1 Yutaka! Sua kale akate, yu nelo fut mak boko, bokonemomeliw: “Num tum win kisol bonggusomi, Sunbin-Got akalem wiin so amkose kunum waneng ilo dabalayemokoluw em dulum elote nu kame nono kelokoluw e?”, nangsiliw te. Nelo dakalaliw beem yan weng e kanekote: Yu nem Galesia sios kunum waneng ilo kukuyemsi deiw akati gelewoliwka![a] 2 Gelewiw kasike, yu ben kel ben kel ding kabalak e, alik alik em emisik ding kele ding dim kabalak e, yukalem ibolow fukunin geleweko, yom aluwbamin kulusiliw em atuk mak duku kemoliwka! Mesik esik nem toloki ding dim kabalak e, yu tum win kuluko, dukulomin fen kemokoliw kasike. 3 Kaneko biliwi, nem yom dim toloki ding dim bakate, yu mali kunum mak kuluko, memen keyemoliwka! Keyemiwi, ne yom tun win dukukabiliw beem dulum elote fut mak bosomi, ilo fut beso, on kisol beso, alik alik makuw Selusalem abiw mutuk fian kalo yemdaloki te. 4 Yemdaloki kate, ne nakalem ibolow fukunin kuw geleweko, “Ken o, wa o!”, angeko, diwsomelii, iso neso, alik alik nu makuw Selusalem abiw mutuk fian kawtem elo unokoluw te.

5 Kame, ne Masedonia aneng fian kunum waneng im fukun uneko, aneng ka kel kulfiliko, ibik ete yom fukun toloki te.[b] 6 Telesomi, ne sukum ding kuw yuso ka boki te. Sukum ding yako, tiak ding yako, nakal akokow so bi te. Mesik esik ne “Asolow so kele ding banimoke ding yuso fenboki te!”, angeko, yuso boki te. Kate, ne tiak ding yuso bi tewe, yu ibik ete nelo dokonemsomi, nem unoki aneng kalo namdaloliwka![c] 7 Feinka! Kamok Fian e ibolow kele tewe, ne yuso nam kakin kuw boki te. Ne yuso bomin beem dulum elote “Tiak ding bin keko, bin em boka!”, angi te. 8 Kate kame, ne Efesus abiw mutuk fian kale kel, “Bentikos em ding banimoka!”, angomi, ding fenbi te. 9 Nimtew angom? Sunbin-Got e abisom fian mak busunemei, ne kale kel aluwbamin fian so kebi kasike. Kate, maka kenembiliw kawtiw banban ikati bomi, ilum dukanembiliw te.[d]

10 Nakunum kumel kunum waneng yutaka! Timoti em yom mutuk toloke ding dim kabalak e, yu ken kukuw kukulewiwi, e yom awan elo kanelom finganemoke te! Nimtew angom? E nemdiw Kamok Fian em aluwbamin kunum kebe kasike.[e] 11 Alik yu kanelom elo sakok kelewbokoliw te![f] Em iti yulo koyemoke ding dim kabalak e, yu elo yukalem ibolow menew so iti nem fukun elo dabalaloliwka! Nimtew angom? Ne eso, mali fein ibolow so nakunum kumel iso, alik alik biim ding fenbi kasike.[g]

12 Abolos em dulum em weng kal e kanekote: Banban ding ete ne kitil kuw bokolewomeli: “Ku mali fein ibolow so akunum kumel iso Kolin abiw mutuk fian em sios kunum waneng im fukun unemolewka!”, dangakabi kate, e kame telinba keko, “Ken ding keloka!”, angomi, beem ding fen alakabe te.[h]

Kaneko kasike, yu kunum waneng biimdiw wangweng kukuw kuw kukuyem kemoliwka!

19 Nakunum kumel kunum waneng yutaka! Esia aneng fian em sios kunum waneng i yulo “Yukal o!”, yangiw te.