulkulu re tanea vio, a kuvikar rivu ka kuvim̃au Tubo kiano vija kenemiu moroano momou. A bogo na kumitu kumila jibe na, bo ka kuvitu kuvisidomii ka kenemiu im̃auano nei maka tena iakurano, ana mia monoka rivar m̃arati tibe napano Tubo naio jidomio.
<- 1 Korin 141 Korin 16 ->