1 Qini qikaqaafasaauqa inniki moo fannoo mandainainaki aqufinaqa qafeeqa Anutuna oosanara irimariasa mina mareeqee andeeqaranaki quqaaqa, sia aanoomasee miqi iaqa reendeenamandee miqi iaqa anee mi fasiqana dadaaqidana aneenna marirana faqa rakisia, anee faqa minaki aqufinafaara. 2 Innee narí ummaara narí ummaara dadaaqiaqa, miqiqa innee asauku mundirana sandufamau kaaqa andeeqasee fimariafanoo. 3 Faiqí moo fannoo ureeqarafa nariara uriqararausee qimasee sia qinee oorudupirausa dadaaqianauranoo fee qimarifa narí kai narí akaruqidanoo miqi qidanoo. 4 Aiqama fasiqa anaasee nariqa kai nári marirana nirana nári kai amanamasee qafaaqa, sia moo naindisaa amanamasee qafaaqa narikai narí marirana auqarana amiqirafa marinanoo narí kai qafamasee asasiannoo. 5 Aiqamausa nári umaara nári kai marasee quandaki aqoonausa faqa dadaaqiaqa.

6 Akaqa fasiqauqa Yisuna ufa inni qimannimifaqa innee misa ufa irimariana akiqara quandaki narana munnimma, maaqa, ainaina naida nimiaqa. Miqidaqa innee misa ummaara dadaaqifaranoo.

7 Innee sia inneeqa nikaru qiaqa, sia innee amana Anutuna afusaa ititasee furufariranaki quqeefaranoo, mifa maasa oosanara iridanoo. Anee narana asumu ummaqinana mina kai unakinnaranoo, anee nana mandoosana niminana anee mina kai mareennaranoo. 8 Faiqí moo fannoo narí faiqí faiqi manda nidiranannai manda maqaki ummaquseenoo minakinaana kuqirana kai unakuannoo. Mifa Anutuna maraquna oosana marasee Anutuna afuqaki ummaquseenoo minakinaana naaru marirana kai unakuannoo. 9 Minara iriseeqa amiqira mariranara sia kudoosaapeeqa minnisaaqa maasa sia minniseeqa kaqi mi mau fidaqa kasooqaqee unnakirana paqurianaura. 10 Minara irisee maana qimannimidaqa maasa aiqamausa amiqira dadaaqirana dadaaqiaqa sia moodaakari kai, maqee maqee dadaaqirafa kambiqafinana dadaaqiaqa. Aiqamausa dadaaqidana niqoonausa Yisuna saqariki mariasa firaaqoo dadaaqiaqa.

11 Doo qinee Pauroosa moo fasiqa qimami marunanoo mifa akara ridanoo doo maqee qeeqa kai kirifi qumaree ati rafaaqafira ufa qeeqa kai firaaqoo akara ridaqa. 12 Inniki nipatasaa akooqoo mari ainainara kai darara qimasee nimooqimariasa nariqa nimooqiaqee qimasaidaqa inni fainanduqiranara sandanainai qida miqiaqee qimariasa maridaqa. Misa sia kuqaa anoonainainau auqaidau fainanduquaqee qidau, misa asauku mundirana aunirira saqarisaa arunara qimannimiafaqa mina akiqara Yuda maqannaasa darifoo qimasee fainanduqira oosana Yisuna kuqiranasaa ootupamasaifaqa Yuda maqannaasa niranaqarafa asooaifanoo sia daruaqeera. 13 Misa inniara Yuda maqannaa fainanduqira oosana maraaqee qimariasa nári sia Mooseena sandufamau fimariasa misa inni Karatia maqannaara fainanduqira oosanara eedoo qianara kai nári nimooqiaqeera qimasaidaqa inni fuki faaki qidaqa.

14 Qinee qeeqara qidaqa qinee maasa karaambaiqa, asauku mundirafa, Yisufa aunirira saqarisaa kuqunara minara kai qinee uqeerasee amooqianauranoo. Mi auniriranasaa kuqunannai maa maqa maaqanasaaqaraa ainaina kuqinoo mari ifoo qidaqa sia kasidanoo minannai faqa qinee faqa kuqiara foora qimarunausa marunanoo maa maqa maaqanakinaa mandainaina sia qini qumaraidanoo. 15 Fainanduqira fee, sia fainanduqira fee, sia mifa anoona ainaina maridanoo. Anoona ainaina faiqí anaasee kuqaa naundurakinaafa fukaikamambinaqa andeeqasee marirafa mifamma anoona maridanoo. 16 Innee mi iriranamau fimariasa qimannimianaura Anutufa naundurai asooarana faqa Anutufa aidira nifauarana inniki faqa aiqama Anutuna faiqí anaasee maqasaa mariasaki faqa mariani.

17 Qini Pauroosa rafaaqafira ufa maaqimminoo maridanoo. Sia moo fannoo kafaa qiniara Yisuna ufara sia andeeqasee qimannimimari fee qifaranoo. Qinee kuqaa uqanna Yisuna karabusa ainainira fasiqa maridaqa Yisuna ufa andeeqasee qimannimiafannana akiaqara qini darufa qifaaqasaa qufaanakuru aanaaqi marifa mifa qiniara kuqaa Yisunaindi fee qimasee akoorooidanoo. Misa qini darusaafaqa mi ufaanakurunara Yisuna akarara foora maridanoo, aiqamausa qini qiqafamasee Yisunaindi fee qiaqeera.

18 Maasa karaambaiqa asauku mundirana Yisuna afaarirafa inniki mariani. Kuqaa.

<- KARATIA 5