2 Kolin 7

1 Nakunum kumel ibolow mutuk fian duyembi kunum waneng yutaka! Yu kilele ibolow fukunina! Sunbin-Got e nulo weng fawtuk ayem fian be bokoyemse kasike kame, nukalem finik so kal anggil so be Sunbin-Got em kiin dim e ninik so keyembe eisneng alik alik be atin atin kuw koleweko, elo wangweng kelewsomi, akalem galmose em afak kuw kunum waneng emdiw keko, kakamuma!

Fol em Kalfong Kuluse Sang te.

2 Nakunum kumel kunum waneng yutaka! Yukalem ibolow mutuk kel e, aso nulo dolon keko, abin so keyembina! Nimtew angom? Feinka! Aso nu mali kunum waneng mak ilo wa keyemsomi, mali yeneko, kalak da koyemsomi, mali funum funum keyemeko, im on kisol kulinba kesuluw kasike. 3 Yutaka! Yulo geeyemomin beem mongom ete weng kale bokoyeminba kebi kate, suaem akalem bokoyemkabi weng akate kame iti bakayembite: Aso nu yom ibolow fukuneko, “Yom gomet em dulum elote finik so buluw dim yake, mani kuanbuluw dim yake!”, angeko, diwkuw yuso fewtokoko, buluw te. Feinka! Yu aso nukalem ibolow mutuk kel dolon keko, abin so biliw kasike. 4 Keko beli, ne kalaing kuw keko, yulo kaim dim weng kuw bakayemkabi te. Feinka! Ne yom ibolow fukuneko, yulo yemsulbomi, menew ibolow so keyembi kasike, kal ilum ding kebe ding kame, kalfong fian ete kuw alik num ibolow mutuk wenkabe te.

5 Nakunum kumel kunum waneng yutaka! Num Masedonia aneng fian talsuluw ding dim kabalak e, nu finengdalinba kesuluw te. Nimtew angom? Sakik ilum banban keyemei, kal ilum fian nulo kalak da koyemei, nu finganin fian kulusomeluwi, ibolow tiaktiak kesuluw kasike.[a] 6-7 Num ibolow banban kesuluw ding kabalak e, menew ibolow keyembe Sunbin-Got e nulo dokoyemei, iti kalaing ibolow duyemse te. Nimtew angom? Taitus e yom dulum koyemeko, num fukun teleko, “Kolin abiw mutuk fian kunum waneng i nelo kalaing kuw kenemsiliw te!”, yangse kasike. E nulo yom kanebiliw kukuw be bokoyemomele: “I Fol elo atemomin ibolow fian kesomi, wa kukuw kesiliw em mongom ete ‘Kaite te! Eke! Kanesuluw o!’, angesomi, ‘Wa kukuw Fol elo kukulewsuluw be iti kileluma o!’, ange ange kesiliw te.”, yangese te.

8-9 Keko kasike, sukum ding kelei, ne yom dim dabalayemsi fut beem kal ilum duyemse beem dulum elote sakik kulusi te. Kate kame, nem sakik be banimei, ne kalfong so bi te. Ne yom sakik ilum beem dulum kalfonginba kebi kate, yom fut teing bokoko, sukum ding sakik so kal ilum kulusililiw beem mongom ete yu “Eke!”, angeko, yom kakamin deiw alwol kebiliw beem mongom ete kuw ne kalfong so kebi te. Feinka! Yom sakik ilum kulusiliw ilum be Sunbin-Got em ibolow ki kelewse kasike, sakik be yulo dokoyemei, num fut beem weng e yulo wa keyeminba kese te.[b] 10 Nimtew angom? Sunbin-Got em ibolow ki kelewe sakik kal ilum e kawtiw nulo fein kal ilum duyeminba kebe kate, sakik ilum beem mongom e kanekote: Kunum waneng nu num sili sili ibolow beem dulum elote sakik kuluko, “Eke!”, angeko, num kuankemin kakamuw deiw kolewsomeluwi, e nulo finik so kulomin deiw kel mo koyemkabe kasike. Kate, kawin dim kaleem duyembe sakik ilum e kawtiw nulo kuankemin em deiw ete kuw koyemkabe te.[c] 11 Yu Sunbin-Got em ibolow ki kelewe sakik ilum yom mutuk dim kel kitil aluwbabe beem dem e kilele atebamoliwka! Aluwbamin beem dem e kanekote:

Yom fein ibolow e iti kitil kuw kelei,

yom sili sili kukuw koleweko, kiol kuw kakabiliw kukuw e alik im kiin dim kilele fitewsomeliwi,

yu sili sili kukuw elo digaka kelewsomi,

“Nu kanelom beem kukuw iti kelokoluw te!”, angeko, finganeko,

bokolomeliw: “Nu Sunbin-Got em kiin dim e kiol kuw kukuw kebuma!”, angeko, beem kukuw kuw ibolow fulut fulut angbomi,

kukuw be kitil kuw gelewbomeliwi,

wa kekabiliw kawtiw ilo ilum duyemeko, im kukuw “Alwol kelina!”, angomi, kilelyemkabiliw te.

Feinka! Yom kiol kuw kebiliw kukuw be kawtiw alik alik im kiin dim e kilele fitewkabe te.

12 Nakunum kumel kunum waneng yutaka! Sili sili kukuw keyemsiliw kawtiw im dulum o, ken bisiliw kawtiw im dulum o, “Ite kuw!”, angomi, fut be bolinba kesi te. Bayo. Kate, nem fut bosi ding kabalak e, nem ibolow fukunin fian e kanekote: “Yom dulum aso num dulum em ilum kebe be banimoka!”, angesomelii, “Sunbin-Got em kiin dim e yukalem aso nulo ibolow mutuk fian duyembiliw kukuw e kaim dim kuw keloke kae!”, angeko, fut be bosi te. 13 Nakunum kumel kunum waneng yutaka! Aso nu Taitus em kalan weng bokoyemse weng be kilele kiliko, iti kalaing kuw kulusuluw te. Kulusomeluwi, aso nu yom ken kukuw Taitus elo kukulewsiliw kukuw em sang kilisomeluwi, Taitus em beem mongom kalfong fian kuluse kakat atemeko, aso nukati kalfong fian kuw kulusuluw te. Nimtew angom? Yu elo ibolow menew kelewsiliw kasike. 14 Feinka! Sua e, aso nu Taitus elo yom fein ken ati sang kuw bokolewsomeluwi, aso nu yulo em kiin dim kel yemsulkabuluw te. Kanelewsiliw beem mongom ete yu aso num elo bakalewbuluw yemsulemin weng be fein dem so weng kelewsiliw te. 15 Em yom fukun talse ding kabalak e, yu wangweng fian keleweko, em weng kilele gelewsomeliwi, elo yom mutuk dim kel kulusiliw kasike kame, akalem beem ding ibolow fukunse ding dim bakate, e yulo ibolow mutuk fian kuw duyemkabe te. 16 Kasike kame, nakati yom ibolow fukunite: “I ken kukuw em deiw ete kuw gelewkabiliw kai!”, angeko, kakat fian kuw kekabi te.

<- 2 Kolin 6 2 Kolin 8 ->