1 Ragung è sang yao giak branthek ne thog ruii pha ishakthek shii ne migi thoh ruii phro; ithek ne biidiie pha ragungthek shii nuii ne ibuiithek è yua pha ji shii lua ruii phro. 2 Ji è rek pha yuathek ne shiie chieg rog shii ziao pha duiine khinrin pha khlampho è shiiy ro, ithek munowthek ne iy-iy ro. 3 Jithek pha branthek yua yiygey nane ji pha giak michiethek chie phane ichiig ro. Jishii Hamangkhung-aphuii è jithek pha michie ne hanyie yi migiphothek nane izai shii thiegpho ne lasothek misia pha iidoh ne chie pha rab phi ro. 4 Hamangkhung-aphuii miirab pha zab ne wie ro, snai pha ne nyie de oi, jishii zab ne lasothek pha misia rog shii choi ro, 5 nyieliieshii Hamangkhung-aphuii ro miyaogam nane misia ne Hamangkhung-aphuii shii choi ro.

6 Na è migiphothek shii hì yua arone, na ne Masi Isu ro khiao wie rey ruii phro, na ne nawai giang pha miyaogam pha migi nane izai re-è yua pha ji shii nawai ragungthek shii wang pha duiine ro. 7 Hamangkhung-aphuii oi pha phaluii è ruang rek bo, nyieliieshii hì ne nyie blia oi ro. Nawai shii hamangkhung-aphuii chai ji è dab ne rai bo. 8 Siu pha blia shii de nyie magunde bid um ro, jishii ragung pha blia zab pha lumuii shii ne zab shii wie ro, jimagunde ji ne thuh nane phariang pha chai nyimanyi shii sbang rek ro. 9 Hì ne zab shii nuii ne chiih-è migi rek pha izai miyao ro. 10 Gathek ne diig[a] rek ne blia gang rek, nyieliieshii gathek ro luthong ne isieng Hamangkhung-aphuii shii ruii, ai ne zab ro Ragia ro, hanyie è migi rek pha ji pho ro.

11 Ithek shii hì pha miyaothek nane yuathek ji phi magey bo. 12 Nyieliieshii na filiao pha ji è hanyie de na shii luii ariig yi rabo, jimagunde migiphothek shii naro miyao, naro blia, naro miie, naro migi, nane gang shii khagi rek bo. 13 Idohhè gu wuii ruii shii, nathek ro ishak phi ne branthek moe shii jigithek tham ne yao, na ne yua pha ji shii snak rek bo. 14 Nyie chaigthek è yaojong pha nane dukhothek è wad nathek lakhung shii ruii shii nathek shii phijong pha ragung lasen ji shii asnai rabo. 15 Nawai ro ibi rey pha ji shii zab doh yi pha hì thek pha manathek shii rek bo ji è zab ne nawaithek shii doh muii ruii phro. 16 Nawai shii riig ne nawai muyua ji shii riig bo. Hì pha bliathek shii rek ne rai bo, nyieliieshii nathek rek arone, nyimanyi nawai nane hanyie è na shii yoi pha ji shii de ragia rey ruii phro.

<- 1 Thimothi 31 Thimothi 5 ->