1 Miqi qimasoofanoo Yaaweefa Mooseena qimaminoo qinau. Qinee moodaa ummaara kai Isipa maqannaasa karaambaiqa faqa mina maqannaasa faqa nimianaura. Miqimmasaananoo mifa inni idukusainaqa fifaranoo. Kuqaa uqanna mifa sia reendeenasaa inni niiqaannoo. Kaukaata qidanoo niiqaannoo. 2 Moosee anee aneenna maqannaasa maaqi qimasee qimannimia. Misa aiqama Isipa maqannaasa nári naaqa mariasa iramirifaqa nifaaqa auqi maria ainainna siruaannoo faqa koorannoo faqa auqirana nimiaqa. 3 Yaaweefa qufaqa Isipa maqannaasa Isaraee maqannaasara uriqararausee qiqau. Isipa maqannaa Faraoona ainainiranasaa rakisi marusa faqa aiqama faiqí anaasee faqa Mooseenara kaaqa uriqarara fee qimasee ainaina nimiraree qiqau.

4 Mooseefa Yaaweena mi ufana iriseenoo oonu Faraoona qimaminoo qinau. Yaaweefa aniara maaqi qinoo. Eendamuqusai uqanna qinee Isipa maqa maaqaki nuanaura. 5 Isipa maqannaa akoonaiqi ooqa faiqiuqa aiqama kuqifaranoo. Ani Faraoona faiqi ani amaaqa maqaaninnana saaqari oosana arasee miqooqaraasa ooqa faiqiuqa faqa kaaqa ureeqarausa ooqa faiqiuqa faqa aiqama naru taikaannoo. Aiqama burimmakauqa ooqa aanaaqiuqa faqa kuqifaranoo. 6 Aiqama Isipa maqa maaqaki ikifaafau qirafa firaafa mariannoo. Ooqai sia miqira iki raqarafa marinau. Kasooqaqee faqa sia miqira qikiraqarafa mariannoo. 7 Miqi marifanoo sia uqanna faini fannoo Isaraee maqannaasa faqa misa aandauqa faqa nindafeenoo kau kau qiannoo. Miqinana anee qinee Yaaweesa Isaraee maqannaasa faqa Isipa maqannaasa faqa rainee marunnanara irinnaranoo. 8 Mooseefa kafaa Faraoona qimamidanoo qinau. Ani ainainiranasaa rakisi mariasa aiqamausa qinee iannannai anireeqa qini doorinni niqoori saunu arafiqa qiniara doo aneenna maqannaasa nifiqee fuannee qifaranoo. Miqi qifaqa qinee doo fuanauranoo. Mooseefa miqi qimasee aranaqoofanoo aanoomaseenoo raudanau.

9 Raudamafufanoo Yaaweefa Mooseena qimaminoo qinau. Faraoofa ani ufa sia uqanna iriannoo. Miqi marinaqa qinee faiqí sia auqaaqaa ira ainaina moo faqa moo faqa auqaanaura. 10 Mooseefa faqa Aaroonafa faqa Faraoona oorisaa mi oosana oosanna ainainna auqoofanoo mifa sia irinau. Yaaweefa qufanoo kaukaata qira irirana maraseenoo sia niqiqoofaqa mina maqa maaqakiqari fiqau.

<- RAFUDOO AKARAFA 10RAFUDOO AKARAFA 12 ->