14 पोलुस आपसुत कह्णे हींडतेलु ने तीनेत टेमे गल्लीयो यहुदी माणसे काजे कह्यु, “ए यहुदी माणसे कदी जु नीयावेन वीरुद मां काय बी गुनु करलु हसे, नीते मटु गुनु कर्यु हय, ती मे तुंद्री वात सामळीन तीयार रवतु। 15 बाकुन जे हीनी वात-वातेम लड़ायतेला, ती बेसका नावेन बारामां ने मुसान साहरे लिखला कायदान बारामां छे, तेरेसी ईनी वाते मां मे तुंद्रेम नीयाव करन्यु नी बणो, तुहुंत ईनी वातेन बारामां जाणु।” 16 ने चु गल्लीयो पोलुस काजे नीयाव करे तीनी कुरुट-कचेरी मां सी बाहर नीकाळ देदु। 17 ती आखा यहुदी माणसेन भक्तीन घरेन मुख्या सोस्थीनेस काजे नीयाव हवे तीनी कुरुट-कचेरी अगळुत धर पाड़्या ने बेसका ठुक्या, बाकुन गल्लीयो तीनी वात काजे देखी भाळीन काय बी नी कह्यु।
अन्ताकीया मां पोलुस पछु आवे
18 पोलुस बेसका दाहड़ा लग कुरींथी सहर मां रयु, ने हेरे पछळ चु भायसे काजे आवजु कय्न परीस्कीला ने अक्वीला पुठ्ये ढंड्या मां बसीन सीरीया भीणी चाल पड़्यु, ने चु बादा लेदु करीन कींख्राया मां आपसान मुणका काजे बुड़ायु। 19 अळतेन चे ईफीसुस पुग्या, ती पोलुस परीस्कीला ने अक्वीला काजे चांहान रहणीदीन यहुदी माणसेन भक्तीन घर मां जाय्न भगवानेन वातेन बारामां माथा-पच्ची करने बाजी गुयु। 20 चां वाळा माणसे लीलघाय्न कह्या थुड़ाक दाहड़ा अळी जां रय जां बाकुन पोलुस कह्यु मे नी रवतु कय देदु। 21 ने तीनु काजे छुड़ दीन जाणेन टेमे कह्यु भगवानेन मरजी रवसे तीते मे अळी तुंद्रेन्चां पछु आवीस, अळतेन पोलुस ईफीसुस सी ढंड्या मां बठीन चाल देदु।
22 ने अळतेन चु केसर्या सहर पुग्यु ने चां सी यरुसलेम सहर गुयु, ने चां वाळी ईसुन मंडळी काजे भेळु हय्न वारु छे की करीन कह्यु, अळतेन चु चांहा सी अन्ताकीया सहर मां जात र्यु। 23 पोलुस थुड़ाक दाहड़ा अन्ताकीया सहर मां रयु, ने चु गलातीया ने फुर्गीया फीरतु जाय्न आखा ईसु पर भुरसु करने वाळान भुरसा काजे काठु करतु रयु।
ईफीसुस ने कुरींथी सहर मां अपुल्लोस
24 तीनी टेमे चां यहुदी माणुस हतलु, तेरो नाव अपुल्लोस हतलो, चु सीकेन्दर्या मां पयदा हवलु, चु अक्कल वाळु माणुस हतलु, खरला सास्तुर काजे वारु रीते जाण तेलु, चु ईफीसुस मां आयु। 25 तीना काजे मालीक ईसुन सीकाड़ने वाळी वात जड़ली हतली, ने मन लागाड़ीन ईसुन बारामां सय-सय सीकाड़तेलु बाकुन तीना काजे युहन्नान बपतीस्मान बारामां अतरोत मालुम हतलो। 26 चु भक्तीन घर मां बीहे बीगुर भगवानेन वात कवणे बाजी गुयु, परीस्कीला ने अक्वीला तेरी वात सामळीन तीना काजे चे तींद्रेन्चां लीन गुया, ने तीना काजे वारु रीते भगवानेन वात समजाड़्या। 27 जत्यार अपुल्लोस समुदर वेणकीन अखाया जाणे करीन पाक्कु वीच्यार कर्यु, ती दीसरा ईसु पर भुरसु करन्या भायस, तीना काजे हिम्मत देदा ने अखाया वाळा काजे ज लिख्या की तुहुं पोलुसेन आव-भाव करजु जत्यार पोलुस अखाया पुग्यु ती चां वाळा माणसे तेरी बेसकी मदत कर्या जे भगवानेन गीण-दया सी ईसु पर भुरसु करला। 28 काहाकी चु खरला सास्तुर मां सी समजाड़तु जाय्न कवतेलु, की ईसुत मसी छे, ने यहुदी माणसे अगळ खरला सास्तुर मां सी बेसका वात कय्न तींद्री बुलती बंद कर देदलु।
<- नेवताळा 17नेवताळा 19 ->
