1 Ango edo Iesu ae ainda ambodani de Jerusalem atutumbedo, Besipeij nasida Olive de Peji[a] ainda guputera. Edo Iesu ambodani tote (2) piesiri mauntero, 2 awamanede sisina, “Imomane maundo nasi ounda toriwo. Edo boraebé wo donki[b] ai buri edo kanjigari ae donki vete de ainda tambawa. Awamane udegedo nato yaida kundo gumbuwo. 3 Ango eiawo embo da ainmi, ‘Nongo ain evi?’ tari gido, ainde tewo, ‘Badari mi jipapa eira.’ Ango tawo boraebé piari kundo gumbave.”
4 Aindabé perovetami rorae eiwa idegaina sisina, awatedo ro berari idegarate sisina awa gundo bé esisina. Edo sisina awa engo:
6 Awatedo ambodani maundo Iesu mi nongo orote tesira awa esitera. 7 Edo awamane wo donki ai ae donki vete de awa kundo gundo awamaneda dademo ombarimi womaneda gunda besi jirero Iesu visido anumbesisina.[e] 8 Edo embomai jisi bajinabé awamaneda dademo ombari begatada jijiritera, awamaneda tou ari arapa aintedo. Edo embo nenei ni papatu kapedo begatada jirido esitera. 9 Ango edo embo jisijisi gisi esitera, edo nenei Iesu da amboda orovigesitera, awamanemi tenda tenda aorogatedo sitera,
10 Edo iji ainde Iesu gundo Jerusalem toriri nasi bajina ainda embo berari erero yavi bajina esiri awamanemi tedo esitera, “Eiwa embo averi?”
11 Edo embo jisijisimi tedo esitera, “Eiwa peroveta Iesu. Awa Nasaret nasi embo yai Galili da.”
12 Ango edo Iesu maundo God da oro kotopu bajinada[i] torido[j] embomai berari oro kotopu doda origarori ero ondesiri idedegesitera. Edo imo ganu sirigari emboboda tenemba awa jiuri doveregedo esitera, edo ni ribo ango oriari emboboda anumba jiuri doveregedo esitera. 13 Edo Iesu mi awamanede sisina, “Ove Gaiarida God mi sisina, ‘Awamanemi tara, nato oro kotopu awa embomaida benunu oro,’[k] ata inemane etewo ‘beono emboboda onjigari banga to’[l] esira.”
14 Edo embomai jisi guba ari de baoro bundari demi Iesu da yai oro kotopu bajina doda gumbero ami gao esiri kaviegesitera. 15 Ata iji ainde pirisi babain de Aodarida atopapasigari demi Iesu da wasiri babain esiri gido, edo mamaimi oro kotopu bajina do arapada aorogatedo “Hosanna David da Mai!” tero ingido awamane sinigambari esitera.
16 Edo awamanemi embo ainde sitera, “Imo mamai emi ge ro teri awa gotesita?”
17 Edo imo awamane dodo nasi bajinada idegedo Betani nasida maundo muyae da (1) ainda ausina.
18 Edo sipo atesiri imo overegedo nasi bajinada maunsite beji mina burisina. 19 Edo jisi piedo ni dunga begata demonda gido imo ainda yaida gupusina. Ata be da ji itae, igi akuta gosisina. Edo Iesu mi ni ainde sisina, “Ine be da ji mana tenda ekata!” Ge ango tesiri boraebé ni dunga awa mumuya esisina.
20 Edo iji ainde ambodani eiwa gido korebé eite sitera, “Ni dunga awa nongo edo boraebé mumuya esiri?”
21 Edo Iesu mi awamanede mina sisina, “Eiwa awa gebé imondemane tena, itomane gebé ari God da yai piedo itadaita itae awa gido, inemane buro ro nane ni dungade eteno gewa ango akuta ainyae, ata daedo inemane peji einde tawa, ‘Imo akuta gigitembedo ewada dagumbeyo,’ edo ango aina. 22 Edo rorae ro benunuda tedogawa, edo itomane gebé ari God da yai pipiteiawo ami piari bawa.”
23 Ango edo Iesu gundo oro kotopu bajinada torido embomai atopaposite isiri pirisi babain de Jew gisijijiegari demi ainda yai atutumbedo sitera, “Imo awara tari nomi buro engogo edo esi? Edo imonde awara tari eiwa ainmi piesiri?”
24 Ata Iesu mi awamanede ge mina sisina, “Nane daedo imondemane tedogari da (1) piana. Edo inemane ainda mina tawo gido awa, nane dá ango awara tari nomi buro engogo edo eni awa, tano gawa. 25 Tewo gane. John da bapataito arida buroda awara tari yai nonda edo gupusini? Utu mi[n] pipisinita ko embo enembomi pipisiteri?”
27 Ango edo awamanemi Iesu de ge mina sitera, “John da bapataito arida buroda awara tari yai nonda edo gupusini awa, nakare gae.”
29 “Edo mai buwomi mina sisina, ‘Na jipapa ae ena.’ Ata amboda ainda kotembari wareregedo buroda maunsisina.
30 “Edo mamo maundo mai neide ge dá mai buwode sisina ango sisina. Edo mai neimi mina sisina, ‘Awara badari, nane mamana.’ Ata imo mambae.
31-32 “Awatedo mamai tote (2) einda da (1) ainmi ainda mamoda jipapa awa esisini?”
33 “Edo eniya ge nei ingiwo: Buro tutu da (1)mi dongo gurepi[p] jiwae buroda uredo puwa jido jinenembesisina. Edo gurepida gama bari yai duredo simagari beuri esisina. Edo ami gurepi buro sima ari embobo avigedo awamanemi dongo gurepi be tari ari tokedo ainda yai piorote sisina. Edo imo yai aikeda maunsisina. 34 Ango edo dongo gurepi be tari edo ainda tokari yoa gumbiri buro tutumi ainda buro embobo piesiri gurepi buro sima ari emboboda yai maunsitera, gurepi be piaro kumain.
35 “Ata gurepi sima ari embobomi ainda buro embobo awa kundo da (1) vejitera, nei da (1) detero besisina, edo nei awa ganumami doritera. 36 Ango etero gido buro embobo ine gisi pipitara da ajigari awa daginegedo tenda nenei piesiri maunsitera, edo gurepi sima ari embobomi iwata dá ango awamanede esitera. 37 Edo ambobéda awa, buro tutumi ainda mai pipisisina. Edo imo akuta sisina, ‘Awamanemi nato mai tou ara.’
38 “Ata gurepi sima ari embobomi mai awa gumbiri gido awamanemi akuta sitera, ‘Edo gurepi buro tutu betaina, butu einda maida topo aina. Puwo, kaende mai ouwa daro betari ainda butu kaenane kumbore.’ 39 Ango tedo mai gumbiri budo puwa ponda augetero idegesiri detero besisina.
40 “Awatedo gurepi buro tutu gumaina awa, ami gurepi sima ari embobode nongo aini?”
41 “Edo awamanemi[q] ainde mina sitera, “Embo ami embo bebegae awa usibesibé dedo ainda gurepi buro awa budo gurepi sima ari embo neneide piari sima ara. Edo beda tokari yoa gumbari gido awamanemi gurepi be ainda yai piaro baina.”
42 Iesu mi awamanede sisina, “Imomane God da Ove Gaiarida ro tari isira awa bé ajigedo gaeta?
43 “Awatedo nane imondemane tena, God da gisijiari[t] itomane yaida awa dodo kumaina, edo embomai ainkainmi God da jipapa awa ara awamanede piaina. 44 Daedo embo da ainmi ganuma einda tamonda durudo bedaina. Ata edo ganuma eiwa embo tamonda duraina, emi embo dedo mundari popo aina.”[u]
45 Edo pirisi babain de Parasi mane demi Iesu da eniya ge tote (2) ingitera, edo kariwa awamaneda bureite sira gositera. 46 Ango edo awamanemi embo awa jido bunain esitera. Ata embo jisijisimi Iesu awa peroveta gebé era, awaembo adu edo imo doturitera.
<- Matthew 20Matthew 22 ->- a Olive de Peji awa Jerusalem demonda. Iesu da ijide ni dao ‘olive’ jiwae peji ainda erido esitera. Awatedo embomaimi ainda dao ‘Olive de Peji’ tedo esitera. Ni olive mi be babaingae ekegedo eira. Jew embomaimi ainda be datedo gama budo jigamo edo esitera. Ni olive beda gama awa siwo dave, indari siya ari rorae dave, edo keimoda dungari rorae dave daedo (Leviticus 24:2).
- b wo donki awa hosi [English: horse] ango, ata awa saka. Edo embomaimi wo awa rorae bouga kundo mambarida buro awaembo jigamo edo era.
- c Nasi Zion embomai. Zion awa Jerusalem da dao nei. Edo Nasi Zion embomaida moka einda awa Israel embomai.
- d Zechariah 9:9
- e anumbesisina. Ove Kotopuda atopatari neneimi kotembedo era: Iji ainde Iesu begatada Jerusalem maundo wo donki tote (2) jigamo esisina. Edo wo donki da (1) oena apain jipapa ari gido, Iesu inono wotedo donki nei tamonda visido anumbedo mamaina.
- f Hosanna awa Hiburu ge edo ainda moka iji matuda awa “Nakare toregewasi!” Ata ainda amboda embomaimi moka teka “Nakare imo dasiga era!” ainda yai piedo esitera (Matthew 21:15da ge dá ango daedo giwo.).
- g Badari awa God da dao da (1). Ainda moka awa ‘Na awa Natopo Itari’ (Exodus 3:14-15). Ge Moka Teteka ove gaiari einda gunda awa daedo giwo.
- h Psalm 118:25-26
- i God da oro kotopu bajina awa Jew embomaida oro kotopu bajinada dao nei.
- j torido. Iesu Jew embomaida oro kotopu bajinada gano ari yai bereyabé arapada totorisina, edo ainda dao awa ‘Gentile embomaida yai’. Gentile embomaida yai edo Jew embomaida yai toropuda, guwa da (1) isinesina. Jew de Gentile embomaidemi inono Gentile embomaida yaida gundo maundo edo esitera. Awarata, Jew embomaimi akuta inono guwa toropu Gentile embomaida yai edo Jew embomaida yai ainda beda torido idegedo edo esitera. Iji ainde Iesu oro kotopu bajina sirigesisina, inemi origarori embo ainkain Gentile embomaida yai ainda buro ero ondesiri idedegesitera.
- k Isaiah 56:7
- l Jeremiah 7:11
- m Psalm 8:2
- n Utuda moka einda awa God.
- o God da gisijiari yai awa God da sima ari daveda yai.
- p dongo gurepi awa dongo evekarada dao, edo ainda be awa pasiporo ango. Embomaimi be awa tapedo ainda gama budo un okain dao ‘waini’ siya edo era.
- q awamane. Ove Kotopuda atopatari jiwae kotembedo era, ‘awamane’ da moka einda awa pirisi babain de Jew gisijijiegari de. Matthew 21:23 giwo.
- r tutuvida ganuma davebé dave. Iji matu ainde Israel embo nenei awawaneda oro ganumami gamundo esitera. Edo awamaneda oro tuturoda gapeite awamanemi ganuma okain kupo berari dambu dararide tamundo oro tekada tutuvi umbugoda piedo esitera. Ainda amboda awamanemi ganuma einda kupo kupo dambu dararide inono goteite ainda demonda ganuma nenei tano kokopibéda piedo oro teka gamundo esitera. Daedo, ganuma davebé awawa awamanemi jigamo edo esitera ango, ami ganuma demonda tandodeite eiuri oro okain edo dave petedo isima edo esisina.
- s Psalm 118:22-23
- t God da gisijiari da moka awa God sima ari daveda kando.
- u Ove Kotopuda atopapasigari jiwae kotembedo era eniya geda moka einda awa ango: Embo awa ou butumi ari, edo ganuma awa God da Avigari Embo, Iesu. Awatedo embo da ainmi Iesu ajiregaina awa ango ou ami ganuma tamonda durudo bedaina. Awarata, edo ganuma ami ou tamonda duraina awa ou usibesi aina.