OOSANA 48

Yakooboofa Eefaraimana faqa Mannaseena faqa nifaaqooqaqu ufafa.

1 Kaqikaaqoo mari kufaqa misa Yooseefaana qimamiqau. Ani akoofa doo amiqimma auridanoo. Yooseefaafa mi ufana iriseenoo narí amaaku qara Mannaaseesa Eefaraimasa nindiqeenoo narí akoofunnai ooqu finau. 2 Misa Yakooboona qimamiqau ani amaaku Yooseefaafa ani qafarara qumidanoo fee qufanoo Yakooboofa afeekaikammasee findi fufanoo narí qaarisaa ooqu marinau.

3 Ooqu mari fufanoo Yakooboofa Yooseefaana qimaminoo qinau. Ooqai qinee Kannaana maqa maaqaki nuafannana kinai Rusa maqa maaqaki mariafananoo Anutufa aiqama afeeka faqaafa akooqoo kooroomma fufanoo qini qifaaqooqa qima qimaqanau. 4 Mifa maaqi qimasee qini qima qiminau. Qinee moomoo faiqi asumu amiana anisaaqari ani aruakinausa moomoo maqannaasaika mifaranoo. Qinee maa maqana ani aiku asauku nimiananoo naaru naaru misaindika minoo mariannoo.

5 Ani amaaku qara Isipa maqasaa kambiqara qanda qinee Kannaana maqasaa kaqi marunaqa kambiqaa qanda Mannaseesa Eefaraimasa qini faiqi qara Reeubeenasa Simeeoonasara foora marifaranoo. 6 Anee akaqa faiqi namu maqa sainausa misa anindika mambi marifara. Misa nári nifasaa qanda Mannaseesa Eefaraimasakinaa qumiasana ainaina maree faranoo. 7 Qinee ani anoona Raseera nammarinara iriqa miqi qidaqa. Mifa qini firaa qimudaoo qiranaki Kannaana maqa maaqaki kuqinau. Qinee Meesapootamia maqa maaqaindari ani mariafananoo aanai Eefarataa maqusa aaqa kuqinau. Qinee mina iri Eefarata maqusai fimaru aanna afainni akundaqiafana. (Maqee Eefarataa maqusara Beedeeree maqusee qidaqa)

8 Yakooboofa miqi qimaseenoo Yooseefaana amaaku qara nindafeenoo qinau. Maaqanda yana faiqi qaree.

9 Qufanoo Yooseefaafa qinau. Qini faiqi qara Anutufa Isipa maqasaa mariafananoo qimu qanda maridaqa. Yakooboofa mi ufana iriseenoo qinau. Doo miqanda nifiqee mai qinee unnaqoo adeedi minisainaqa nifaaqooqa qima nimaqaa. 10 Yakooboofa nauraiqi marunara sia amiqimmasee afu maqee marinau. Yooseefaafa narí amaakuqara minisoofanoo oonu mafi kaqaramma qumareenoo nimooqanau.

11 Nimooqa namasee Yakooboofa Yooseefaana qimaminoo qinau. Qinee sia kaifaa ani qafaanauree qunanoo Anutufa kai qifaqa ani faiqi namu niqafaidaqa. 12 Miqi qimasoofanoo Yooseefaafa narí akoona afundana saaqaraana narí faiqi qara qumareeqeenoo narí akoona afunni oorindari maqasaa aqufinau. 13 Yooseefaafa narí akoona afusaa kummarama fufanoo Eefaraimmana mara munu Yakooboona asaaqai quqaseenoo Mannaseena mina asaukuannai quqanau. 14 Quqasoofanoo Yakooboofa asauku qara fiqaree aiqaree mambufanoo akaqa Eefaraimana saa asauku uqannai quqeenoo afasaana Mannaseena saa asaaqai asauku quqanau.

15 Miqi mandeenoo Yooseefaana afaaqooqa qimamaqeenoo qinau.

Qini qikausa mara Abaraqaammana faqa Isakeena faqa nikoofa Anutufa maa faiqisa amiqi amiqimma nimaqaani. Qini qifiqamaree maaqoo maqee miniqaifaqa marunna Anutufa misa amiqi amiqimma nimaqaani. 16 Qini oosana oosana madainaina kinaana itita qimaqoo qangiroofa misa amiqi amiqimma nimaqaani.

Qini duqu faqa qini qikooqanda Abaraqaammasa Isakeesa nuqu faqa maa faiqi qandasaa mariani.

Miqanda moomoo faiqi maqasaifanoo moomoo miqanda kiqari kambiqafi mariaqa.

17 Yooseefaafa narí akoona asauku qafoofanoo aundura mandai kufanoo narí akoona asauku qumareenoo afasaanasaa asaaqai asauku quqaqoona mareeqee akaqasaa quqasee akaqasaa asaukuannai asauku quqaqoona mareeqee afasaanasaa quqarara qinau. 18 Oo qipoo anee sia andeeqaananoo indaaruqaafa mai maridanoo aneenna asauku uqannai asauku mina akiiqasaa quqaaqaana.

19 Miqi qufanoo mina akoofa qaoo qida qinau. Qini qimaaku qinee iridaqa miqidaqa. Indaaruqaafa mifa faqa mina aiku asauku moomoo marifaranoo. Inaaqiannaana aiku asaukuqa firaa afeeka maqannaauqanna marifaranoo narí afasaana ooraaqaranoo mariannoo. 20 Miqi qimaseenoo mi faasaanna nifaaqooqa qima nimaqeenoo qinau.

Isaraee maqannaasa nifaaqooqa qiqa anisaa qimasaida qifaranoo.

Misa maaqi qifaranoo Anutufa Eefaraimmana faqa Mannaseena undeemma amaqaani. Miqunannai Yakooboofa Eefaraimmana uqeerasee Mannaseena rafaaqa finau. 21 Miqi qimaseenoo Yakooboofa Yooseefaana qimaminoo qinau. Qinee kuqirara midaqa Anutufa ani faqa maridanoo ani afiqee aninna akeeku akaaku maqasaa ooru fuannoo. 22 Seekeemma maqa maaqa amiqirafa maridanoo. Qinee ooqai qeeqa duru feefannoo Amoora maqannaasa faqa rakusee maraafanna maqana ani amianaura sia ani akaqaa fasaauqa nimianaura.

<- OOSANA 47 OOSANA 49 ->