Matthew 2

Dubogari embobomi Keriso etega esitera.

1 Iji ainde Herod[a] daotari isiri nasi Beteliem doda, yai Judea ainda, Iesu awa engisina. Edo giwo, ainda amboda dubogari embobo iji vitari kena edo Jerusalem guputera. 2 Edo awamanemi sitera, “Jew embomaida[b] daotari arate mai engisina awa nondari? Nakare maida dabori iji vitarida isite gido mai awa tumondebain ain gumbera.”

3 Ango edo Daotari Herod ge eiwa ingido do buriya esisina, edo Jerusalem embomai berari daedo ango esitera. 4 Edo embo ami Jew embomaida pirisi babain[c] ae Aodarida atopapasigari[d] de berari dao tesiri gundo doregetero awamanede tedogosisina, “God da Ove Gaiarida gemi Keriso yai nonda engaina sisini?” 5 Ango tesiri awamanemi mina sitera, “Beteliem doda yai Judea ainda, perovetami engo gagurisina:

6 ‘Ata imo Beteliem nasi, Judah butu doda iteta,

ito yai edo Gisijiaribé idegaina,

edo embo ami dave edo nato Israel embomai[e] gisijiaina.

Awatedo imo awa Judah da nasi sakabé ae.’[f]”

7 Ango edo Herod dubogari embobo onjigarida dao tesiri gumbero awamanede tedogosisina, iji bé nonde dabori idegesisini awa. 8 Edo embo ami awamane Beteliem nasida piedo sisina, “Maundo dave edo mai saka awa kakowa ewo. Edo tamundo gido, overegedo gundo na ge tawo gido na daedo maundo mai awa tumondebain ane.”

9 Edo daotari ge tesiri ingido awamane maunsitera. Edo giwoǃ Dabori iji vitarida isite gositera, ami gisi edo aundo yai mai saka isira ainda ikaneda peposisina. 10 Ango edo awamane dabori awa gido do yawa bajinabé esitera. 11 Edo awamane gundo mandoda torido mai saka ae ainda ai Mary de gido, awamane baongo dadari edo mai awa tumondebain esitera. Ango edo awamane kaita pirigedo kando kundo maide pipisitera: gold de frankincense[g] de myrrh[h] de. 12 Edo God mi awamanede aturoda tesiri gositera, tekago Herod da yai mamborekae. Awatedo awamane dodo begata nei budo awamaneda yaida maunsitera.

Joseph ae Mary de Iesu de yai Egypt ainda boraebé maunsitera.

13 Ango edo awamane idegedo mambero, giwo, Badari da anelami Joseph de aturoda idegedo sisina, “Herod mai saka awa dari betarate kakowa aina. Awatedo eri! Mai saka ae ai de budo yai Egypt boraebé mambate. Edo ainda isiato nane tano gido tekago egenembata.” 14 Edo Joseph erido mai saka awa ae ai de budo muyaede yai Egypt ainda maunsisina. 15 Edo awamane yai ainda itero Herod besisina. Aindabé Badari mi perovetade matu sisina, “Nane nato mai awa Egypt dodo idegarate dao sitena,”[i] ge awa bé esisina.

Herod mi ge okain tesiri mai jijianda Beteliem nasida detero bebetegesitera.

16 Edo iji ainde Herod mi dubogari embobomi imo udumbetera ango gido, imo sinigambari bajinabé esisina. Aindabé dubogari embobomi iji nonde mai awa engesiri awa Herod de matu tetero gosisina, awatedo imo ge katedo mai jijianda berari duberi tote (2) edo tuda Beteliem nasi doda edo nasi babaingae demonda awa daedo daro betorote ge okain sisina. 17 Ango edo ge peroveta Jeremiah mi sisina awa bé esisina:

18 “Edo ge yavi awa Ramah nasida ingera.

Do ari ya ae ji de aoro ikanade Rachel mi ainda mamai awaembo tedo esira.

Aindabé ainda mamai berari bebetegetera,

eutu awa embo neneimi kondade ari jipapa ae edo esira.”[j]

Joseph ae Mary de Iesu de Egypt dodo Nasaret nasida gundo isiretera.

19 Ango edo, amboda Herod betesiri, giwo, Joseph yai Egypt ainda isiri Badari da anela aturoda idegedo 20 ainde sisina, “Ouwamane ainkain mai saka daro betarate esitera awa besitara. Awatedo eriyoǃ Mai saka ae ainda ai de budo Israel butuda aimbate.”

21 Ango tesiri Joseph erido mai saka ae ainda ai de budo Israel butuda totorisina. 22 Ata iji ainde Joseph mi ge eiwa ingisina, “Archelaus mi ainda mamo Herod da dero budo yai Judea gisijido eira.” Awatedo ge awa ingido embo awa yai ainda aundo itari adu esisina. Edo aturoda God mi dedegari ge Joseph de tesiri gido yai Judea daginegedo yai Galili ainda maunsisina. 23 Edo awamane nasi dao Nasaret ainda gundo anumbesitera. Awatedo ge ro peroveta manemi sitera awa bé esisina, “Imo awa Nasaret Embo tara.”[k]

<- Matthew 1 Matthew 3 ->