Matyu 4

4:1-11 Satan Na Iesu Kuvia Geruria Re.

(Mak 1:12-13; Luk 4:1-13)

1 [a]Aghade Satan na Iesu kuvia gari-du rea, God da Asisimi umó unumbea, enembo irambi, kotú uvu tefo kambesiva arie. 2 Aria, tumba kotú onembo 40 tama uria-da ambova umó baimana itatama urie.

3 Aghá ueta, Satan furia Iesu dava eghá ririe. “Imó God da mendi iradora mo, rege, ená singoi farava nindota undadi!” 4 [b]Aghá ririeta, Iesu mino eghá ririe. “God amindu gaga eghá ririeta, gefirie:

‘Enembo jo undarimi jebuga bee tambua bambi aita rouvie-tago,

gaga nanjogo God da bemi riria anami, jebuga tambua baita rouvie.’ ”

5 Aghá ririeta, Satan na Iesu unumbea bua aria, bogu naa kakara, Jerusalem bubua aria, God du Tafaroro Ari Kambo* fouva vitia, iti beeva jiria Iesu du eghá ririe,

6 [c]“Imó God da mendi iradora mo, God da Gaganu gaabee urota, ená kambo fouvareta jau ege, gare! Anada bee mo, God da Gaga eini eghá reirie:

‘Imó jau ea voradora mo,

God na rata, anera mane númanda ingo beisi ea irirota, númanda ingova desembuturota,

inda eka jo singoiva dea borambi aita roravore.’ ”

7 [d]Aghá ririeta, Iesu mino undú eghá ririe, “Aná rera, aná gaa bee re, avotago God da Gaga einiva eghá reirie: ‘Mania nímanda Jojabee God kuvia gigigata!’ ”

8 Aghá ririeta, umó rekago Iesu bua aria, dafaru iti bee itiva jiria, aná roo enda nanjogoda sevo durogha dano iruguturieta, Iesu gerueta, eghá ririe, 9 “Atá imó andú tumogha dano baĩ adora, ená rei-gerora eini-eini dano, anona indú utaita rore.” 10 [e]Aghá ririeta, Iesu mino undú eghá ririe. “Satan, amó doa serige! God da Gagava eghá reirie, ‘Nímanda Jojabee God nuenembo tumogha baĩ egege! Kotú unda uno nuenembo egege!’ ”

11 Aghá ririeta, Satan umó doa seriguturieta, anera mane furia, Iesu sonembuturie.

4:12-17 Iesu Unda Buro Galili Frovensi Anava Tutuno Uria Re.

(Mak 1:14-15; Luk 4:14-15)

12 [f]Jon bua, diburava gajiturieta ningia, Iesu kaverea Galili arie. 13-14 [g]Feroveta Aisaia sei donu riria-nu bee ari-du rea, Iesu Nasaret doa aria, Kaperneam asumbea vitirie. Bogu naa Kaperneam aná sao Galili kasava Sebulun ungá Naptali undida kambesi rova re. Aisaia da gaga, aná evere:

15 [h]“Abua Sebulun ungá Naptali ghada roo enda emboro sao diva vitia dano,

Israel enemboda gitofomi susughi ea, righia vitie.

Uvu Jordan beina fefera vorari kena Galili frovensida enda dano gitofomi númanda tofo rururie.

16 Atá aná gitofo bingoiva vitiria-mi, unana jojabe gigituturie,

númane avona amburarida utumuva vitiria-dava, rifo atiturie.”

17 [i]Fefera aghade Iesu tutuno ea, minono eghá ririe. “God unda natofo* kaifa arida fefera etia, uutuva etua-du neno kaveradi rere!”

4:18-22 Iesu Unda Ambo Nimbi Ghogho Riria Re.

(Mak 1:16-20; Luk 5:1-11)

18 Iesu Galili sao jojabe betuva deĩ ea irurota, uvu oka bari kakato Saimon, o Pita reta rosora, unda ikoko Andru gha ungá saova moyuva fugitueta gerurie-gea eghá ririe, 19 “Anda ambova fufuge, anona irugota, moyuvami uvu oka buta rosora aghagonu, enembo unumbea bua, andava furadi-gea, anda ambo nimbi egegoe!” 20 Aghá ria, jo gaimbo ambi, ungá unda moyuva avo doa erea, Iesu da ambova igiguturie.

21 Anavareta irurota geruria mo, Sebedi unda sasingu ungagha, Jems ungá Jon ghade númanda ghaava* moyuva fugaita simbugutueta gerurie-gea, númandu ghogho ririe. 22 Ghogho riria aghade, gaimbo ambi ungá unda ghaade numamode doa, Iesu da ambova igiguturie.

4:23-25 Iesu Na Minono Rita Irirota, Kae Bua Vitiria Enembo Urieta Jejebuguturia Re.

(Luk 6:17-19)

23 [j]Iesu aria, Galili Frovensi enemboda nghaĩ itari kambova* dano anava iruguturota, God unda natofo* daiyagha kaifa eta rouvia-da Gaga Taubananu minono rirota, kaemi enembo righia damé-damé eaveta, sembago ea irari kotú kae bua irari enembo eaveta jejebugeta urie. 24 Iesu aghá uua-da bingá aria, Siria Frovinsi va enembo dano ningia fafate urie. Urie-gea, númane erea, enembo avona kosisi sembago bua vitiria-de, mema itatama urota vitiria-de, taimu akokogomi asuguturieta vitiria-de, enembo avona jifeta uria-de, kotú eka ingo takembaride dano bua, Iesu dava fufuguturieta, unona urieta jejebuguturie. 25 Galili Frovensi, kotú Dekapolis Frovensi, Jerusalem, Judia Frovensiva kotú uvu Jordan beina fefera vitari kena enembo natofo oruaruabe Iesu da ambova igiguturie.

<- Matyu 3 Matyu 5 ->