1-2 Oo Timooti anee Yisuna ufa irimariasa faqa maridana sia faiqí firaasa ufa arua. Faiqí firaasa ani akausara foora marifana reendeenamandee ufa qimannimia. Kumaaraauqa faqa aneenna akaqaafasaara foora kai ufa qimannimia anaasee firaasa faqa aneenna anausara foora amiqimasee kai ufa qimannimia. Maanaaqa aanaaseeuqa faqa aneenna asooqmaakara foora andeeqaseenana kai misa faqa ufa qia.

3 Adeedaana aanaaseeuqa misasaa rakisi mariasa sia marifana anee Yisuna ufara suqimariasa qimanniminaqa miqira adeedaanauqasaa andeeqara rakisira rakisinnimaqaaqa. 4 Adeedaana aanaaseeuqa marifanoo nári ninaiqimara faqa faiqi namufaqa marifana anee qimanniminaqa misa quandafi nári ninausa nitaatoosamara amiqimmandee rakisinnimaqaaqa. Anee miqidana maana faqa qimannimia, misa Anutuna ufamau fidaqa indaaruqaa ainaina mifa mariannoo. Misasaa dadaaqamannisaidaqa nári ninaukoo kadaapi akiaqara nimimariafanoo. Anutufa faqa mi oosannara aqaara raidanoo. 5 Adeedaana anaasee moo fannoo maridanoo minasaa rakisirafa moo fannoo sia marifa mifa kaaqa adeedaana uqanna maridanoo. Miqira adeedaana narí irirafa Anutunasaa mundirafa maridanoo eendaki faasaana Anutunara dufi dufi qidanoo maridanoo minara kai dadaaqiannee qidanoo innaaru qidanoo. 6 Adeedaana aanaaseeuqa oosana moo aaqaidaqa maridaqa nariqa nidimari ainainnara kai qiqanuasauqa maridaqa misa doo kuqiqa maridaqa miqiqa nidaqa. 7 Anee mi adeedaana anaaseesara qimanniminaqa andeeqasee mariaqa munuqi miniqi qiqani foora.

8 Mi ufana aiqamausa qimannimia. Maa ufana faqa qimannimia. Moo fannoo Yisuna ufa irimarifa narí aiku asauku faqa narí afaaqasaa aiku asauku faqa narana faqa qamunnaina faqa sia rakisinoo sia dadaaqinannai narí miqinnanannai Yisufa saqarikirana narí ateekeenoo aamina fasiqa mandoosana finnaaqaramasee mareenoo miqidanoo.

9 Oo Timooti ani Yisuna ufara suqimariasasaa rakisirausa mariasa maridana adeedaana anaasee asooqauqa misa náriara naaduma aanaaseesaa rakisiranaikiqa mariaqa. Sia kaqiqee adeedaanauqa mi saikanaki mara quqaa, qaara moo fasiqa niku nisauku taikasee aukuana (60) maraqaasa adeedaanaikida asooqaqee mariasa kai mi saikanaki quqasaina maria. Moodaa fasiqasaa amundoo adeedaanafa kai minaki mariani. 10 Mi anaaseefa ooqai afaari marufa marinnana mifa kai minaki mariani narí faiqi namu amiqimasee firimaru aanaaseefa marufa mifa kai mariani, aanaamuru dapi aanaamuru amiqimmandee rakisimarufa faqa Anutuna ufa maqusa maqusa nida qimannimimarusa faqa narana maaqa nimimarufa oosana oosana mandainainaki aqufimarusa dadaaqimarufa, oosana oosana amiqira ainaina eedoo qimasaida auqee marufa miqi maru anaasee asooqausa kai rakisirausaikiaqa.

(Mi asooqa adeedaanausa saika Timootina aukuana maaqimminoo marinau. Misa fuka anaasee nári nifaaqmaaka faiqi namu rakisiaqeera qimannimidaqa naakapee mariqau. Aaqamaki kaqirunna fusa andeeqeeqeenoo Anutuna aanai ubeekee mariqau. Mandainainaki aqufusa andeeqasee Anutuna ufa naakapee mariqau.)

11 Oo Timooti sia kumaaraa adeedaana anaasee maramaree anaasee rakisiranaikia. Kumaaraa anaasee kaifaa faiqiara riqa asauku mundirana saika nimina minnisee foora. 12 Misa asauku mundirana saikaki marianauree qima afeekaikamasoona ateekeefoora. 13 Kumaaraa adeedaana anaasee moomoo suanisaa maaqakiaqa fifau nimariafanoo ainainira aukuana ainnaaqaree marisa mariafanoo. Misa miqiqa nidaqa manda uriqarara irirana marasee unnufa munuqi miniqi qiqa nidaqa sia qiaqaa ufa qiqa nidaqa. 14 Oo Timooti qinee Pauroosa kumaaraa adeedaana aanaaseera maaqi qidaqa, misa andeeqasee mariaqeera. Misa kaifaa moo fasiqa marasee faiqi minasaa maqasee nariqa faiqisaa rakisida andeeqasee mariaqa. Misa miqi marifanoo maasa namuqaa Yisuna ufara nikooqee marisa maasaki randasee sia mandoosana paqurimasee mandufa uqeeraaqa. 15 Akaqa adeedaana aanaaseeuqa Anutuna ufakiqari rakeemaki Sadannana afaqee doo fia.

16-18 Yisuna ufara suqimariasa misa rakisirausa akaqa adeedaana anaasee naunannaasa siaisasaa rakisifaranoo, akaqa adeedaana aanaaseera naunannaasa faqaasasaa sia rakisiraree qidaqa. Mi adeedaanausa nári naunannaasamara nifiqa quqasee rakisifaranoo. Miqifanoo Yisuna ufa suqimariasasaa rakisimaria rakisirausa sia mi umaarana maraaqeera.

Doo adeedaana anaasee ufa taikasee kaifaa Yisuna ufara suqimariasara qianaura. Anutuna tamummaqara fasiqa ooqai marusa akaraki ainaini mariasara qidanoo purimakau kikiqusidanoo maaqi qidanoo.

Mi tamummaqara fasiqausa akara minara kafaa maaqi qidanoo.

Timooti Yisuna ufara suqimaria maqanaki keeqee mariasa miqi kai iaqeera qidaqa.

Yisuna ufara suqimariasasaa rakisirausa amiqimasee Anutuna saika uqeeree mariasa Anutuna ufa kadaapi rumasee asaana rumasee fuki faaki imariasa Yisuna ufara suqimariasa sia amana kai feefauru nimia fiqaramasee aabaara faqa nimia.

19 Faiqí moo fannoo Yisuna ufara suqimariasasaa rakisiranara anireenoo mi rakisiranara aaqaidanoommifoo qinaqa sia mi moodaa fasiqana ufa iriaqa, naríara qidaqinoo. Faiqí qaraqanda fee qaaramoo fee aniree minara qifaqa mina irisee andeeqaaqa. 20 Yisuna ufara suqimaria maqanaki keeqee marifa manda oosana marainaqa aiqamausa nifusaa minara qaoo qidaqa ufa qiaqa. Miqimasaifaqa aiqamausa rufiasee sia miqifaranoo.

21 Oo Timooti qinee Pauroosa Anutuna faqa asauku mundirana faqa naaquqara qangiroouqa faqa misauqa nifusaa qinee doori kandamaseeqa ufa ani qimamianaura. Qinee maqee maa papiqanakinaa ufa qimamunnana amiqimmandee mi mau kai fidana Yisuna ufara suqimariasasaa rakirausa nariqa saika amanakai feefauru nimisee andeeqasee nári aaqarana aiqamausa nifusaa koorooia. Sia moonara qiqoondifee qimasee mina aaqarana kukeeqaisaa, sia moonara aamoondi fee qimasee minaindi akooroo maisa. Aiqama misoo maasoo moodaanaki kammasee rakisinnimaqaa.

22 Anee sia dauni faiqí moo mareeqee Yisuna ufara suqimariasasaa rakisira saikaki quqasee sindimeera foora quqamaqaa. Anee sia moosa mandainainaki aqufua, aninna marirafa aninna afaaqa anukarafa kai mariani.

23 Timooti anee aranandaki maqee maqee aurimariananoo qinee minara irisee ani qimamidaqa, anee nammari uqanna kai maqee maqee neemariananoo anee sia mina kai naa, maasa maqee maqee neemarunnana uainna nammarina reendeenimarina mina kaqikaaqoo namasainanoo aurirafa taikaani.

24 Faiqí akaqausa misa mandainaina fannoo aiqamausa nifusaa akooqoo maridanoo. Miqira mandoosana fannoo nári nifusaa akooqoo misa rarisameeqeenoo mandainainaki quqaidanoo. Faiqí akaqausa mandoosana sia dauni qafeefara kasooqaqee akooqoo kambiqainaqa qafeefaranoo. 25 Miqi kai inoo amiqira oosana fannoo aiqamausa faiqí nifusaa akooqoo maridanoo. Kukeeqara amiqira oosana faqa sia kisaaqasaa kukeeqanoo mariannoo kasooqaqee mifa faqa akooqoo mariannoo.

<- 1 TIMOOTI 41 TIMOOTI 6 ->