1 Miqimarufaqa qinee nindafaafananoo qangiroo moo amudaanai qimarufa innaarunaindari quminau. Mina qamunna sia qafaqiafana qoonnamu qamunnara foora kai afisirafa marinau, mina akiqa oondanda fiqu inoo marinau, mina oori afiri suani afu miqirafa daroo daraa imarinau, mina aikuqara saqari aadana kikiqinoo marifaqa idaree mariandee imariqau. 2-3 Mina asaukuki papiqa kaqikaana asaana ruanifeera airiqoofanoo marinau. Mi qangiroofa qumureenoo asauku uqannai aiku ooruku nammarisaa ramaseenoo asaaqai aiku maqasaa ramaseenoo raioonara foora firaaqoo faaqarufanoo innaarunai qirafa dinni qisauku taikasee dinni ani qaara marasoofanoo innaarunai firaaqoo darara qimasee faiqiara maqi ufa moo qimaminau. 4 Qinee Yoohaneesa innaarunai qira ufa irisee akara ruaneeriafananoo innaarunaindari qaoo qinoo qisauku dinni taikasee dinni ani qaaraqanda marasee innaarunai qira ufa sia akara rua, amiqimasee kukeeqaa qufaqa kukeeqaqiafana.

5-6 Mi qangiroofa aiku ooruku nammariki faqa maqasaa faqa roofa asauku innaarunai uqeeraseenoo narí amana aqiqamaseenoo qinau. Anutufa naaru naaru marianafa innaaruna faqa maqa faqa ooruku nammari faqa quqoonafa minaki maru ainainausa auqunafa marianafa ani auqu ramasee maa ufana qidaqa. Sia moo kari faqa Anutufa nifeesida mariannoo. 7 Inaaqianna qangiroo narí ufireena fuaqasainanoo Anutufa narí ooqai kukeeqaqai doo quqaannoo, ooqai narí tamummaqara fasiqauqa amiqira ufa qimannimuna doo miqoo taikeenoo miqiannoo.

8-9 Miqi qimasoofanoo innaarunaindaraa ufa faasai qimaqimufa kafaa qimaqiminau. Anee qangiroo innai aiku ooruku nammariki faqa maqasaa faqa ramaqai finnai papiqa airirana maqeeina maraa qufaqa qinee Yoohaneesa mifunnai oonuree mi papiqana qimiannee qiafananoo qimaqiminoo qinau. Doo maraseenana namasainanoo aranandaki ooquree aseeundammiannoo, ookinaa ookasaasa anoonara foora adiafaammiannoo. 10 Miqi qimasoofaqa qinee mina asaukukinaa papiqa marasee namasaafananoo dooki ookasaasara foora adiafaainau, qiranandaki ooqureenoo aseeundinau.

(Ookasaasa anoona naaru kambiqaaninna ainainara irirana adiafaa irafa maridanoo. Oosana oosana mandainaina aupurarana narirana kambiqaaninafa aseeundirafa maridanoo.)

11 Miqi masaafananoo qimaqiminoo qinau, anee Yoohaneefa anee kaifaa Anutuna ufa moomoosasaa quqaa moomoo faiqí anaasee faqa moomoo maqusanaasa faqa moomoo ufa qimariasa faqa karaambaiqauqa faqa amiqimasee Anutuna amiqira nifaaqooqa faqa manda nifaaqooqa faqa misa naaku nimaqainanoo misasaa kambiqaani.

<- UQAFIQOO UFAFA 9UQAFIQOO UFAFA 11 ->