5 Maqee qini qikoofa qini diqiqamaqoonnai ooru firaridaqa innikiqari moo fannoo sia qini iraidanoo anee yai fee fidanee miqidanee. 6 Doo qinee firara inni qimannimunaqa inni naundura qumaara raifaqa noori runusee mariafanoo. 7 Qinee anoona ufa qimannimidaqa qinee ooru fuanaqa innee amiqiranaki mariaqeera ooru fuanaura. Qinee sia ooru fuananoo fuka dadaaqirafa sia qumuree inni dadaaqiannoo. Qinee ooruree fuka dadaaqirana aqiqaananoo qumu inni faqa maridanoo dadaaqiannoo. 8 Fuka dadaaqirafa qumu maridanoo inni maqasaaqaraasa irirana aaqaidanoo fee qiannoo inni andeeqaranara faqa manda oosanara faqa Anutuna narira ufa nimianinnanara faqa aaqee mariafanoommifoo qimasee qimannimiannoo. 9 Maqasaa fasiqauqa qiniara sia irifaqee qidaqa minara nári manda oosanara amiqira oosana fee qimasaidaqa aaqaidaqa. 10 Qinee qeeqa qikoofinai ooru firaridaqa maqasaaqaraasa sia kaifaa qini qiqafeefaranoo, minara fuka dadaaqirafa maqasaaqaraasa andeeqara oosanara aaqee mariafanoo fee qiannoo. 11 Maa maqanasaaqaraa rakisirana aakaaqaindaraa fasiqa doo Anutuna arira ufa doo mi manda fasiqanasaa maridanoo. Minara Anutuna narira ufa fannoo maa maqanasaaqaraa fasiqa aanaaseesaa faqa maridanoo minara faqa misa sia andeeqasee iridaqa aaqaidaqa.

12 Qinee moomoo ainainara qimannimianaqa qumaara rainaqa siamma irifaranoo. 13 Miqimarianara kuqaa anoona ufa qira maraquna fannoo qumureenoo inni mareeqeenoo anoona ufa mariranaki mara quqaannoo. Sia mi maraqunafa narí kai ufa qimannimiannoo qini dookinaana kai irinoo inni qimannimiannoo. Mifa kasooqaqee kambiqaaninna ainainara tamummaqasee iriseenoo inni qimannimiannoo. 14 Mifa qini irira ufa mareeqee inni niminaqa minannai qini Yisuna asasirana qimimarifaranoo. 15 Qini qikoona Anutuna ainaina aiqama qinindi kai maridanoo. Minara qinee inni maana qimannimiqa kafaa qimannimidaqa. Qinee qeeqa irirana marasee anoona ufa qira maraquna qimamiananoo mifa quandaki inni qimannimiannoo.

16 Yisufa narí faiqinamu kaqi qimannimidanoo qinau. Kaqikaaqoo innee sia qini qiqafeefaranoo kaqikaaqoo marikiqa kaifaa qini qiqafeefaranoo. 17 Yisuna faiqi namu mina irisee akaqausa maaqi qiqau. Maa ufana nanaree qidanoo fee. Mifa nariara kaqikaa qoo sia qini qiqafeefaranoo fee qidanoo. Kaifaa kaqikaaqoo marikiqa qini qiqafeefaranoo fee qidanoo. Kaifaa nariara qeeqa qikoofinai firaree qidaqee qidaqinoo. 18 Mifa kaqikaa qoo fee qidaqinoo mi ufana oosanara maasa randaidaqa. Maasa sia mina ufa oosanara iridaqa naqi fee qidaqinoo fee.

19 Yisufa misa randaranara irisee maaqi qimasee qimanniminau. Qinee qiqa. Kaqikaaqoo sia qini qiqafeefaranoo. Kaqikaaqoo marikiqa qini qiqafeefaranoo. Innee minaree narí qimami narí qimami qidee. 20 Qinee anoona ufa qimannimianaura. Qinee kuquanna kamuqoo innee ikifaafau qifaranoo. Innee miqimariafaqa maqasaaqaraasa qiniara sia irimariasa susuifaranoo. Innee noori runusee marifaranoo qinee kuqiranakiqari findi fuanaqa kafaa mi noori runirana minnisee quandakinaqa asasifaranoo. 21 Anaasee moo fannoo amuaqu uqafaqa maridanoo oori runusee maridanoo, doo aupurarafa aidafirafa minaki marinara miqidanoo. Miqidanoo mariifanoo faiqi maqasaifanoo doo aupurarafa faqa aidafirafa faqa taikeefoo qimaseenoo doo qini faiqi kambiqaifaqee qimasee aidafiranara aunusee asasidanoo. 22 Innee mina aanna reefaranoo. Maqee kamuqoo noori runusee marifaranoo. Kasooqaqee qini qiqafamasaifanoo miqoo inni nimuqusaki asasirafa firaaqoo qumbiqanoo mariannoo. Mi asasirana sia moo fannoo mareemaria asasirafa mariannoo. Afeeka asasirafa amiqirafa kaqi mariannoo.

23 Qinee kuqiranakiqari findifiqa qeeqa qikoofinnai ooru marianaqa innee sia kafaa qiniara moo ainainara irammirifaranoo. Qinee anoona ufa qimannimidaqa. Innee qiniara faiqi namu maridee qimasee qini qikoona irammirifanoo iraifandinna ainaina oosana oosana nimiannoo. 24 Maa maria kamu sia moo ainainara qiniara aqoondi fee qimasee Anutufinnai innaaru qimariananoo. Irammiriaqa. Irammirifanoo nimiani. Innee asasirafa anoonaikianifeera Anutufa nimiannoo.

25 Qinee kukeeqara ufannai inni qimannimi mariafannana. Qusasaa sia qinee kukeeqaanaura kooroomandee qeeqa qikoona Anutunara akooqoo qimannimianaura. 26 Mi faasaanna anirainaqa qini duqusaa Anutunara innaaru qifaranoo. Innee innaaru qifaqa qinee sia qeeqa qikoona afusaa oonuree mi ainainnara inni fifau dadaaqianaura. 27 Qini qikoofa narí kai inniara aidimarifanoo iraifandinna ainaina eedoo qimasee nimmiannoo. Innee qiniara nidimarinaqa Anutuna faiqi fee qifanoo inniara faqa Anutufa aididanoo iraifandinna ainaina nimiannoo. 28 Qinee qeeqa qikoofinaindari maqasaa qumuafanausa maridaqa doo maqasaa taikeeqa qeeqa qikoofinai ooru fuanaura.

29 Yisuna faiqi namu mi ufana iriseeqa qiqau. Doo iria, doo maqee maasa kooroomasee qimaqimimariananoo. 30 Doo maqee maasa aniara aiqama ainaina irimariana fee qidaqa. Anee ufa qiananoo moo fannoo sia ani dadaaqimarifana aneennaraa kai qimannimimarianaqa maasa minara irisee kuqaa aniara Anutufinaindari qumi fee qidaqa.

31 Yisufa mi ufana iriseenoo kafaa qimanniminau. Doo innee maqee fee iriqaraasidee. 32 Doo moo aukuana adeedi ranoo maridanoo misa kai inni mara furufaramma nimaqeefaranoo. Innee inneeqa maaqa maaqa daraanimambifaqa qinee qeeqakai marianaura. Sia qinee kaaqa qeeqaraa maridaqa. Qini qikoofa qini faqa maridanoo. 33 Innee qinisaa atooaqa marifandinnanannai asooaranaki marifaranoo. Maa maqanasaaqaraa irirana mareemariasa aupurarana oosana oosana nimianinnanara maa ufana qimannimidaqa. Sia rufiaqa rufiaqiaqa doo qinee maa maqanasaaqarasa doo rafaaqafuseeqa, minara kaqi paasoosiaqa.

<- YOOHANEE 15YOOHANEE 17 ->