1 Falimlim ke God igii biitom, isi fanu rin kau na salan mangeh kia. Pesu keren tumarang, tarama fal lo gam biil rin to kau. 2 Wara le kere sabin kere ka ongen ta Rokap na Fafas arae foron tubutamat kerer. Ri ongen ta u, isau le biil i lupes ri, wara le aunbiing ri ongen u, biil ri luun u turan unune. 3BukSong 95:11Ma kerer sau ae kere unune, kere kau na salan mangeh kia. Ma God i use ta u aragii,
“Pesu ia ka ngaliaf, ma ia ka falimlim aragii,
‘Biil tom rin to kau ta na salan mangeh kiak.’ ”
Isau le foim kia i rop ta tom na aunbiing i fakiis ta piklinbat. 4Stat 2:2Ma nenge orek na Buk na Gogoh i ororek isi fafit u e biing, aragii,
“Ma na fafit u e biing,
God ka mangeh na foron foim tikii kia.”
5BukSong 95:11Ke arae nenge orek sabin ae ia ka use famu ta u, i aragii,
“Biil tom rin to kau ta na salan mangeh kiak.”
6 Falimlim ke God i kiis ta tom arae, le fal rin kau na salan mangeh ae. Ma fanu ae ri ka fas famu ta ri ini Rokap na Fafas biil ri kau, wara na sinangun ongen fabulwar kiri. 7BukSong 95:7,8Pesu, God ka luun nenge biing sabin ma ka foteng u le, “Igii.” Ma arae ia use famu ta u, na ifuun e bet namih, ka orek na ngusu Dewit aragii,
“Igii, male gam ongen kine,
gong gam fasorokai balmi.”
8Lo 31:7; Josua 22:4Male Josua i ta ta mangeh sing ri, ke God biil in use nenge biing sabin namih, biil. 9 Pesu, mangeh ae i kiis ta tom arae, i e Biingen Mangeh ken fanu ke God. 10Stat 2:2Ke aunbiing tikas i kau na salan mangeh ke God, i sabin i mangeh na foron foim kia tom, arae God i tel ta u. 11 Pesu, keren gugul tom isi keren kau na salan mangeh ae, isi gong tikas i luut na sinangun ongen fabulwar.
12 Wara le, orek ke God i liu ma i yan. I yen kanaka na popok una fapaket ae iun baba turim i yen. I kau sikit ma ka tempaek tanwa kerer ke balrer. Ma i kikiit sikit una falifu ae tua kerer ke gorop lo kerer ru fatafe lo. Ke i fapos foron wolwol kirer turan foron tier ae kere nunuk u la na balrer. 13 Biil ti tier ae God i fakiis ta u i mumun na mata. Foron tier tikii i sapeng ma i malmalal na mata. Ma namih, keren ti na mata ma kerek fapos foron tier tikii ae kere ka tel ta u.
Iesu i e Laulaumet na Pris kirer
14 Pesu, keren posefat na unune ae kere fapos u la, wara le Iesu, Kalalik ke God, i e Laulaumet na Pris kirer, ka tatkau ta ubae na kukulii. 15 Gong kere wol le Laulaumet na Pris kirer, biil ifasi in mais kerer na aunbiing biil ti rakrakai kirer. Wara le i tafe ta marmarsan fatoftof sabin arae kerer, isau le biil i tel ta ti sinang laulau. 16 Pesu, keren kep balamas ma kerek la fatat nian kiiskiis an king ke God ae ifuun ini famais, isi ik mais kerer ma ik lupes kerer aunbiing kere tafe tatawin.
<- Ibru 3Ibru 5 ->
