1 Faiqí moo auqu Rasarusafa mifa Beetani maqusaindaraafa aurida marinau. Rasarusafa narí asookiqanda Mariana amarana faqa Maratana faqa misa Beetani maqusaindaraasa mariqau. 2 Mariafa maafa kasooqaqee amiqira afundimaru fadameena Yisuna aikusaa adiaseenoo narí akiaqa asausi kisaaqannai rukaaninafa maana mi Mariafa maridanoo. Sia Yisuna anoofau mina amarafa marinau. 3 Mi Mariana afasaafa Rasarusafa kuqira aurira maroofaqa mina asookiqanda qafamaseeqa faiqí moo aiqeeqa anee Yisuna ooqu afiqee uruannee qufanoo ooqu finau. Mifa maaqi qinau ani afaaqasaa aqoondi Rasarusafa kuqira aurirana maraidanoo.

4 Yisufa mi ufana iriseenoo narí faiqi namu qimanniminau. Rasarusafa aurida maridanoo. Sia kuqiranaki firarau Rasarusafa mi aurirana maraidanoofau mina auriranannai Anutufa narí amaaku qini duqu uqeeraanifeera mi aurirana maraidanoo.

5 Yisufa miqanda qisanasaasa faqa misa nisookinara faqa kaaqa misara rimarinau. Yisuna afaaqasaa aqoondi marunara rimarinau. 6 Rasarusana auriranara iriseenoo sia dauni finau qaara afuru faiqanau. 7 Qaara afuru faiqee iqaqoofanoo narí faiqi namu qimanniminau. Uqeeraifaqa innisaimbaqa kafaa qumurandee Yudeea maqa maaqai Rasarusafa aurida qina ooru qafa.

8 Miqi qufaqa misa tautumandee maaqi qiqau, Oo ufasaa rakisirafa innau kai Yuda maqannaa uriqararausa oonisamu ani arirara qufana kafaa fee miqoo fidanee.

9 Yisufa iriseenoo qinau, iqaqaifanoo kai suani urureenoo kaaqa qaidanoo. Faiqí miqi mariqoo nidaqa sia saamuridaqa. Misa maa maqanasaa kaaqa qarafa marifaqa qafaida sia saamuridaqa. 10 Faiqí moo fannoo asukunai nidanoo oonisaa aikuamaki saamuridanoo, sia kaaqa qarafa minaki marinara miqidanoo Anutufa qi faasaana ooru fiqa sia saamuruanaura kaaqa qeemarina ooru fuanaura. 11 Yisufa maaqi qimasee qimanniminau. Rasarusafa maasa qiqoondi doo faiqaqee ifaqa qinee oorureeqa afaurianaura.

12 Mina faiqi namu mina iriseeqa qiqau. Oo karaambaiqa mifa fifau faiqaqee idanoo findifuannoo amiqirafa.

13 Yisufa kuqiranara faiqeefoo qimasoofaqa misa sia iriqau. 14 Minara Yisufa kooroo qimasee qinau. Rasarusafa doo kuquaraasinoo maridanoo. 15 Dufi dufi sia qinee miqoo maridaqa inniara iridaqa kasooqaqee Anutuna afeeka qafeeqa kuqaa qiniara Anutuna amaaku fee qifaranoo doo uqeeraifaqa fua Rasarusafinnai.

16 Toomasina auqu qaara auqu marinau. Moo auqu Toomasifa moo auqu Qaaraqanda maqara fee qimariqau. Toomasifa Yisufa Yudeeaa maqa maaqai ooru firanara iriseenoo qinau. Doo uqeeraifaqa maasa ufasaa rakisirana faqa Yeerusareenni oorureeqa moodaanaki kuquanauree qimasoofaqa misa aiqama Yisuna faqa Yooradanna nammarindari ooru fiqau.

17 Narí Yisufa iriseenoo Beetani maqusai ooruroofaqa qimamiqau Rasarusafa doo innau kuqufufaqa akundamaqaafanoo qaara faqa qaara faqa eenda madikaki faiqaqee idanoo. 18 Beetani maqusa Yeerusaree aaqa uqanna maridanoo. (Beetani maqusa Ubandeenara foora marida Yeerusaree maqusa Faarumaaqaira foora marinau.) 19 Yeerusaree adeedi marunara moomoo mindaraasa qumuree Maratasa Mariasa dadaaqi ikifaafau qida rooípee mariqau. Nári nifasaafa Rasarusafa kuqunara ikiraqee mariqau.

20 Maratafa Yisufa ani qu ufana iriseenoo raudamakufanoo oonu afiqaidanoo minara qimamirara fufanoo Mariafa kaqi maaqaki marinau. 21 Maratafa Yisuna qafamasee qimaminoo qinau, Oo Karaambaiqa anee anirainanoofau sia qini qifasaafa kuqiqini. Qaara faqa qaara faqa faasaana doo kuqufifaqa akundamasee maridaqa. 22 Miqinoo marifaqa maridaqa, aneenna kai maqee nana ainainaree Anutufinnai nana ainainaree innaaru qinanoo ani amiannoo.

23 Maratafa narí asookifa kuqunara iridanoo miqi qimasee qimaminau. Yisufa irisee qimaminoo qinau, Anutufa ani afasaana kaifaa mara findifumaiseenoo kaqi marirana amiannoo.

24 Maratafa mina iriseenoo qinau maa maqa maaqafa taikara faasaana Anutufa qini qisookina uqeerasee kaqi marirana amiannoo qinee minara iridaqa.

25 Yisufa qimaminau, kuqiranakiqari mara findifirafa qiniki maridanoo. Kaqi marirana marirafa qiniki maridanoo. Yafasiqa anaasee fee qini saqarikinoo kuqinoo kaqi mariannoo kuqiranakiqari findifirafa qiniki marinara kaqi mariannoo. 26 Yafasiqa anaasee fee kaqi maridanoo qini saqarikinoo naaru sia kuquannoo kaqi marirana marirafa qiniki marinara naaru naaru sia kuquannoo. Marata anee minara kuqaa fee qidanee.

27 Maratafa iriseenoo qinau, eeoo karaambaiqa anee ooqai maa maqa maaqanaki qumuaneera asauku mundirafa Anutuna amaaku uqanna marianafa marianaqa qinee minara kuqaa iridaqa.

28 Maratafa miqi qimaseenoo quandaki maqusai oonureenoo qumee kai Mariana aaramasee qimaminau. Ufasaa rakisirafa anidanoo ani aaraidanoo. 29 Mariafa mi ufana iriseenoo kaqi kaqi findimeeqee kaqi unnaqufanoo oonu afiqarara finau. 30 Yisufa sia maqusai aninau. Aanai Maratafa paquruqoo miqoo kai kaqi marinau. 31 Mariafa raudamaki kaqi unnaqufanoo fufaqa Yuda maqannaasaa mina faqa mariusa mina qafamasee minara madikai ikiraqarara fidanoommifoo qimasee afaqee fiqau.

32 Mariafa Yisufa marunnai oonu qafeenoo oorindari maqasaa aqufinoo ufa qimaminau. Oo karaambaiqa anee animariananoofau sia qini qifasaafa kuqiqini.

33 Yisufa Mariana ikiraqarana qafoofanoo amuqusufanoo Yeerusaree maqannaasa faqa ikiraqoona qafoofanoo amuqusinoo mina aunduraki mandaikinau.

34 Miqimasee Yisufa irammirinoo qinau. Innee yai fee Rasarusana akundee fee qufaqa misa qiqau Karaambaiqa doo mai aniree qafa. 35 Miqi qufanoo Yisufa faqa ikiraqanau. 36 Yeerusaree maqusanaasa miqoo mariusa mina ikiraqarana qafeeqa qiqau. Oo qafa mifa minara kaaqa rimarifa ikiraqaidanoo. 37 Miqi qufaqa akaqausa niqira ufa qiqau. Mifa nifu dimbarausa amiqimannisee marifa nanaree Rasarusana qaoo qinanoo sia kuquaqaana.

38 Yisufa narí kai misa miqi qu ufanara akooqoofanoo narí aunduraki mandaikufanoo mi ufanara aiaaee qimaseenoo madikai oonuranau. Rasarusana iri ooni aamaraki quqasee ooni firaatia qumaree ititaqoofanoo marinau. 39 Yisufa qimanniminoo qinau. Innee maa oonina rafaqaameeqeeqa quanda quandamma aquaqa. Miqi qimasoofaqa Maratafa Rasarusana auna qinau, Oo karaambaiqa mifa qaara faqa qaara faqa afuru faififa marifaqa afunda mandaikammimarifaqa.

40 Yisufa iriseenoo qimaminau. Qinee faasai qimamunnana anee qini saqarikinana anee Anutuna afeeka eeraarirana qafeennaranoo. 41 Misa mina iriseeqa ooni firaatia afeeqeeqee mafi quqasoofanoo Yisufa narí oori uqeeraseenoo Anutunara akooqoo innaaru qinoo qinau, Oo qini qikoofa dufi dufi anee qini ufa irimarianafa mariananoo. 42 Anee maqee maqee qini innaaru qirana irimarianafa marianaqa. Maaqoo mariasa iriaqeera innaaru qidaqa. Maaqoo mariasa anee qini diqiqamaqoonnanara iriaqeera innaaru qidaqa. 43 Yisufa miqi qimaseenoo innaaru qimaseenoo firaa kari kuqirana aareenoo qinau. Rasarusa minakiqari rauda. 44 Miqi qimasoofanoo qamunna afaaqa kukuqamaqoofa kaqi marufanoo Rasarusafa findifinoo raudee qumuranau. Mina akiaqa faqa qamunna rumbaqoonarirandee qumuranau. Yisufa qimanniminoo qinau. Doo qamunna idukusaifanoo fuani, qimasoofaqa miqimandoofanoo andeeqasoofanoo finau.