9 तेरा कान्टा छे चे सामळे। 10 तीनाक जेल मां पड़नु छे, चु जेल मां पड़से, जु तलवार सी मारसे, छाचलीन छे की हयु तलवार सी मारायसे। चुखला माणसेन गम ने भुरसु एरे मां छे।
11 तत्यार मे एक अळी जनवार्या काजे धरती मां सी नीकळतेलो देख्यु, तेरा गाडरान पीलान तसा दुय सींगड़ा हतला; ने हयु अजगरेन तसु बुलतेलु। 12 जु तीना पेहला जनवार्यान आखा हक तेरे अगळ काम मां लावतेलु, ने धरती ने तेरा रहणे वाळा सी तीना पेहला जनवार्यान, तेरु जीव लेणे वाळु घाव वारु हय गुयलु, पुजा कराड़तेलु। 13 हयु मटा-मटा सहलाणी देखाड़तेलु, जां लग की माणसे अगळ सरग सी धरती पर आकठो पाड़तेलु। 14 तीनु सहलाणीन वजे सी जीनुक तीनु जनवार्यान अगळ देखाड़नेन हक तीनाक देदलु हतलु; हयु धरतीन रहणे वाळाक ईनी भाते भटकाड़तेलु, की धरतीन रहणे वाळा सी कवतेलु की तीना जनवार्याक तलवार लागली, हयु जीवी गुयु, तेरी मुरती बणावु। 15 ने तीनाक तीना जनवार्यान मुरती मां जीव नाखणेन हक देदलु हतलु, की जनवार्यान मुरती बुलने लागे; ने जतरा माणसे तीना जनवार्यान मुरतीन पुजा नी करे, तीनुक माराड़ नाखे। 16 ने हयु नानला-मटा, पयस्या वाळान-गरीब, छुटला-गुलाम आखान जेवड़्ये हाते नीते तींद्रा नींडाळे पर एक-एक छाप लागाड़ देदु, 17 की तीनाक छुड़ीन तीना पर छाप मतलब तीना जनवार्यान नाव, नीते तेरा नावेन आकड़ु रवे, ने दीसरा कुय लेणु देणु नी कर सके।
18 अक्कल हेरेत मां छे; तेरी अक्कल छे, हयु ईना जनवार्यान आकड़ा जुड़ ले, काहाकी हयु माणसेन आकड़ु छे, ने तेरा आकड़ा छव सोव सांठ ने छव छे।
<- उजेंता बुले 12उजेंता बुले 14 ->