Parpar ke Jon 18

Babilon ka Luut

1 Nami na foron tier igii, ia ka par nenge angelo sabin i pupu la tinbae na kukulii. Imel e tara rakrakai kia ma piklinbat ka malal tikii na memeh kia. 2 [a]Ke ka lala perek aragii,

“Ka luut tah! Ka luut ta e tara maleh na Babilon!

Ma igii ka tapiek maleh ken foron kinit,

ke felun mumumun ken foron tanwa laulau tikii,

ke felun mumumun ken foron man tikii

ae ri duh ma ri laulau kanaka.*

3 [c]Wara le fanu na marmarsan falifu tikii

ri ka umin ta wain rakrakai tina sinangun puur kia.

Foron king tina piklinbat

ri ka tel ta sinangun puur tura.

Ke foron tom foimnge pitkalang tina piklinbat sabin,

ka fuun ta e minsik kiri

tina foron sinangu ae i laulau kanaka.”

4 [d]Namih, ia ka ongen kinen tikas sabin tina kukulii ka tarah,

“Fanu kiak,

gam suuh koseng u,

isi gong gam fatal u na

foron sinang laulau kia

ke isi gong gam kalsakai

ti fangungut ae in kep u.

5 [e]Wara le foron sinang laulau kia

ka kiiskiis pungpung ubae tom na kukulii,

ma God i wol papte

foron tier laulau tom ae i tel ta u.

6 [f]Sani i ta ta u usuf gam,

ta fafis u sing i.

Ma fawu rin kiliis fafis u usuf i,

namin sani i tel ta u.

Kap na dan rakrakai ae i faumin ta gam ini,

gamen kiliis fafis u usuf i

ini dan ae i rakrakai kanaka.

7 [g]Ta tara fangungut turan tara mamais usuf i,

in fasi ini memeh ae i me ta u ini,

turan minsik ae i kiis ta na olo.

Na wolwol kia,

i usefages u tom aragii,

‘Ia kiis arae nenge kuin,

biil ia nenge makos,

ke biil ifasi ian mamais.’

8 Pesu, foron tatawin

arae minet, mamais ke fitol,

in tapiek lo na in tikii e biing,

ma ik fatakal u.

Ke ik sok tikii na yiif,

wara le i rakrakai e Kumguui God ae i nagogon u.”

9 [h]Foron king tina piklinbat ae ri tel ta sinangun puur tura ma ri ka fatal u na foron sinang laulau kia, rin mamais ke rik teng aunbiing rin par bau na yiif ae in sok lo. 10 Rin ti tapak koseng u, wara le rin nangnangih na fangungut ae i kalsakai u ke rik teng aragii,

“Kiskam! Kiskam!

Kiskam e tara maleh.

Babilon, rakrakai na maleh!

Na fatuklin aunbiing sau,

ke nagogon ke God ka falaulau wo!”

11 [i]Fanu tikii tina piklinbat ae ri foimnge pitkalang la rin teng ke rik mamais, wara le biil mang tikas in fiil ti tier sing ri. 12 [j]Foron tier arae: Goul, siliwa, foron fat ae i fen kanaka e matri ke foron kolson matanwah. Foron rokap na kaen, foron kaen ae i par arae sian gaih, foron kaen ae i silika ke foron kaen ae i melmelek. Foron au tikii ae imel e rokap na sana, foron tier tikii ae ri tel u ini kom na elefen, foron au ae i fen kanaka e matri, baras, aen ke nenge matngan fat ae ri foteng u ini mabel. 13 Ke fale tier ae i furung rokap e sana, arae sinamon, mir ke foron tier ae bau lo i furung rokap. Ke wain, wel na olif, palawa turan wit, foron bulmakau, foron sipsip, foron os turan kariis ke foron fafauun foes sabin.

14 Ke rik tara aragii, “Fuan au ae o masmas u la, ka mangmangal ta koseng o. Foron minsik turan memeh kiam ka mangmangal ta koseng o ma biil mang on par u sabin.” 15 [k]Fanu ae ri foimnge pitkalang la na foron tier ae ke ka fuun ta e minsik kiri lo, rin soti tapak koseng u, wara le ri nangnangi na fangungut ae i kalsakai u. Rin mamais ma rik teng 16 ma rik tarah,

“Kiskam! Kiskam!

Kiskam e tara maleh.

I kilkiliis la ini foron rokap na kaen,

fal i par arae sian gaih

ke fal i melmelek.

Ma i ges la ini goul

ke ini foron kutkute ae ri tel u ini foron fat ae i fen kanaka e matri

turan foron rokap na kolson matanwah.

17 [l]Itikii sau e awa,

ke tara minsik kiam ka laulau tikii!”

Foron kiapten tikii, fanu tikii ae ri wof la na foron sip, foron tom foim na foron sip turan fanu tikii ae ri kep pitkalang la na palgantes, rin soti tapak. 18 [m]Aunbiing rin par bau na yiif ae i sok lo, rik tarah, “Maleh sa i arae tara maleh igii?” 19 [n]Rin saba piyiif na paklu ri, rik mamais ke rik teng aragii,

“Kiskam! Kiskam!

Kiskam e tara maleh.

Fanu tikii ae imel e foron sip kiri na palgantes,

ka fuun ta e minsik kiri tina foron minsik kia!

Isau le na itikii sau e awa,

ka laulau sikit!”

20 [o]“Kukulii, on laes isi!

Gam fanu kalkaluu,

foron aposel ke foron profet,

gamen laes,

wara le God ka nagogon ta u

kunan sani i tel ta u ulo gam.”

21 [p]Ke nenge rakrakai na angelo ka kep nenge tara na fat arae fat una fapekpekes wit ke ka lin u na palgantes ma ka tarah,

“Tara maleh na Babilon,

rin lin fatuktuk u arae fat igii,

ke in mangmangal sikit.

22 [q]Ke kinen gita, kinen foron tom seksek,

kinen foron tom kuf tulal

ke kinen foron tom kuf tafih,

biil mang rin ongen u na maleh igii.

Ke biil sabin rin par fanu

ae ri usum na marmarsan foim aiwa.

Ke biil sabin rin ongen kinen fat

ae ri fapekpekes wit la ini aiwa.

23 Biil ti malal na lam in popos sabin aiwa.

Biil sabin rin ongen

kinen ti kaltu ke fifin

ae ru fakekel fuuh aiwa.

Fanu kiam ae ri foimnge pitkalang la,

i laumet ta e asri na piklinbat.

O lame fager fanu na foron funmat tikii

ini malera kiam.

24 [r]Ma na Babilon, ri tafe daun foron profet,

daun fanu kalkaluu

ke daun fanu tikii ae ri siimete ta ri na piklinbat.”

<- Parpar ke Jon 17 Parpar ke Jon 19 ->