29
Aakuasaa ufai uqirafa Yaaweena ufara foora maridanoo.
1 Innee innaarunai mariasa mina amooqiaqa.
Mina afeekara faqa qareenaranara faqa amooqiaqa.
2 Yaaweena qareenara auqu uqeeraaqa.
Yaaweefa naaquqarafa koorooinaqa mina oorinni niqoori saunu arafi naaquqamafi mina amooqiaqa.
3 Yaaweefa ufa qifaqa ooruku nammariki aiqamaindari mina ufa iridaqa.
Uriqarara qareenarana faqaa Anutufa innaarunaira
foora darara qifanoo ooruku nammari aiqamai daraanifaqa iridaqa.
4 Yaaweefa aiqama afeeka faqa eeraarirana faqaana ufa qirana irisee aiqamausa rufiaidaqa.
5 Yaaweena ufa fannoo firaa saqari raudee marifa maridanoo.
Yaaweena ufa fannoo Reebanoona maqa maaqaki
mari saqarisa sidaa saqariuqa raudee marifa maridanoo.
6 Yaaweefa qifaqa Reebanoona aaqanauqa kasidaqa aandau aanaaqiara foora rafusaki rafusaki idaqa.
Qeeramoonna aaqana faqa miqi kai idanoo
burimakau aanaaqi timmusara foora rafusaki rafusaki idanoo.
7 Yaaweena ufa fannoo aakuasaara foora pananana qidanoo.
8 Yaaweena ufa fannoo aadana maqa maaqa kasidanoo.
Mifa qifanoo Kadeesa aadana maqa maaqa faqa kasidanoo.
9 Yaaweena ufa fannoo aakuasaara foora pananana qinoo saqari amanee rauqu aqidanoo.
Yaaweena maaqaki mariasa firaaqoo faaqa rumasee Yaaweefa uriqarara qareenarana faqaafee qidaqa.
10 Yaaweefa naaruara uriqarara karaambaiqa maridanoo aiqama nammariuqasaa rakisidanoo.
11 Yaaweefa narí aiku asauku afeeka nimidanoo.