1 Eke nakunum kumel kunum waneng yutaka! Fol so Timoti so, aso nu nono keluw ete, iti nukalem wiin daobuluw a? Aso nu mali kunum waneng im num sang bosiliw em fut kuluko, yulo duyemsomi, yu teing bokoko, num kiol kukuw kilele kal kelokoliw a? Aso nu mali kawtiw imdiw keko, “Yu nukalem sang ken em fut mak boliw kano, nu fut beelo de uneko, mali kawtiw ilo kukuyemokoluw te!”, yangbuluw bani? A babo![a] 2 Yukalem ete yu aso nukalem sang ken bakabe fut atew te. Kebomeliwi, fut beem weng be aso num ibolow tem kel boliwi, mali kawtiw alik alik i fut beem weng be kilele atemeko, aso num kukuw ken be atin kuw kal kemoliw te.[b] 3 Nimtew angom? Kulais e aso num aluwbamin e akalem fut kom atew kelewko, bose kasike. Kate, e tum dim kel sak bomin eisneng so bolinba kese kate, finik so bin Sunbin-Got em Sunbin-Finik so kunum waneng yom ibolow mutuk tem kel fut be bose te.[c] 4 Kulais e alik beemdiw kebe kasike, alik nu atin kuw kal keluwete: Sunbin-Got e fut be kilele ken kuw bose te.

5 Keko kasike, aso nukalem kitil ete nu ki keko, aluwbamin be diweko, “Nukalem kitil ete kebuluw kae!”, angeko, nam aluwbamuw te. Kate, Sunbin-Got em kitil ete kuw aso nulo ki keyemse te. 6 Ki keyemse kasike kame, alik nu em kitakamin weng kikis em weng afak kunum waneng kekabuluw te. Kitakamin weng kikis be suaem kitakamin weng emdiw tum dim kel bolinba kese kate, Sunbin-Finik so bose te. Nimtew angom? Suaem kitakamin weng be kuankemin em deiw wan kese kate, kitakamin weng kikis be finik so bin duyemkabe kasike.[d]

7 Nakunum kumel kunum waneng yutaka! Sunbin-Got e suaem kuankemin em deiw wan kese kitakamin weng be tum dim kel bose kale. Bose ding dim be, kitakamin weng be auk so kitil so kese kasike, Moses em fut be kuluko, talse ding dim bakate, em kiinguen e ailbin fian so ailse kale. Ailbin be awkol awkol keko, daking angse kate, em tele ding dim bakate, Isalael kawtiw i ki keko, elo ateminba kesiliw kale.[e] 8-9 Feinka! Suaem kuankemin em deiw wan kese kitakamin weng be ken kuw auk so kitil fian kese kate, Sunbin-Finik em nulo Sunbin-Got em kiin dim e kiol kuw kunum waneng keyemkabe aluwbamin beem kitil so auk so be atin kuw katiw uneko, suaem kitil so auk so be bakilewkabe te.[f] 10 Yu kilele ibolow fukunina! Kameem weng kitakamin kikis em auk so kitil e atin kuw fian kebe kasike, e suaem weng kitakamin beem abin kulei, beem auk so kitil daking banim tew kekabe te. 11 Nimtew angom? Suaem kitakamin weng be sukum ding kuw bomi, auk so kitil so ken ailbin so fitewse kate, kameem kitakamin weng kikis be diwkuw diwkuw bomi, auk so kitil so ailbin filik fian so ke alakabe kasike.

12-13 Nakunum kumel kunum waneng yutaka! Nu kitakamin weng beem sang kiliko, “Fein!”, dangbuluw kasike, nu Moses emdiw kelinba keko, kitil kuw moko, finganinba kebuluw te. Moses em kiinguen dim ailse ding dim bakate, e ilim bala kuluko, kiinguen kasi kolewse kale. Nimtew angom? E ibolow fukunomele: “Mesik esik Isalael kawtiw i nem kiinguen em daking banim tew angakabe ailbin bete kuw kiin atat kelokoliw kae!”, angomi, kanese kasike.[g] 14 Kate, Isalael kawtiw im ibolow fukunin e du keyemse kale. Du keyemei, sua atew kame akal, emisik kitakamin weng fut teing bokoliw ding dim bakate, ilim bala atew be diwkuw diwkuw im ibolow fukunin be kasi koyemkabe te. Mak kawtiw mak i ilim be nam kulu koliw kate, Kulais em kitil ete kuw ki keko, fein kulu koloke te. 15 Feinka! Sua atew kame akal, mali im Moses em suaem kitakamin weng fut teing bokoliw ding dim e, ilim bala atew be im ibolow fukunin e kasiko, ge koyemkabe kate, 16 nimin kunum waneng ite mak ikalem kakabiliw deiw kolewko, Kamok Fian em mit elo uneko, deiw be kakamiw tewe, esik ilim bala be fein kulu koyemkabe te.[h] 17 “Kamok Fian” angsi weng beem mongom e Sunbin-Finik ete te. Nimin kunum waneng im dim ete Sunbin-Finik be be tewe, biim kakamin beem dulum elote eisneng mak nam ambet koyembelei, i dolon kuw kakamoliw te.[i] 18 Nakunum kumel kunum waneng yutaka! Alik alik nu kiinguen ilim bala banim buluwi, ok takak emdiw so Kamok Fian em ailbin filik so atebabuluw te.[j] Atemsomeluwi, Kamok Fian e akalem Sunbin-Finik so num dim aluwbabomi, nulo ailbin filik mak so mak so duyemei, nulo alwol keyembelei, fe kabalak e, nu akalem takak ailbin filik ati te so beemdiw kelokoluw te.

<- 2 Kolin 22 Kolin 4 ->