1 Edo deguta neneinda amboda, ambodanida ajigari visido babojisina. Edo ambodanida doregari bajina doda Guriki Judah embomai*Guriki Judah embomai yai Israel ainda badae, ata yai neneinda bajido Guriki ge tedo esitera. ae Hiburu Judah embomai†Hiburu Judah embomai yai Israel ainda bajido Arameki ge tedo esitera. de isiretera. Ango edo iji ainde, Guriki Judah embomaimi gositera, Hiburu Judah embomaimi kondade ari inono ae deguta tegerida awamaneda Guriki eutu rorida yai piedo esitera. Awatedo, awamanemi ge guguma gaguma Hiburu Judah embomainda yai sitera. 2 Ango etero embobo 12‡embobo 12. Guriki ge einda awa ajigari 12 akuta. Awarata ainda moka awa Yesu da piari aimbari embobo 12. Luke 6:13 edo Iwata Ari 1:15-26 daedo giwo. ami ambodanida doregari bajina dao tetero gundo doregetero sitera, “Nakare God da ge tari dodo embomainda buro sima ari embo ara, awa natokare yai dave ae. 3 Awatedo nanonameji,§nanonameji da moka einda awa Yesu da gebé ari embo eutu. itomane yaida embobo ajigari 7 engo kakowa edo tambuwo! Embobo ango kaena gido era awa, Asisi Kotopu da gisijiarimi isima edo era, edo dubogari de. Nanekaremi awamaneda yai awara ari piaro buro eiwa gisijiara. 4 Edo nanekare akuta iji matawa benunu tari buro edo God da ge tari buro sima edo ara.”

5 Ge engo eiwa embobo doregesitera berari ingido dubodave esitera. Awatedo awamanemi Stephen avigesitera (embo ainda gebé ari God da yai okain bé pieuri Asisi Kotopu mi awa gisijido esisina), edo Philip, Prochorus, Nicanor, Timon, Parmenas, edo Nicolas. Nicolas awa Enteoki embo ata Judah embo ae. Ami ainda gebé ari matu dodo Judah embomainda God ambo ambo edo esisina. 6 Ango edo awamane kundo gundo Yesu da piari aimbari emboboda yai pipisitera. Edo Yesu da piari aimbari embobomi awamane embo God de benunu tedo ipa tamonda pisido ao esitera.

7 Ango etero God da ge simundo arapu eiri ambodanida ajijigari Jerusalem doda ikanebé viviteiri edo pirisi mane jisijisi God da ge kera edo gebé edo esitera.

8 Edo Stephen mi ainda gebé ari God da yai okain bé pieuri, God mi goroba bajinabé ainda yai pieuri ami wasiri babain edo kariwa babain embomainda doda edo esisina. 9 Awarata, embo nenei Stephen da ge jinjitera. Awamane Judah embomainda benunu oro*Judah embomainda benunu oro awa jiwaebé, edo nasi da da ainda isima edo esitera. Oro ainda Judah embomai dada edo Badari tumondebain edo, awamaneda katari budo, awamaneda mamai atopasido esitera. dao Udegari Embobo†Udegari Embobo. Judah embobomi benunu oro eiwa jigamo edo esiterada orobe matu, awamane Rome da bundari embomai ango isima edo esitera. Awarata, ainda amboda, awamaneda udegari buritera. Awatedo, Judah embomainda benunu oro eiwa dao dá ango burisina. ainda edo guputera. Edo ainda embomai awa nasi Sairin edo Alexanderia, daedo yai Silisia edo Asia da edo gumbari. Edo awamanemi Stephen de tuturo edo ge baitera. 10 Ata Stephen da yai Asisi Kotopu mi dubogari piesiri embo awa ge tedo eiri awamane embo awa daginegari tao ae edo esitera.

11 Ainda edo awamanemi temada embo neneinda do budo ge torote sitera, “Nakare Stephen mi ge siri ingitara awa, sinigambari eite Moses ae God de ge bebegae siutara.”

12 Edo awamanemi embomai ae orobeda kopuru mamai de, Aodarida atopapasigari de, ao gaietero erido Stephen da yai gundo, embo awa tanjido kundo Sanhedrin da yai aunsitera. 13-14 Edo awamane daedo ge pitawa tari embobo pietero petedo awamanemi site sitera, “Nanekare embo ami ge siri ingitara awa, Yesu Nasaret embo emi oro kotopu bajina eiwa dedo sitaina, edo Moses da tari matu kaenamonde pipisisina ambo ambo edo era awa, kundo wareregaina. Awatedo, embo emi ge bebegae yai einde Moses da Aodari‡Moses da Aodari da moka einda awa ge berari God mi Moses de piesiri gagurisina. Awatedo, Judah embobomi ove gaiari ipa da (5): Genesis, Exodus, Leviticus, Numbers, edo Deuteronomy awa dao ‘Aodari’ tedo esitera. de awa dowae matawa tedo eira.”

15 Edo tetero gido Sanhedrin anumbetera itera berari ami jisimi jijimbeteite embo ainda dombu awa anelada inge gositera.

<- Iwata Ari 5Iwata Ari 7 ->