1 Deguta dá ainde Iesu mando dodo idegedo maundo ubutu demonda anumbesisina. 2 Edo embomai jisijisi bajina doregedo imo jinenembesitera. Awatedo imo un mada visido ainda anumbesiri embomai jisida awamane berari doregedo un bengida pepositera. 3 Ango edo imo rorae jiwae awa eniya gemi awamane atopaposisina. Edo atopaposite tedo sisina, “Giwo, buro embo da (1)mi rorae vero purara piain kundo maunsisina. 4 Edo imo vero purara pipisiri vero nenei begata beda duduritera. Awa nimi gundo injitera. 5 Edo nenei ganuma gajida duduritera edo ainda butu puruta ae, awatedo boraebé eroritera. 6 Ata iji visido veverami gaiesiri ambuye esitera. Edo awamaneda besinya butu tuda wotae, awatedo mumuya esitera. 7 Edo vero nenei awa kurere teoroda duduritera, edo kurere erido ami ipuda engoegetero ginene esitera. 8 Ata vero nenei butu daveda duduritera awa davebé erido be ekitera, nenei jiwaebé (100), nenei jiwae (60), nenei (30). 9 Edo imomane dengorode ingari tao gido, ingiwo! Ge ro tena awa bé gain edo awa gawa!”
10 Ango edo ambodani Iesu da yai gundo imonde sitera, “Ro awaembo imo embomaida yai eniya gemi tedo esi?”
11 Edo ami ge mina awamanede sisina, “Aindabé utuda gisijiarida gebé onjigari[a] awa ano arapa ari gawa, ata awamaneda yai ano arapa ae. 12 Aindabé embo ainmi rorae ro isira awa, jiwae piaina, edo daginegedo bajinabé baina. Ata embo ainmi rorae ro itae awa, saka ro ainda yai isira awa dodo baina.[b] 13 Aindabé awamane jisimi nato buro gido era ata ainda mokabé gae, edo awamane nato ge ingido era ata ingae, edo ainda atopatari gae arapa ae, awatedo nane awamanede eniya gemi tedo ena. 14 Edo ge awa peroveta Isaiah mi matu awamaneda daoda sisina awa bé eira. Edo ainda ge awa engo:
18 “Awatedo ingiwo! Eniya ge vero purara piari embo ainda moka awa engo: 19 Embo ainmi gisijiarida ge awa ingido arapa ae edo eira awa ango butu begata beda vero duduritera ainda. Ge awa emboda doda durudo eira, ata embo beyaemi[d] gupeite ainda doda burigi kundo maundo eira. 20 Edo embo nei awa ango butu ganuma gajida vero duduritera ainda. Embo emi ge awa ingeite boraebé yawade budo eira. 21 Ata ge awa ainda doda dave edo wotae, awatedo iji tupo akuta imo ge awa kera edo eira. Edo iji nonde ge awa kera eiuri buriya gumburi o ainda yai memesi neide kainde embomi pioro burigibé durudo eira. 22 Embo nei awa ango butu vero kurere teoroda duduritera ainda. Embo emi ge awa ingido eira. Ata butu roraeda kotembari jiwaemi ainda do buriya edo eira, edo ganu jiwae dada arida kotembarimi imo udumbedo eira. Awatedo kotembari angogomi erido ge awa engoegetero ginene eiworo imo be ekae edo eira. 23 Ata embo nei awa ango butu dave vero duduritera ainda. Embo emi ge ingido ainda moka arapa euri gido eira. Edo imo be dave edo ekesite piedo eira, nenei jiwaebé (100), nenei jiwae (60), edo nenei (30).”
27 “Ango edo buro embobo gundo buro tutude sitera, ‘Badari, imo vero dave akuta buro itoda purara pipitata. Nongo edo vive beyae buro ainda iteri?’
28 “Edo embo ami awamanede mina sisina, ‘Gitopo embomi buro eiwa eutara.’
29 “Ata ami ge mina sisina, ‘Ango ainyae. Gaegae edo inemane vive beyae awa usite wheat daedo utawa. 30 Dowo, tote (2) matawa inonoda badore. Edo maundo tokari iji ainde nanemi tokari embobode tano gara, “Vive bebegae awa gisi utedo sindari berari ewo, edo niyaoda dungave. Ata wheat awa dada ewo, nato rorae itari oroda kundo gumbave.” ’ ”
31 Ango edo Iesu mi awamanede eniya ge nei sisina: “Utuda gisijiari awa masitet[f] vero engo. Vero awa embo da (1)mi kundo maundo ainda buroda urisina. 32 Masitet vero awa nya vero nenei ango ae. Awa saka maibé. Ata iji nonde ami erido bajina aina awa, buroda nya nenei awa daginegedo ni ipu piedo papatu gataina. Awatedo ni waside ami baba edo gundo ainda papatuda ma piara.”
33 Edo Iesu mi daedo eniya ge nei awamaneda yai sisina: “Utuda gisijiari awa bread badari siwo engo. Eutu da (1)mi ou bajina palawami beda arida bread badari siwo saka awa baige esisina. Edo siwomi esiri palawa berari bajido duga esisina.”
34 Rorae eiwa berari Iesu mi eniya gemi embo jisijiside sisina. Imo ge da (1) nondawa tepo tae, ata berari eniya gemi awamanede tedo esisina. 35 Ango edo ge eiwa perovetami amboda gumaina sisina, awa gundo bé esira:
37 Edo Iesu mi awamanede ge mina sisina, “Embo vero dave purara piedo eira awa Embo da Mai. 38 Edo indari buro awa butu berari. Vero dave awa embomai God mi gisijido eira.[h] Ata vive beyae awa embomai embo beyaemi gisijido eira.[i] 39 Edo gitopo embo vive beyae purara pipisisina awa Binei.[j] Edo tokari iji awa iji beao arida, edo tokari embobo awa anelamane. 40 Awatedo dá tokari embobomi vive bebegae dada edo niyaoda dungedo era ango, anelamanemi iji einda beao arida iwata ango ara. 41 Embo da Mai mi ainda anelamane piari idegedo maundo awamanemi rorae bebegae berari ainda gisijiari yaida itera, edo embomai ainkainmi wasiri bebegae edo era ainde awa dada ara. 42 Ango edo anelamanemi awamane augaro yai beyae niyao matawa aveite isira ainda mambara. Edo yai ainda ji site ji vegeiaro kitoru katoru taina. 43 Edo embomai wasiri dambu darari awa ijimi parara datembedo eira ango, awamanemi parara datembara awamaneda Mamo da gisijiari yaida. Edo imomane dengorode ingari tao gido, ingiwo! Ge ro tena awa bé gain edo awa gawa!
52 Edo ami awamanede ge sisina, “Awa dave, awatedo Aodarida atopapasigari berari da da utuda gisijiarida atopatari[k] bira, awa ango embo mando tutumi ainda roviravi itari yaida gaiapa teteka ae mamatu de kundo idegedo eira.”
53 Edo iji ainde Iesu eniya ge eiwa piedo itae edo yai ainda awa dodo maunsisina.
54 Ango edo imo ainda nasi topobéda gundo, tuturo edo awamaneda benunu oroda embomai awa atopaposisina. Edo awamane korebé edo sitera, “Embo emi dubogari eiwa ae buro babain ari eiwa de yai nonda biri? 55 Eiwa oromando ari emboda mai rita? Awa gebé. Edo ainda aida dao Mary tedo era awa rita? Gebé. Edo ainda nanonameji awa James, Joses, Simon ae Judas[l] de rita? Gebé. 56 Edo ainda ruaimono berari awa kaenamonde einda iterita? Een, gebé. Embo emi rorae berari eiwa yai nonda biri?” 57 Awaembo awamanemi imo jipapa ae esitera.
- a utuda gisijiarida gebé onjigari awa ‘God da onjigari gebé nongo edo imo ainda gisijiari buro aina.’
- b God mi embomai edo eira, edo ami embo enembo berarida yai ainda gebéda gari tegada tegada pisido eira. Awatedo embo ainmi God da gisijiarida gebé nei gain jipapa eira awa, God mi ainda yai gari awa piari jiwaebé gaina. Ata embo ainmi God da gisijiarida gebé nei gain jipapa ae awa, saka ro ainda yai isira awa dodo baina (Psalm 139:14-18; Rome 1:18-25).
- c Isaiah 6:9-10
- d embo beyae awa Satan (1 John 5:19).
- e Utuda gisijiari awa engo da moka awa ‘Nongo edo God mi ainda sima ari daveda buro aini awa engo.’ (Ge dá ango Matthew 13:31, 33, 44, 45, edo 47 isira.)
- f masitet awa pingi ae. Awa ni Israel embomaimi buroda uredo esitera. Edo ainda vero mundedo unde baige edo awamaneda indarida saka saka piedo injido esitera.
- g Psalm 78:2
- h embomai God mi gisijido eira. Gurikida ge awa ‘gisijiarida mamai’.
- i embomai embo beyaemi gisijido eira. Guriki da ge awa ‘embo beyaeda mamai’. Edo embo beyae awa Satan (Matthew 13:19).
- j Binei awa Satan da dao nei.
- k utuda gisijiarida atopatari awa God da sima ari daveda atopatari (Matthew 3:2da kondade ari ge daedo giwo.).
- l Judas einda awa Judas Iscariot ae, ata embo eve. Judas einda awa Joseph ae Mary deda mai. Judas Iscariot awa Simon da mai (John 13:2 giwo.).