1 Qinee asauku mundirana Yisuna aanna raidaqa innee miqikai iqa qini daanna raaqa.

2 Oo Koorinti maqannaasa innee qiniara maqee maqee irisee Yisuna ufa irimariasa sandufa qinee qimamiafanna ufamau fimarianara inni nimooqidaqa. 3 Qinee maa moodaa ainainnara kai inniara iriaqeera qimannimidaqa, aiqama fasiqa nári ninaaqmaaka urinaaqararausa maridaqa kafaa asauku mundirafa aiqama fasiqa urinaaqararafa maridanoo. Anutufa asauku mundirana uraaqararafa maridanoo.

(Pauroofa narí maqannaa anaasee oosanara qimaqoofa sia maasaki maridanoo. Anaaseeuqa nariqa andeeqara oosana marasee narí nifaaqmaaka nimeemaanai oorudupi mambunara kooroo ianifeera qamunnannai nikiaqa rumbarausa amaana maqaki keeqee mariqau. Sia nikiaqa rumbasaidaqa keeqee marusa nisaurirana mara nimimariqau. Ummuari mari anaaseena paqurimasee asaurirana maraanifee qimasaida akiqa maqa namufaqa indufu aqimariqau.)

4 Qinee Pauroosa faiqí narí anaaqa uraaqararanara irisee maaqi qidaqa. Faiqí moo fannoo akiqa rumbarafa amaana maqaki keeqafi aiqamausa nifusaa innaaru qina fee Anutuna ufa qimannimina fee asauku mundirana asaurirana amiannoo.

5 Anaasee moo fannoo amaana maqaki keeqafi Anutuna ufa qimannimiannoo fee innaaru qiannoo fee akiaqa sia rumbarafa mi anaaseefa narí afaaqi asaurirana amidanoo ummuari mari anaaseena amanakai maridanoo, akiaqa maqa faqa indufira anaasee amana amana kai maridaqa. Saina akiaqa qamunnannoo rumbasee amaana maqaki keeqafinoo innaaru qiannoo fee Anutuna ufafee qimannimiannoo fee, andeeqanoo mariani. 6 Anaasee moo fannoo sia akiaqa rumbarafa amaana maqaki keeqaina see munusee akiaqa maqa faqa indufu aqusaa. Anaasee akiaqa maqa faqa indufirafa asaurinoo akiaqa qamunannai rumbarafa amaana maqaki sia asaurirainni kaqi keeqaannoo. 8 Indaaru Anutufa sia aanaaseesaa qaraana faiqí auqinau, faiqisaaqaraana anaasee auqinau. 9 Anutufa sia anaasee dadaaqianifee qimasee faiqí auqinau, faiqiara iriseenoo anaasee auqinau.

7 Faiqí Anutuna amana faqa Anutuna areenarafa faqa minaki marifa marinara sia akiqa rumbarafa amaana maqaki keeqaannoo. Anaasee faiqí areenarafa minaki marifa marinara akiqa rumbarafa mariani. 10 Qangiroora maasa qiqafaidammiaafoo qimasee nári nifaaqmaaka ureeqarausa marianara koorooianifeera nikiaqa rumbara anaasee amaana maqaki keeqaaqa. 11 Maasa karaambaiqa ufamau fidaqa maa irirafa kai mariani, anaasee naríara aadumai marianinafa fifau mariani, faiqí miqikai masee aadumai marianinafa fifau mariani.

12-15 Indaaru anaasee faiqisaaqari kambiqanau miqikai inoo miqooqari faiqí fannoo aanaaseekiqari kai kambiqaidanoo doo mi aiqama ainainaqanda Anutunakiqari kai kambiqanoo maridanoo. Faiqí fannoo akiqa asausi kisaaqa marinaqa faiqí anaasee narí kai nariara nariara irisee mandainainee qimasee nisaurifaranoo. Anaasee kisaaqa akiaqa asausifaqaanara sia miqidaqa amiqiranee qidaqa mi anaaseefa minara firaaqoo nasuridanoo. Anutufa anaasee kisaaqa akiaqa asausi inni nikiaqa paranna rafaaqafuanifeera niminau. Inneeqa kai iriaqa, anaasee sia akiaqa rumbara anaasee fannoo aiqamausa nifusaa amaana maqaki innaaru qirafa andeeqaidanoo fee sia fee andeeqaidanoo. Sia andeeqaidanoo. Innee minara irimariafanoo.

16 Faiqí moo fannoo yafee ufa rainaani qimasainaqa maa ufana kai qimamianaura, maasa maaqooqaraasa faqa Anutuna ufara maqusa maqusa suqimariasa faqa mi ufamau kai fidaqa sia moo oosana maraidaqa.

17 Innee Koorinti maqusanaasa Anutuna ufara suqidaqa sia amiqimmandee suqimariafanoo mandainaina kai kambiqaidanoo, minara maa ufana sia nimooqidafau qimannimidaqau. 18 Innee Anutuna ufara suqidaqa raina rainidaqa aanooqimariafaqa qimaqimiafaqa qinee iriqa akaqanara kuqaa fee qidaqa. [ 19 Aaqarausa faqa andeeqarausa faqa moodaanaki marifanoo kuqaa rainarafa kambiqaannoo. Miqimasainanoo aaqee mariasa faqa andeeqarausa faqa kooroo ifaranoo.]

(Pauroona akara rumannimu aukuana Yisuna ufa irimarusa sia maqee maasa imarunandee aafaqa neemariqau, misa nári ainainirana taikasee eendaki aafaqa nararee qimasee nári narana deedaqammamaree mara maree moodaa maqaki mini quqasee qoomaqa sakasee namasee inaaqianna feemu marasee ruqi ruqi masee uainna nammari misa maqee maqee neemaru nammarina namufaqa innaaru qimasee namasee fifaini mariqau. Faiqí anaasee oosana oosana suqiqau. Ainaina faqaasa faqa kudi fasiqa faqa oosana oosana ainaini mariasa faqa nariqa ainainirana taikasee eendaki aniree moodaanaki suqiqau. Akaqausa furufara maseeqa narana moomoo namataikasoonara ninnaaqiana anusa naararanau. Akaqausa uainna nammari moomoo neeneesee sipakiqa furufariqau, Pauroofa minara iriseenoo maaqi qimasee akara rumannimaqanau.)

20 Innee Koorinti maqannaasa Karaambaiqa qoomaqa suqufi naani qimasee innee sia kuqaa suqufi mina nararee qimaseefau aniafanoofau furufaridaqa naidaqa moosaindi faqa neemariafanoo. 21 Akaqausa nári maree ania naranna sia naida nimidaqa nariqa kai naafaqa akaqausa naarara maridaqa, akaqausa uainna nammari moomoo naida furufarida. Miqiafanoo mi qoomaqafa sia karaambaiqaindi maridanoo. 22 Innee maaqa siaisee maqee maqee neemaria narana nammarina sia minaki naidee, innee Anutuna ufara suqimariasa fidiaqaamma nimaqaidee miqidee, innee nara ainaina siaisa nisaurirana nimianee fee qidee miqidee. Innee minara irisee qiniara nana ufee qimaqimiannoo fee qidee. Abee nimoofee qianauree. Oo sia uqanna nimooqianaura.

23-24 Ooqai qinee karaambaiqa ufa irisee qimannimiafanna sandufana maqee faqa kafaa qimannimianaura, karaambaiqa Yisufa Yudasifa ueeqoo eendanaki feemu asaukunnai qumareenoo Anutunara dufi dufi qimaseenoo, ruqi ruqi maseenoo maaqi qimasee narí faiqi namu qimanniminau. Maa feemufa qini qimaqi kikiqa usinoo maridanoo innimma kuqiranaki quqannimaqaanaura. Qinee kuquannanara aunifoora oonumafi iridaqa feemu maqee maqee naqafuaqa.

25 Misa mi feemuna namaseeqa kaifaa miqoo narana namasoofanoo Yisufa uainna maru kaafana nariqa maqee maqee neemaru nammarina qumareenoo maaqi qimasee qimanniminau. Maa kaafanaki mari uainna qini fidika kikuqusinoo maridanoo. Anutufa maqasaa fasiqa anaaseera qini faqa moodaanaki kira ufa marifanoo qini fidika fannoo mi ufana mapukira fidika maridanoo. Innee mina naqa fidaqa qiniara irisaidaqa naqa fuaqa. Yisuna ufa miqiminoo marifaqa qinee Pauroosa minara maaqi qianaura. 26 Maa maqee kamuqoo Karaambaiqa sia kafaa qumi mari kamuqoo innee mina yakamuqoo fee maa feemuna faqa maa uainnana faqa naqa fidaqa innee Karaambaiqa kuqiranara kooroo idaqa.

27 Qinee minara irisee maaqi qidaqa faiqí moo fannoo mina oosana furufarira fasiqa fannoo Karaambaiqa feemu fee mina kaafakinaa uainna fee furufara mandee namaseenoo karaambaiqa amaqi faqa fidika faqa mara maree furufara mamaqaidanoo naannoo. 28 Aiqama fasiqa anaasee nariqa kai nári naundura marirana irirana aiquqummasee oonumafi irirana iriseeqa feemu faqa kaafakinaa uainna faqa naaqa. 29 Karaambaiqa afaaqa oosana sia irimarifa kaqi fifau feemu faqa uainna faqa neemarifa Anutufa aruaninna ufana narí naidanoo narí afaaqai mafi quqaidanoo. 30 Innee Koorinti maqannaasa miqianara moomoosa aurimariafanoo kudoosaapee mariafanoo akaqausa doo kuqiqa maridaqa. 31 Maasa indaaru qeeqa daundura marirana qimanammandee andeeqasee naananoofau sia Anutuna darira ufa ameemaanai marunaiqini. 32 Maa maqanasaaqaraasa Yisuna ufa sia irimariasa kuridiranaki fidaqa maasa misa faqa fuanoora maqee kamuqoo karaambaiqa niuqummasee naridanoo.

33 Qini qikaqaafasaauqa maa ufana iriseeqa karaambaiqa qoomaqa naani qimaseeqa qinaaqiana aninausara nifeesamasai faqa aniraifaqa doo moodaa kari oonuree naaqa. 34 Moo fannoo aararainafa aneenna maaqaki oonu namasee ania. Miqimandee moodaanaki keeqafifanoo Anutuna narira ufa fannoo sia innisaa mariani. Doo qina kai qimannimiqa qinee innee iannai fiqa akaqa ufa qimaqimuna andeeqaanaura.

<- 1 KOORINTI 101 KOORINTI 12 ->