Makɨtɨbɨ kɨ ko̰ joo kɨ

Ja̰
ndangɨ
Ta kɨ dɔ makɨtɨbɨ tɨ kɨ ko̰ joo kɨ Ja̰ ndangɨ
NJe ndangɨ makɨtɨbɨ kɨn ɓa rɔne ə nə n-e «NGatɔgɨ». Nɨngə ta kəle tɔjɨ kadɨ e dəw kɨ aw kɨ ngon tɔgɨ madɨ dɔ dɨje tɨ kɨ ndangɨ makɨtɨbɨ adɨ-de kɨn. NDangɨ ta adɨ «Dəne kɨ Luwə mbəte nɨm adɨ ngane je nɨm». Nɨngə Dəne əi kɨ ngane je kɨn, kɨ rɔjetɨ ɓa, əi njé kaw-naa je kɨ lo madɨ tɨ (1).
Ɨlə dɨngəm mede tɨ kadɨ njɨyəi me ta kɨ rɔjetɨ kɨ me ndɨgɨ-naa tɨ (1-6); taa ndəjɨ-de kadɨ ɨndəi kəm-kədɨ dɔ rɔde tɨ kɨ rɔ dɨje tɨ kɨ njé ndo nḛ kɨ go rəbe tɨ al təkɨ əl-n me makɨtɨbɨ tɨ kɨ dɔsa̰y kɨn be tɔ (7-11). NJe ndangɨ makɨtɨbɨ tɔl ta makɨtɨbɨ ləne kɨ ta kaw mba kɨ ndɨgɨ kadɨ n-a n-aw kɨ dɔde tɨ, taa əl-de ta kuwə ji-naa lə njé kaw-naa je kɨ e səde ɨndəi tae tɨ tɔ (12-13).
Təkɨ əl-n me makɨtɨbɨ tɨ kɨ dɔsa̰y, dəjɨ dɨje kɨ ndangɨ makɨtɨbɨ kɨn adɨ-de kadɨ ɨndəi kəm-kədɨ dɔ rɔde tɨ nɨm, kadɨ uwəi tɔgɨde ba me kadɨ-me tɨ kɨ rɔjetɨ nɨm tɔ.

Kuwə ji-naa

1 Mi NGatɔgɨ lə njé kaw-naa je, m-ndangɨ makɨtɨbɨ kɨn madi ḭ Dəne kɨ Luwə mbəti, taa madɨ ngani je kɨ səi səde je, m-ndɨgɨ səsi ndɨgɨ kɨ rɔjetɨ. Nɨngə e mi par ɓa m-ndɨgɨ səsi al, nə e dɨje pətɨ kɨ gəri nḛ kɨ rɔjetɨ ə ndɨgi səsi. 2 Jɨ ndɨgɨ səsi mbata nḛ kɨ rɔjetɨ uwə meje, nɨngə e nḛ kɨ a to meje tɨ kɨ ndɔ je ndɔ je. 3 Ɓa jɨ dəjɨ kadɨ me-majɨ, kɨ koo kəm-to-ndoo, kɨ lapɨya lə Bawje Luwə əi kɨ NGone Jəju Kɨrɨsɨ e səsi naa kadɨ ɨsɨ me nḛ ra kɨ rɔjetɨ kɨ me ndɨgɨ-naa tɨ.

Nḛ ra kɨ rɔjetɨ əi kɨ ndɨgɨ-naa

4 Rɔm nəl-m kɨ dum bɨtɨ kadɨ m-o təkɨ ngani je madɨ ɨsɨ njɨyəi dɔ rəbɨ tɨ kɨ rɔjetɨ, təkɨ Bawje Luwə dəjɨ-n-je. 5 Nɨngə kɨ ɓasɨne kɨn, Dəne kɨ nje ndɨgɨ ləm, nḛ kɨ m-dəji, e ta kadɨ jɨ ndɨgi-naa kɨ yo je kɨ nḛ je. E ndu-kun kɨ sɨgɨ ɓa m-adi al, nə e ndu-kun kɨ j-ɨngəi lo kɨlə ngɨre tɨ nu wa kɨn✡. 6 NDɨgɨ-naa e njɨyə go ndu-kun tɨ lə Luwə. NGa nɨngə, ndu-kun kɨ osɨ mbisi tɨ lo kɨlə ngɨre tɨ nu, e ta kadɨ ɨnjɨyəi me ndɨgɨ-naa tɨ.

7 NJé kədɨ dɨje kɨlə-de kɔ ngay sanəi-naa kɨ lo pətɨ dɔnangɨ tɨ ne, nɨngə mbati kadɨ n-əli təkɨ Jəju Kɨrɨsɨ təl dəw təkɨ rɔjetɨ. Lo kɨn tɨ a oi dəw kɨ nje ngom, kɨ nje ta̰ rɔ Kɨrɨsɨ. 8 Ɨndəi kəm-kədɨ dɔ rɔsi tɨ səi je wa, mba kadɨ kandɨ kɨlə rasi nay kɔ kare al, nə kadɨ ɨngəi nḛ kɨgə go jisi kɨ asɨ loe tɨ bərəre. 9 Nɨngə dəw kɨ a dɔ njane tɨ me nḛ ndo tɨ kɨ ɔjɨ dɔ Kɨrɨsɨ al, nə tɔ a dam kare yo, e dəw kɨ nḛ madɨ kɨ dɔɔ-e naa tɨ kɨ Luwə goto. Dəw kɨ a dɔ njane tɨ me nḛ ndo tɨ kɨ ɔjɨ dɔ Kɨrɨsɨ, e dəw kɨ dɔɔi-naa naa tɨ kɨ Luwə nɨm kɨ NGone nɨm. 10 Kɨn ə re dəw madɨ re rɔsi tɨ kɨ nḛ kɨ rangɨ ɓɨ kɨ nḛ ndo kɨn al ɓa, uwəi-e kɨ rɔsi tɨ al nɨm, uwəi jie al nɨm. 11 Tadɔ re uwəi jie ɓa, ɨrai madɨ-naa sie dɔ kɨlə rae tɨ kɨ majal.

Ta kɨ dɔbəy tɨ

12 M-aw kɨ nḛ je ngay ɓəy kadɨ m-əl səsi, nə m-ndɨgɨ kadɨ m-ndangɨ kɨ man ndangɨ nḛ me makɨtɨbɨ tɨ al. Tadɔ m-ɨndə mem tɨ kadɨ m-a m-aw rɔsi tɨ kadɨ m-əl səsi ta kɨ tam, kadɨ tə rɔnəl ləje osɨ taga pa̰y. 13 Dɨje kɨ dan njé kaw-naa je tɨ kɨ ne, kɨ əi dɨje kɨ Luwə mbəte uwəi jii.