3 Miqi qimasee qimaqimisoofanoo Anutuna maraquna fannoo daakufufanoo mi qangiroofa qini mareeqeenoo innaarunaindari maqasaa muqu aadana maqasaa quqaseenoo mi anaaseena uqaqifiqanau. Mi anaaseefa taatuqee aandau kaasau aandau ataufakaaqa ooqu faaqee marinau. Mi kaasau aandauna afaaqasasa Anutunara fidiaqaa ira auqu moomoo mina afaaqasasa akararinoo marinau. Mi aandaufa dinni qisauku taikasee dinni ani qaara marasee akiqa faqaafa marinau, mina aanai qisaukuqara taikasee marinau. 4 Mi anaaseena qamunna sia kaiqeesa afisimariana uriqararausa afisimaru qamunnanda saasaakoona arirana faqa taatuqee arirana faqa afisimarufa aiqama ainaina koorannai auqirana kai afaaqa auqirafa marinau. Firaa feefauru aqimari ooninna pupu ooni fooqaana faqa maranoo ninau. Mi anaaseena asaukuki koora auqira kaafa uqusee marinau. Mi kaafanaki ikairifaqaa ainaina faqa faiqí anaasee narí ummuari narí ummuarirana aiqama mi ainainafa mi anaaseenasaa aniqusirafa mi kaafanaki qumbiqanoo maridanoo. (Faiqí anaasee kikiqa usidanoo kuqaa qira Anutuna minniseeqa unna qira Anutuna amooqimarianara qidanoo.) 5 Mi anaaseena aqinisaa mina auqu akara rinoo maridanoo auqu akooqoo maridanoo oosana kukeeqanoo maridanoo. Mina auqu maaqi qinoo maridanoo Firaa Babiroonia aiqamausa nári naumoosaa feefauru maree mariasa ninoofa faqa kaaqa aanaaseera rimariasa ninoofa faqa maridanoo.
6 Qinee Yoohaneesa mina akara qafeeqa mi anaaseena oosana qafaunanoo furufaramminoo marifaqa qafeeqa. Mifa Anutuna maqasaaqaraa faiqí anaasee fidika faqa Yisuna ufara afeekaiki mariasa fidika faqa uainna nammariara foora misa narusee misa fidika neeneeseenoora foora furufarinoo nimari anaaseefa. Qinee mina qafamasaunanoo firaaqoo daaquqeenoo. Qangiroo fannoo miqiafananoo qiqafeenoo qinau. 7 Anee nanaree aaquqaidanoo fee qinee mi anaaseena faqa mi aandauna faqa oosana kooroo qianamma iria. 8 Anee kaasau aandau qafaanafa ooqai marufa maqee sia maridanoo, mifa qusasaa maqa ameemaanai madikakiqari urureenoo taikaranaki fuannoo. Naaru naaru mariranaki fimariasa Anutuna bukaki nuqu akara rinoo maridanoo, ooqai maa maqafa sia maru kamuqoo mi bukanaki misa nuqu akara rumaqoofa maridanoo. Maa maqanasaa mariasa sia mi bukanaki nuqu akara rumaqoosa misa mi manda kaasau aandauna qafeeqa kaaqa naaquqainaqa mina ufamau fifaranoo. Ooqai marinoo maqee sia maridanoo kafaa kasooqaqee kooroo ianinnanara tautumasee mina ufamau fifaranoo.
9 Maa ufana irirana faqaasa kai irifaranoo. Mi kaasau taatuqee aandauna akiaqa dinni qisauku taikasee dinni ani qaara marasee akiaqafaqaafa maridanoo. Mi akiaqa namuna faqa dinni qisauku taikasee dinni ani qaara marasee aaqana namu kikiqa usinoo maridanoo mi anaaseefa minauqasaa ooqufaaqee maridanoo, karaambaiqauqaindi faqa miqimasee namu maridaqa. 10 Moodaannai qisauku karaambaiqa doo taikafiqau, moodaa kaqi rakisidanoo maridanoo moo fannoo aniraannoo anirainanoo qusasaa taikaannoo. 11 Mi kaasau aandaufa anaasee minasaa ooqumariufa ooqai marufa maqee sia maridanoo kasooqaqee kafaa kambiqaannoo. Ooqai indaaru mifa dinni taikasee dinni ani qaaramarasee karaambaiqa marunaki mariufa taikafufanoo kaifaa kambiqafinoo dinni ani qaaramoo kinanoo mifa qusasaa kuridiranaki fuannoo.
12 Manda kaasau aandau aanai qisaukuqara taikarafa miqimandee kai kasooqaqee karaambaiqauqa maqasaa moodaa kari kambiqafi maridaqa faiqí anaasee rakisi nimaqeefaranoo. Mi namusa nári afeeka manda kaasau aandau naida amisaifanoo mifa misa faqa qusasaa faiqí anaasee rakisi nimaqaannoo. 13 Mi karaambaiqausa qisaukuqara taikarausa moodaa irirana mariranasaa maridaqa nári afeeka faqa nári uriqararana faqa mi manda kaasau aandauna pooduaqida amimarifaranoo. 14 Mi karaambaiqausa sipsipa aanaaqi Yisuna aruannee qimasee mina faqa rakifara. Yisufa narí rusandeesamumasee naaramaqaisa afeekaikamandee Yisuna faqa fimariasa misa saimbaqa mi karaambaiqausa naru taikeefaranoo. Mifa Yisufa aiqama karaambaiqa maridanoo aiqama uriqararausa urinaaqararafa maridanoo minara Yisufa quandaki misa faqa naru taikaannoo.
15 Mi qangiroofa kafaa mi anaaseenara qimaqiminoo qinau. Mi anaaseefa nammari amuaqusaa ooqumaruna anee qafaananoo. Mi nammarifa moomoosa maqusa mariasa moomoo fasiqa anaasee ufa oosana oosana qimariasa kikiqamusinoo mi nammarinasaa maridanoo. 16 Mi qisaukuqarana taikasee aanai nimanasaa karaambaiqauqa mariasa faqa manda kaasau aandau faqa mi umuari mari anaaseenara fidiaqaammidaqa mina aiqama ainaina marasaifanoo mifa kaqi samu mariannoo. Misa miqoo mina amaqi namasaifanoo doo idaqama taikafuannoo. 17 Mi karaambaiqausa sia nariqa kai miqifaranoo. Anutufa qumee fuki faaki qinaqa misa sia irirainni misa nári iriranammifoo qimasee nári afeeka manda kaasau aandau amifaranoo. Anutufa narí ufa anoonaikianinna aukuanara afeesidanoo miqiannoo.
18 Mi anaaseena anee qafaanafa mifa aiqama maaqa maaqa karaambaiqausa rakisi nimaqeemari maqusafa maridanoo.
<- UQAFIQOO UFAFA 16UQAFIQOO UFAFA 18 ->